Joshua 16 - Tedim Bible

Efraim leh Manasseh a Kipia Gam

¹ Josef suan-le-khakte’ tanh in Jerikho tuite’ nisuahna lam, Jerikho kiang Jordan panin sehnel gamah pai a, Jerikho panin mualtung gamte tawnin Beth-el ah paito hi;

² tua ciangin Beth-el panin Luz-ah pai-in, Arkhi mite gam Ataroth nawk hi;

³ tua ciangin nitumna lam Jaflet mite gam lam Bethhoron a niam lam gam ciang dongah paisuk hi, tua ciangin Gezer-ah pai-in tuipi-ah tawp hi.

⁴ Josef suan Manasseh, leh Efraim mite in amau’ gamhluah ngah uh hi.

⁵ Amau' behbehin Efraim mite’ gam in anuai-a bang ahi hi: nisuahna lamah amau’ gamh gamgi in Ataroth-addar, Bethhoron tungnung ciang ahi hi;

⁶ tua panin tuipi ciangah gamgi pai hi; leilu lamah Mikmethath ahi hi; tua ciangin nisuahna lam gamgi Ta-anathshiloh lamah kual pai-in, nisuahna lam a gal khatah pai-in Janoah tung hi;

⁷ tua ciangin Janoah panin Ataroth leh Na-arah-ah paisuk a, Jerikho ban-in Jordan-ah tawp hi.

⁸ Tappuah panin nitumna lam Kanah lui-ah gamgi pai-in, tuipi-ah tawp hi. Tua in amau’ behbehin Efraim mite’ gamhluah hi a,

⁹ Manasseh mite’ gamluah sung panin Efraim mite’ adingin a kikhen khia khuapite, a khua neute tawh ahi hi.

¹⁰ Ahi zongin amaute in Gezer sunga teeng Kanaan mite hawl khia lo uh hi: tua ahih ciangin tu ni dongin Kanaan mite in Efraim mite lakah teeng a, ahih hangin aana nasep a sem dingin sal suak uh hi.