Kah la 2 - Tedim Bible

Jerusalemmite’ Dahna Pasian’ Bawl

¹ Topa in a heh manin khuamial tawh Jerusalem a tuamcip hi. A vantung minthan’na teng uh kisiatna a suaksak hi. Amah in a heh ni-in a Biakinnpi nangawn a susia hi.

² Topa in Judah gama khuate khempeuh hehpih loin a susia hi. Amah in a galdalna kulhpite khempeuh balzan gawpin a gam leh a gam ukte a maizumsak hi.

³ A hehna tawh Israelte’ tha hatnate hong suksiatsak gawp a, gal in a hong sim ciangin Amah in eite a hong huh nuam kei hi. Meikuang tawh kibangin eite langah hong pang a, na khempeuh a susia hi.

⁴ Amah in galte bangin a thalpi tawh hong ngim a, i lungdamna teng leh i kisak theihpih teng a hong thah khit sak hi. I inn sung tekah a hehna meikuang i mu thei hi.

⁵ Topa in galte bangin Israelte a susia hi. Amah in kulhpite leh kumpi innte a siasa-in a nusia hi. Amah in a bei thei lo dahna Judah gam sungah a tungsak hi.

⁶ Amah i biakna Biakinnpi a zan gawpsak hi. Amah in ni siangtho nite leh sabbath nite a beisak hi. Kumpite leh siampite in a nasia Ama hehna a thuak khawm uh hi.

⁷ Topa in a siangtho biakinnpi leh a biakna tau deih nawn lo a, biakinn kulhpi galte a susiasak hi. Lungdamna tawh Amah i biakna munah, amaute gal zoin a kiko uh hi.

⁸ Topa in Jerusalem kulhpi a kipuk ding a ngaihsun khin zo hi. Amah in a vekpi in a kisia khin dingin a sehzo hi. Tausangte leh kulhpite tu-in a kisia khin pikpek ta hi.

⁹ Kulh kongpite cim gawpin lei in vukcip a, kongpi kalhna zawlte a kitan gawp hi. Kumpipa leh miliante salin a om khin uh hi. Thukham kihilh nawn lo a, kamsangte in Pasian kiang pan mang a mu nawn kei uh hi.

¹⁰ Jerusalem puteekte in pau loin leilakah tu uh a, dahna lim lahna in ippi puan silhin a lu zang uh leivui a buak uh hi. Jerusalem nungak note in a kun ngelhngalh uh hi.

¹¹ Ka kah kahna-in ka mit paat gawp a, ka lungsim a gim lua mahmah hi. Ka mite kisiatna hangin dahin husamin ka bah gawp hi. Naupangte leh naungeekte kongzing lakah a sibup uh hi.

¹² Gilkial dangtaakin nu aw, ci-in kapkap uh a, a liam a bai bangin kongzing tengah a tuk pekpak uh hi. Tua bangin damdamin a nute uh ang ah a si uh hi.

¹³ Ka it Jerusalem khuapi aw, bang ci ding ka hi hiam? Bang hong ci hehnep thei ding ka hi hiam? Nang thuak banga thuak kuamah a om kei hi. Na tuahsiatna in tuipi cia pha a, a lamet huai bangmah a om nawn kei hi.

¹⁴ Na kamsangte un zuau thu longal thudang gen ding nei lo uh a, a thu hilhna uh khemna thu bek ahih manin, a khial na hih lam uh a hong hilh tel kei uh hi. Amaute in lam hong lak khial uh a, kisikkik theih na’ng hun a hong pia kei uh hi.

¹⁵ Tua khuapi siatna a mu peuh in awi-in khut a betsan uh hi. A kisia Jerusalem a muh uh ciangin awi-in, a lu uh pei-in a nuihsan uh hi. “Khuapi it huai i cih hih maw, leitung bup kisak theihpih hih khua maw?” ci-in a nui uh hi.

¹⁶ Na galte in hong simmawh uh a, muhdahna tawh a hong siik-et uh hi. “Khuapi susia zo ta hang! I suksiat zawh mateng i cihcih niloh mah hi” ci-in a hagawi uh hi.

¹⁷ Topa in a sehna bangin a tawp khakna ah a hong bawl hi. Sau veipi lai-a a hong hilhkholhsa bangin hong hehpih nawn loin a hong susia hi. Galte gualzawhna pia a, ei hong guallel sak a, amaute a lungdamsak hi.

¹⁸ Jerusalem aw, na kulhpite mahmah Topa tungah kiko sak in! Sun-le-zanin na khitui guntui luang bang sak in. Dahna leh kahna tawh na hun beisak in.

¹⁹ Zanin tho themthum in la, Pasian tungah kiko in. Na tate in hehpihna ngah nadingin na lungsim khempeuh pia in. Kongzing khempeuh ah naupangte puksi khin dektak uh hi.

²⁰ Topa aw hong en in. Na bawlsiat mite hong en dih in. Nupite in a it a tate’ sa uh ne tanghial uh hi. Siampite leh kamsangte in Biakinnpi sung mahmah ah thahna thuak uh hi.

²¹ Khangno leh khanghamte kongzing tengah si uh hi. Galte in nungak tangval teng namsau tawh a thatlum uh hi. Amaute hehpih loin na heh ni-in na thatlum sak hi.

²² Kei hong dipkua sak dingin ka galte pawisiim ding bangin na sam a, amaute in hong umcih uh a, na heh ni-in a suakta zo khat beek a om kei hi. Ka hawmthawh ka it ka tate hong thahsak uh hi.