Joshua 17 - Tedim Bible

¹ Tua ciangin Josef tacil ahih manin Manasseh minam tungah tanh kipia hi. Manasseh minam sung pan tacil, Gilead’ pa Makhir tungah Gilead gam leh Bashan gam kipia hi; bang hang hiam cih leh amah galhang mi ahi hi.

² Tua ciangin Manasseh minam a om laite, Abiezer, Helek, Asriel, Shekhem, Hefer, leh Shemida-te tungah a behbehin piakna kibawl hi; hihte pen Josef tapa Manasseh’ ta pasal suan-le-khakte a behbeh ahi hi.

³ Ahih hangin Manasseh’ tapa Makhir, a tapa Gilead, a tapa Hefer, a tapa Zefehad in tapa nei loin tanu bek nei hi; a tanute’ min in: Mahlah, Noah, Hoglah, Milkah, leh Tirzah ahi hi.

⁴ Amaute siampi Eleazar leh Nun tapa Joshua leh makaite mai-ah pai uh a, “Ka sanggamte uh tawh gamh hong piakna dingin Topa in Moses thu pia hi,” a ci uh hi. Tua ahih ciangin Topa' thupiakna bangin amau’ pate’ sanggamte tawh amah in gamh pia khawm hi.

⁵ Tua ahih ciangin Jordan gal khatah Gilead leh Bashante simloh Manasseh tungah tanh sawm kia hi;

⁶ bang hang hiam cih leh Manasseh’ tanute in a tapate tawh gamh ngah khawm uh hi. A om lai Manasseh mite tungah Gilead leitang kipia hi.

⁷ Manassehte’ gam in Asher panin Shekhem nisuahna lamah a om Mikmethath dong ban hi; tua ciangin Entappuah mite’ leitaw lamah gamgi pai hi.

⁸ Tappuah leitang in Manasseh’ aa ahi hi; ahih hangin Manasseh gamgi-a om Tappuah khuapi in Efraim tapate’ aa ahi hi.

⁹ Tua ciangin Kanah lui-ah gamgi paisuk hi. Manasseh khuapite lak panin lui leitaw lam-a om hih lai-a khuapite pen Efraim’ aa ahi hi. Tua ciangin lui leilu lam pangah Manasseh gamgi paisuakin tuipi-ah tawp hi;

¹⁰ tua gam leitaw lam in Efraim’ aa hi-in, a leilu lam in Manasseh’ aa hi a, tuipi in a gamgi ahi hi; leilu lamah Asher banin nisuahna lamah Issakhar ban hi.

¹¹ Issakhar leh Asher gam sungah zong Manasseh in Bethshean leh a khua neute, Ibleam leh a khua neute, Dor-a teengte leh a khua neute, Endor-a teengte leh a khua neute, Ta-anak-a teengte leh a khua neute, leh Megiddo-a teengte leh a khua neute nei hi; a thumna in Nafath ahi hi.

¹² Ahi zongin Manasseh’ tapate in hih khuapite luah zo lo uh hi; Kanaan mite tua gamah teeng teitei uh hi.

¹³ Ahih hangin Israel mite tampi pha-in a hat uh ciangin amaute in Kanaan mite nasemin koih uh a, hawl khia mang khin lo uh hi.

¹⁴ Tua ciangin Josef minam in Joshua kiangah thu genin, “Topa in kote thupha hong pia khin a, kote in mi tampi hi napi-in bang hangin ngah khat leh tanh khat bek gamh-in hong pia na hi hiam?" a ci uh hi.

¹⁵ Tua ciangin Joshua in amaute kiangah, “Note mi tampi pha a, Efraim mualtung gam in note’ adingin neu lua ahih ciangin Perez leh Refaim gam tulakah pai un la, nomau’ ading gam vat tawm un,” a ci hi.

¹⁶ Josef minam in, “Kote' adingin mualtung gam kicing hi; ahi zongin zang gam-a teeng Kanaan mite khempeuh, Bethshean leh a khua neute, leh Jezre-el Kuam sunga omte in sik leeng nei uh hi,” a ci uh hi.

¹⁷ Tua ciangin Joshua in Josef suan Efraim leh Manasseh mite tungah, “Note mi tampi pha-in na vanglian uh hi; tanh khat kia na nei kei ding uh hi;

¹⁸ mualtung gam in note’ aa hi ding a, tulak ahih hangin note in hah siangin a gamgi mong dong na luah ding uh hi; bang hang hiam cih leh amaute in sik leeng nei-in, amaute a thahat hangin Kanaan mite na hawlkhia zo ding uh hi,” a ci hi.