Jonah 3 - Tedim Bible

Nineveh Khua A Kisikkikna

¹ Tua ciangin Topa in Jonah tungah a nih veina thu gen a,

² “Kithawi in la, a lian mahmah Nineveh khuapi-ah va pai-in kong gen sa thu va tangko in,” a ci hi.

³ Jonah zong kithawi pah-a Topa’ cih bangin Nineveh khua-ah a pai hi. Nineveh khua pen khuapi lian mahmah khat hi a, nithum sung tak kikantan hi.

⁴ Jonah zong khua sung lam manawh-in kipan-a, nikhat sung lam a pai khit ciangin, “Ni sawmli khit ciangin Nineveh khuapi a kisusia ding hi,” ci-in a kiko hi.

⁵ Nineveh khuamite in kisik kik-in Pasian a um uh a, antan’ nading thu thang sakin, a golpen pana kipan a neupen dongin ippi puan a silh uh hi.

⁶ Nineveh khua kumpipa in tua thu a zak ciangin a kumpi tokhom tung pan ding khia-in, a kumpi puan suah khia-a, ippi puan silhin vut lakah a tu hi.

⁷ Tua ciangin amah in Nineveh khua sung khempeuh thu thang sak-in a tangko sak a, “Kumpipa leh uliante’ thu tawh: Mihing ahi-a ganhing ahi zongin, bawng hon ahi-a tuu hon ahi zongin, bang mah ciam thei lo ding, an ne thei lo ding, tuidawn thei lo ding uh hi.

⁸ Mihing leh ganhingte in ippi puan silhin Pasian tungah nakpi-in kiko ta uh hen. Hi hi, mi khempeuh in a khialhnate uh leh a gitlohnate uh panin kihei ta uh hen.

⁹ Eite i sih loh nadingin Pasian kisik kik-in a hehna damsak lo ding hi, kua in ci thei na hi uh hiam?” a cisak hi.

¹⁰ Pasian in amau’ hihnate mu a, a khialhnate uh panin a kihei uh a muh ciangin kisik kik a, amaute tungah hih dinga a cihsa siatna a tungsak nawn kei hi.