Late 101 - Tedim Bible

Ukpa khat in Thuman Lungsim Neih ding a Khentatna

¹ Keima la in nangma itna leh thutan’na hi a, nang kong sak ding hi. Topa aw, kong sak ding hi.

² Paubaan’na a om lo thu bek ka kin ding hi. Cik ciangin kei kiangah nang hong pai ding na hi hiam? Lungsim hoihna tawh ka inn sungah ka gamta ding hi;

³ a sia na peuhmah ka deih kei ding hi. Lam khial mite’ nasepna ka mudah hi; tuate tawh ka kisukha kei ding hi.

⁴ Lungsim kawina ka deih het kei a, siatna, ngaihsut-in zong ka nei kha kei ding hi.

⁵ A vengte a gensia sim mite ka susia ding a, kiphatsakna leh kihihsakna lungsim a nei mi ka thuak kei ding hi.

⁶ Leitungah a thuman mite kei tawh a omkhop theih nadingun maipha ka pia ding a, paubaan’na om lo a, a gamta mi in keima na hong sem ding hi.

⁷ Khemna a zang mi peuhmah keima inn ah teeng lo ding a, zuauthu a gen mi peuhmah keima omna-ah om thei nawn lo ding hi.

⁸ Zingsang simin, leitunga migilote khempeuh ka susia ding a, Topa’ khuapi panin, siatna bawlte khempeuh ka khenkhia ding hi.