Jonah 2 - Tedim Bible

Jonah’ Lungdam Kohna

¹ Tua ciangin Jonah in tua ngapi gil sung panin Topa a Pasian’ kiangah thu ngen a,

² “Ka cihmawhna panin Topa ka sam a, amah in hong dawng hi; Sihna gam Sheol panin ka kiko-a, nangmah in ka aw nong za hi.

³ Nang in tuipi thuk sungah nong khia-a, tui in kei hong tumcip hi; na tuihualte khempeuh in kei hong tum hi.

⁴ Tua ciangin keimah in, ‘Na omna panin kei hong kihawl khia hi; na biakinn siangtho hong koici et kik thei ding ka hi hiam?’ ka ci hi.

⁵ Tui in ka tungah hong tuamcip a, ka kimkot-ah hong umcih hi. Tuipi tunga lopate in ka lu hong vialcip hi.

⁶ Mualte’ bul tuipi taw dong ka va pai suk a, kongkhak hong kikhak nelh tawntungna mun ka tun’ hangin tua lei sung Hawmpi sung panin a nungta-in nong la to veve hi, Topa, ka Pasian aw,

⁷ Kei ka lung a kiat ciangin, Topa ka phawk a; ka thungetna, na biakinn siangtho sung, nangma kiang hong tung hi.

⁸ Kiman’na nei lo milim a biate in nangmah hong tai san uh hi.

⁹ Ahih hangin keimah in ka hih leh lungdamna aw tawh biakna kong pia ding hi; ka ciamsa ka tangtung sak ding hi. Gupkhiatna in Topa’ aa ahi hi!” a ci hi.

¹⁰ Tua ciangin Topa in tua ngapi sawl a, amah in lei keu tungah Jonah a luakhia hi.