Joshua 21 - Tedim Bible

Levi mite' Khuapite

¹ Tua ciangin siampi Eleazar leh Nun tapa Joshua leh Israel minam beh lutangte kiangah Levi beh lutangte hong pai uh hi;

² amaute in Kanaan gamsung Shiloh munah, “Teen’ nadingin khuapi leh ka ganhingte uh adingin a lononate tawh kote hong kipiak ding Moses tung tawnin Topa in thu pia zo hi,” amaute kiangah ci uh hi.

³ Tua ahih ciangin Topa’ thupiakna tawh Israel mite in amau’ luah nang panin Levi mite tungah anuai-a khuapite leh lonona gamte pia uh hi.

⁴ Kohath behte adingin aisaan hong tung hi. Tua ahih ciangin siampi Aaron’ suan-le-khak ahi Levi mite in Judah, Simeon, leh Benjamin minamte tung panin aisaanna tawh khuapi sawm-le-thum ngah uh hi.

⁵ Tua ciangin a om lai Kohath mite in Efraim minam Dan minam leh Manasseh minam a langte tung panin aisanna tawh khuapi sawm ngah uh hi.

⁶ Gershon mite in Issakhar minam, Asher minamte, Naftali minamte, leh Bashan gam sunga om Manasseh minam a langte tung panin aisaanna tawh khuapi sawm-le-thum ngah uh hi.

⁷ Merari mite in a beh uh tawh kizui-in Reuben minam, Gad minam, leh Zebulun minamte tung panin khuapi sawm-le-nih ngah uh hi.

⁸ Topa in Moses tung tawnin a thupiak bangin hih khuapite leh a lonona gamte Israel mite in aisaanna tawh Levi mite tungah pia uh hi.

⁹ Judah minam leh Simeon minam sung panin amaute in anuai-a min kigen khuapite pia uh a,

¹⁰ Levi mite ahi Kohath beh sung panin Aaron’ suan-le-khakte tungah tung hi; amaute tungah a aii kia masa ahih man hi.

¹¹ Amaute in Judah mualtung gam Kiriath-arba, Arba pen Anak’ pa (Hebron a cihna), a kiim-a lonona gam tawh amau tungah pia uh hi.

¹² Ahih hangin tua khuapi’ lote leh a khua neute pen Jefunneh’ tapa Kaleb tungah a neih dingin kipia khin hi.

¹³ Amaute in siampi Aaron’ suan-le-khakte tungah mithatte’ bukna khuapi Hebron a lonona gamte tawh, Libnah a lonona gamte tawh,

¹⁴ Jattir a lonona gamte tawh, Eshtemoa a lonona gamte tawh,

¹⁵ Holon a lonona gamte tawh, Debir a lonona gamte tawh,

¹⁶ Ain a lonona gamte tawh, Juttah a lonona gamte tawh, Bethshemesh a lonona gamte tawh hih minam nihte sung panin khuapi kua pia uh hi;

¹⁷ tua ciangin Benjamin minam panin Gibeon a lonona gamte tawh, Geba a lonona gamte tawh,

¹⁸ Anathoth a lonona gamte tawh, leh Almon a lonona gamte tawh—khuapi li pia uh hi.

¹⁹ Siampi Aaron’ suan-le-khakte’ khuapite a vekpi-in khuapi sawm-le-thum, a lonona gamte tawh ahi hi.

²⁰ Levi mite sung pan Kohath beh ahi a om lai Kohath mite tungah a kipia khuapite pen Efraim minamte’ aa sung pan ahi hi.

²¹ Efraim mualtung gam-a om mithatte’ ading khuapi Shekhem a lonona gamte tawh, Gezer a lonona gamte tawh,

²² Kibzaim a lonona gamte tawh, Bethhoron a lonona gamte tawh—khuapi li amaute tungah kipia hi;

²³ tua ciangin Dan minam sung panin Elteke a lonona gamte tawh, Gibbethon a lonona gamte tawh,

²⁴ Aijalon a lonona gamte tawh, Gathrimmon a lonona gamte tawh—khuapi li kipia hi;

²⁵ tua ciangin Manasseh minam a langte sung panin Ta-anak a lonona gamte tawh, Gathrimmon a lonona gamte tawh—khuapi nih kipia hi.

²⁶ Kohath mi a om lai behte’ khuapite a vekpi-in a lonona gamte tawh khuapi sawm ahi hi.

²⁷ Tua ciangin Levi beh sunga om Gershon mite tungah, Manasseh minam a langte aa sung panin Bashan gam sunga om mithatte’ adingin bukna khuapi Golan a lonona gamte tawh, leh Be-eshterah a lonona gamte tawh—khuapi nih kipia hi;

²⁸ tua ciangin Issakhar minam panin Kishion a lonona gamte tawh Daberath a lonona gamte tawh,

²⁹ Jarmuth a lonona gamte tawh, Engannim a lonona gamte tawh—khuapi li kipia hi;

³⁰ tua ciangin Asher minam sung panin Mishal a lonona gamte tawh, Abdon a lonona gamte tawh,

³¹ Helkath a lonona gamte tawh, leh Rehob a lonona gamte tawh—khuapi li kipia hi;

³² tua ciangin Naftali minam sung panin Galile gam sunga om mithatte’ adingin bukna khuapi Kedesh a lonona gamte tawh, Hammothdor a lonona gamte tawh, leh Kartan a lonona gamte tawh—khuapi thum kipia hi.

³³ Gershon mite beh tuamtuamte’ khuapite a vekpi-in a lonona gamte tawh khuapi sawm-le-thum ahi hi.

³⁴ Tua ciangin Levi mi a om lai Merari behte tungah, Zebulun minam sung panin Jokneam a lonona gamte tawh, Kartah a lonona gamte tawh,

³⁵ Dimnah a lonona gamte tawh, Nahalal a lonona gamte tawh—khuapi li kipia hi;

³⁶ tua ciangin Reuben minam sung panin Bezer a lonona gamte tawh, Jahaz a lonona gamte tawh,

³⁷ Kedemoth a lonona gamte tawh, leh Mefa-ath a lonona gamte tawh—khuapi li kipia hi;

³⁸ tua ciangin Gad minam sung panin Gilead gam sunga om mithatte’ ading bukna khuapi Ramoth a lonona gamte tawh, Mahanaim a lonona gamte tawh,

³⁹ Heshbon a lonona gamte tawh, Jazer a lonona gamte tawh—a vekpi-in khuapi li kipia hi.

⁴⁰ Levi beh a om lai ahi Merari beh tuamtuamte’ ading khuapi a kipiate a vekpi-in sawm-le-nih ahi hi.

⁴¹ Israel mite’ neihsa lakah Levi mite’ khuapi a vekpi-in a lonona gamte tawh khuapi sawm-le-giat ahi hi.

⁴² Hih khuapite in a kiim ciatah lonona gam nei hi; hih khuapi khempeuh tua bang ahi hi.

Israel in Leitang Ngah

⁴³ Tua bangin Topa in amau’ pate tungah piak dingin a kiciam leitang khempeuh Israel tungah pia hi; amaute in a ngah khit uh ciangin tua lai-ah teeng uh hi.

⁴⁴ Tua ciangin a pu a pate uh tungah a ciamsa bangin Topa in amaute tungah na khempeuhah tawlngakna pia hi; Topa in a galte khempeuh uh amau khut sungah pia ahih manin a galte uh khatbeek in zong amaute nang zo lo hi.

⁴⁵ Topa in Israel mite tungah a ciamsa thuhoih khempeuh khat zong a mawkna om lo hi; a vekpi-in tung kim hi.