Kolose 4 - Tedim Bible

¹ Tote aw, note in zong vantungah om Topa khat na neih uh na thei un la, thuman thutak leh a kilawm a kituakin na silate uh na bawl un.

Hanthotna

² Thungen tawntung un la, hong hehpihna phatin ngak un.

^3-4 Keimah in Khazih’ thu thuk hangin thongkiatna ka thuak a, tua thu thukna gen dinginah Pasian in thuhilhna kongkhak, kote ading a hong hon’ nading ahi zongin, tua thu thukna hilh ding a kilawm mah bangin ka hilh theih nading uh ahi zongin, kote ading thu hong ngetsak un.

⁵ Pua lamah a om mite mai-ah pilna tawh gamta un la, a hun na teel un.

⁶ Mi khempeuh tungah bang ci dawn’ kik ding cih na theih nadingun, note kam in ci al bangin a al limna tawh dimin kilawm tawntung ta hen.

Tawpna Hopihna

⁷ Topa sungah dikna nei-in nasem khawm sila ka hihpih, a it huai mi ahi sanggampa Tikhikas in keima thu a om khempeuh note kiangah a hong gen ding hi.

^8-9 Note in kote thu na theih nading uh leh amah in note lungsim hong hehnep theih nadingin, amah in ahi zongin, note sung pan a piang dikna a nei, a it huai mi Onesimas note kiangah ka hong sawl ding hi. Amaute in hih khua-ah a om thu khempeuh note kiangah a hong hilh ding uh hi.

¹⁰ Kei tawh thong a kia khawm mi Aristarkhas akipan Barnabas’ nau Marka leh Justas a kici Zeisu te in note a hong hopih uh hi. Marka thu tawh kipawl note kiangah ka hong khak zo hi. Amah note kiangah a hong tun’ ciangin dawnin na tungsak un.

¹¹ Vunatna a thuak mite lakah hih mite bek Pasian’ Gam ading ka naseppihte ahi uh a, kei hong hehnem uh hi.

¹² Note lakah a piang Khazih Zeisu’ sila Epafras in note hong hopih hi. Note kicingin Pasian’ deihna khempeuh ah lunghihmawhna om loin na lungkim nadingun, note ading hahkatin thu a ngen tawntung hi.

¹³ Note-a kipan Laodikia khua leh Hierapolis khua ah a om mite adingin nakpi-in a hahkatna thu keimah in amah ading teci ka pang hi.

¹⁴ Itna a ngah zato mangpa Luka leh Demas in note hong hopih uh hi.

¹⁵ Laodikia khua-ah a om ute naute a hi zongin, Nimfa akipan ama innah a om pawlpi ahi zongin na hopihsak un.

¹⁶ Hih lai na sim khit uh ciangin Laodikia khua-ah a om pawlpite zong na simsak un. Laodikia khua pan a kingah ding lai zong na sim un.

¹⁷ Arkhippas kiangah zong, “Nangmah in Topa’ khut sungah na ngah nasepna na zawh khit nadingin ciamteh in,” ci-in na gen un.

¹⁸ Kei Paul in ka khut tawh note hopihna hih lai kong gelh hi. Kei’ thuak kikhihna na ngaihsun un. Note tungah hehpihna thupha om ta hen.