Late 103 - Tedim Bible

Pasian’ Itna Phatna

¹ Topa ka phat ding a, ka lungsim khempeuh tawh ama min siangtho ka phat ding hi.

² Topa ka phat ding a, ama migitna ka mangngilh kei ding hi.

³ Amah in ka mawhna khempeuh hong maisak a, ka natna khempeuh hong dam sak hi.

⁴ Hankhuk tung ding hong suakta sak a, itna leh hehpihna tampi hong pia hi.

⁵ Muvanlai bangin ka thahat theih nadingin thupha namkim hong pia hi.

⁶ Topa in, a kinengniam mi khempeuh adingin thuman, thutangin thu a khen hi.

⁷ Amah in ama geelna, Moses tungah gen a, ama nasepnate, Israel mite a musak hi.

⁸ Topa dik-in hehpihna tawh kidim a, heh hak-in, a lian mahmah itna kip tawh kidim hi.

⁹ Amah in hong taai ngitnget lo ding a, amah heh paisuak lo ding hi.

¹⁰ Amah in, eite’ khialhna tawh kituakin hong bawl loin, eite’ mawhna tawh kituakin hong thukkik lo hi.

¹¹ Vantung in leitung panin a san’ mah bangin, amah a zahtakte tungah ama itna kip lianin sang mahmah hi,

¹² nisuahna pen nitumna panin a gamlat mah bangin, eite tung panin i mawhna daante gamlapi-ah amah in a nilkhia hi.

¹³ Pa in a tate a hehpih bangin, Topa in amah a zahtakte hong hehpih hi.

¹⁴ Bang hang hiam cih leh amah in eite’ pian’na hong thei hi; eite leivui i hihna a phawk hi.

¹⁵ Mihing ahih leh ama nuntak hunin lopa tawh kibang hi; lo lai a paakte bangin amah palh hi;

¹⁶ bang hang hiam cih leh huih in amah seem-in beimang a, tua mun in amah thei kha nawn lo hi.

^17-18 Ahih hangin, Topa’ itna kip pen, amah a zahtak mite tungah a tawntung panin a tawntung dongin kip ngitnget a, ama thumanna pen, ama thuciamna zui-in a thupiakna bangin sep ding a phawk mite’ tungah a khang khangin kip tawntung hi.

¹⁹ Topa in ama tokhom vantungah phut khin a, amah in mun khempeuh a uk hi.

²⁰ Ama thugen a ngai, ama thu bang-a a sem no a thahat, no ama vantung mite aw, Topa phat un!

²¹ Ama deih banga gamta ama nasem, ama vantungmi hon khempeuhte aw, Topa phat un!

²² Ama ukna mun khempeuh ah a om, ama bawlsate aw, Topa phat un. Ke’n, Topa ka phat ding hi.