Joshua 5 - Tedim Bible

Gilgal-ah Vun-atna leh Paisan Pawi

¹ Nitumna lam Jordan gal khat-a om Amor mite’ kumpite khempeuh leh tuipi gei-a om Kanaan mite’ kumpite khempeuh in, Israel mite in a kantan khit mateng amaute adingin Jordan tuite Topa in a kan’sakna thu a zak uh ciangin lungmang uh a, Israel mite hangin a lungsim uh a bei hi.

² Tua hun lai takin Topa in Joshua kiangah, “Meisuang tem bawl in la Israel mite a nihveina vun at kik in,” a ci hi.

³ Tua ahih ciangin Joshua in meisuang tem bawl a, Gibeath-ha-araloth mun-ah Israel mite a vun a at hi.

⁴ Joshua in amaute vun a atna a thu in: Izipt panin hong paikhia pasal galhang mite khempeuh, Izipt panin hong paikhiat khit uh ciangin lamkal gamlakah si khin uh hi.

⁵ Hong paikhia mite khempeuh vun a ki-at khit hangin Izipt panin hong paikhiat khit uh gamlak lamkal-a suak mite khempeuh a vun uh ki-at nai lo hi.

⁶ Bang hang hiam cih leh amaute in Topa thu a ngaih lohna hangin Izipt panin a hong paikhia minam bup, galhang mite a sih khit dong kum sawmli sung gamlakah Israel mite lam pai uh hi; Topa in eite tungah hong piak dingin i pu i pate tungah a ciamsa bawngnawi leh khuaizu a luan’na leitang amaute a muhsak loh nading thu amaute tungah Topa kiciam hi.

⁷ Tua ahih ciangin Joshua in vun a at mite pen, amaute tangin amah in a pian’sak amau tate ahi hi; bang hang hiam cih leh lampi-ah amaute a vun ki-at nai lo ahih manin vun at nai loh ahi uh hi.

⁸ Minam bup vun ki-atna a man khit ciangin giahphual amau mun ciat ah a dam mateng om uh hi.

⁹ Tua ciangin Topa in Joshua kiangah, “Tu ni-in note tung panin Izipt gamah sal suakin na minsiatna uh ka zial khia hi,” a ci hi. Tua ahih ciangin tua mun pen tu ni dongin Gilgal kici hi.

¹⁰ Israel mite Gilgal-a giahphual ah a om sungun tua kha a ni sawm-le-li ni nitakin Jerikho zanglei ah Paisan pawi bawl uh hi.

¹¹ Paisan pawi khit a zingciang ni teekteekin amaute in tua gam-a piang silngo sawhloh moh leh ankan ne uh hi.

¹² Tua gam-a piang a nek ni uh a zing ciangin manna bei ta hi; Israel mite in manna nei nawn lo uh a, ahih hangin tua kumin Kanaan leitang-a piangte a ne uh hi.

Joshua leh a Kidoksa Namsau Tawipa

¹³ Jerikho khua kiangah Joshua a tun’ ciangin a mitte sangsak in khuadak a, en in, a khut sungah namsau dawhsa tawh mi khat a mai-ah na ding hi; ama kiangah Joshua pai-in, “Ko pawl na hi hiam, ahih kei leh ka langte pawl na hi hiam?” a ci hi.

¹⁴ Amah in, “Hi lo hi; Topa’ galkapte a ukpa-in tu-in kong pai hi,” a ci hi. Joshua lei-ah bok sukin bia a, ama kiangah, “Ka Topa in a nasempa bang hong sawl nuam ahi hiam?” a ci hi.

¹⁵ Tua ciangin Topa’ galkapte a ukpa in Joshua kiangah, “Na khe panin na khedapte suah in; bang hang hiam cih leh na din’na mun in a siangtho leitang ahi hi,” a ci hi. Tua mah bangin Joshua gamta hi.