Joshua 18 - Tedim Bible

Shiloh-ah Leitang Hawmna

¹ Tua ciangin Israel mihon buppi Shiloh-ah kikhawm uh a, tua lai-ah kikhopna buk lam uh hi; amaute mai-ah gam zawhsa-in om hi.

² Israel mite lakah gamh a kipia nai lo minam sagih om hi.

³ Tua ahih ciangin Joshua in Israel mite kiangah, “Topa, na pu na pate uh Pasian in note hong piaksa leitangah pai-in na luah ding uh bang tanvei zekai ding na hi uh hiam?

⁴ Minam khat panin mi thum ciat hong pia un la, amaute va kuankhia-in vaksuk vakto-in, amaute’ luah dinga ngaihsutna tawh a leitang omziate hong gelhin, tua ciangin kei kiangah hong ciah dingun amaute ka sawl ding hi.

⁵ Amaute in seh sagihin khenin, leitaw lam ama gam mah-ah Judah om suakin, Josef innkuante leilu lam amau’ gamah om ding hi.

⁶ Note in leitang khen sagihin hong ciamteh un la, na ciamtehna uh hih mun kei kiangah nong paipih ding uh hi; tua ciangin keimah in Topa i Pasian’ mai-ah note adingin aai ka saan ding hi.

⁷ Levi mite in note lakah tanh nei lo hi; bang hang hiam cih leh Topa’ siampi nasepna in amau’ luah ahi hi; Gad leh Reuben leh Manasseh minam a langte in Topa’ nasem Moses in amaute tungah a piak ahi, Jordan Nisuahna lam gal khatah amau’ gamh ngah khin zo uh hi,” a ci hi.

⁸ Tua ahih ciangin mite kuan uh hi; leitang a ciamtehna a gelh nadingun Joshua in a pai mite thu pia a, “Vaksuk vakto-in leitang ciamtehna hong gelh un la, kei kiangah hong pai kik un; tua ciangin Shiloh mun Topa mai-ah note adingin aai ka saan ding hi,” a ci hi.

⁹ Tua ciangin mite kuanin gam sungah paisuk paito-in khen sagih suahin tua gam a khua khua-in a ciamtehna uh laibu khat sungah khum uh hi; tua ciangin Shiloh giahphual-a Joshua kiangah amaute hong pai uh hi;

¹⁰ Joshua in amaute’ adingin Topa mai Shiloh-ah aai saan sak hi; tua ciangin Joshua in amau’ tanh ding ciat Israelte tungah leitang pia hi.

Benjamin a Kipia Gam

¹¹ A behbeh tawh kizui-in Benjamin minamte’ ading aisaan hun hong tunga amau’ tungah a kipia gam in Judah minam leh Josef minamte kikalah hong kia hi.

¹² Leilu lamah amau’ gamgi in Jordan panin kipan hi; tua ciangin Jerikho leilu lam liangko-ah paito-in, tua panin mualtung gam nawkin nitumna lamah pai hi; tua ciangin Beth-aven gam lakah tawp hi.

¹³ Tua lai panin gamgi in Luz lam manawhin leitaw lam nawtin Luz (Beth-el a kici) liangko-ah pai hi, tua ciangin Bethhoron Nuainung leitaw lam-a om mualtunga Ataroth-addar khua-ah paisuk hi.

¹⁴ Tua ciangin gamgi mun dang manawhin pai a, Bethhoron galkhat, leitaw lam-a om mual panin nitumna lam pang leitaw lamah kihei a, Judah minamte’ aa ahi Kiriathbaal (Kiriath-jearim a cihna) ah tawp hi. Hih in a nitumna lam pang piangsak hi.

¹⁵ Tua ciangin Kiriath-jearim mong panin leitaw lam pang kipan hi; tua lai panin Efron lam, Neftoah Tuite-ah gamgi pai hi;

¹⁶ tua ciangin Refaim kuam leilu lam monga a om, Hinnom’ tapa’ kuam a kimuhna mual a gamgi-ah pai hi; tua ciangin Jebus mite gam liangko leitaw lam, Hinnom Kuam-ah paisukin, Enrogel-ah paisuk suak hi;

¹⁷ tua ciangin leilu lam manawhin kawi-in, Enshemesh-ah paisuak a, tua lai panin Adummim kahtohna galkhat, Geliloth-ah pai hi; tua ciangin Reuben’ tapa Bohan’ Suangpi-ah paisuk hi,

¹⁸ tua ciangin Beth-arabah gam liangko leilu lamah paisuakin Arabah-ah paisuk hi;

¹⁹ tua ciangin Bethhoglah gam liangko leilu lamah gamgi paisuak hi; tua ciangin Jordan mong leitaw lam, Ci Tuipi dawk leilu lamah gamgi tawp hi; hih in leitaw lam gamgi ahi hi.

²⁰ Jordan in nisuahna lam pang a gamgi piangsak hi. Hih in a beh zui-in a kimkotah a gamgi a gamgi-in Benjamin minam’ luah ahi hi.

²¹ Tu-in amau’ beh tawh kizui-in Benjamin minamte’ khuapite in Jerikho, Bethhogal, Emekkeziz,

²² Beth-arabah, Zemaraim, Beth-el,

²³ Avvim, Parah, Ofrah,

²⁴ Khefarammoni, Ofni, Geba—khuapi sawm-le-nih, a khua neute tawh ahi hi:

²⁵ Gibeon, Ramah, Be-eroth,

²⁶ Mizpeh, Khefirah, Mozah,

²⁷ Rekem, Irpe-el, Taralah,

²⁸ Zela, Haelef, Jebus (Jerusalem a cihna), Gibeah, leh Kiriath-jearim—khuapi sawm-le-li, a khua neute tawh ahi hi. Hih in a beh tawh kizui-in Benjamin minam’ luah ahi hi.