Late 10 - Tedim Bible

Migilote tungah Pasian’ Thukhen ding Ngetna

¹ Topa aw, bang hanga gamla din’ na hi hiam? Haksat hunin bang hanga nang bu khong na hi hiam?

² Migilote in kiphatsakna tawh mizawngte uuk delh uh hi; amau ngaihsut vaihawmna mah-ah amaute awk sak in.

³ Bang hang hiam cih leh migilo in a lungsim deihna kiphatsak pih a, ngah nading a huaihampa in, Topa phuisam-in taisan hi.

⁴ Migilo in kiphatsakna maisuah tawh amah zong lo a, ama ngaihsutna khempeuh ah, “Pasian om kei,” ci hi.

⁵ Ahih nate a ma pai ngitnget hi; amah kiphasak a, na thukhennate ama muhna’ bat zawh lohin sang hi; a galte khempeuh ahih leh amah in nehpiksan lel hi.

⁶ A lungsim sungah, “Kiling ngei kei ning; khang tawntungin kamsiatna tuak kei ning,” ci-in amah in ngaihsun hi.

⁷ Ama kampau in hamsia leh khemna leh netniamna tawh kidim a, siatna leh manlohna thugenin nei hi.

⁸ Khua neute sungah mi bukin tu a, munbute-ah mawh nei lote that hi. Ama mit in mi tuahsiate encik sim a,

⁹ humpinelkai in a kua pan a buk bangin amah in buk sim-in, mizawngte man dingin buk a, mizawngte a ngenthang sungah kai-in man hi.

¹⁰ A thatang hat thu tawh mi tuahsia mi, sucip-in, hoi-in puk suksak hi.

¹¹ Ama lungsim sungah, “Hih pen, Pasian in mangngilh hi, a mai seel hi, en lo ding hi,” ci-in ngaihsun hi.

¹² Tho in, Topa! Pasian aw, na khut lamto in la, a thuakte mangngilh kei in.

¹³ Bang hangin migilo in Pasian simmawh a, a lungsim sungah “Nangmah in thu dongtel lo ding,” ci ahi hiam?

¹⁴ Nangmah in na mu hi; hi takpi hi, na khut sungah na koih theih nadingin haksatna leh gimna na ciamteh hi; tuahsia mi in nangma tungah ama pumpi hong ap hi; pa nei lote a huhpa na hi hi.

¹⁵ Migilo leh siatna bawlte’ ban kuaitan in la, a gitlohnate a bei matengin zong in.

¹⁶ Topa in a tawntungin Kumpi hi a, ama leitang panin minamte beimang ding hi.

¹⁷ Topa aw, lungnemte deihna na ngai ding hi; a lungsim uh na hatsak ding a, na bil na ngat ding hi.

¹⁸ Pa nei lo leh nen’niamna a thuakte tungah na thutang a, leitung mite in launa tuak kha nawn lo ding hi.