Johan 11 - Tedim Bible

Lazaras’ Sihna

¹ Mari leh a sanggamnu Martha omna Bethani khua-ah Lazaras kici mi khat cina-in a om hi.

² Cinapa Lazaras’ sanggamnu Mari in Zeisu’ khe sathau nuh a, a sam tawh a nulsaknu hi.

³ Tua hi a, a sanggamnute in Zeisu kiangah mi sawl uh a, “Topa aw, na itpa cina-in a om hi,” ci-in a ko uh hi.

⁴ Zeisu in tua thu a zak ciangin, “Hih cinatna in sih nading natna ahi kei hi. Pasian’minthan’ nading leh Pasian’ Tapa’ minthan’na a kilah nading hi,” a ci hi.

⁵ Zeisu in Martha, a sanggamnu leh Lazaras a it hi.

⁶ Tua ahih ciangin Lazaras’ cinat thu a zak ciangin pai loin ama omna munah ni nih a om lai hi.

⁷ Tua nung ciangin, “Tu-in Judah gam lamah pai kik ni,” ci-in a nungzuite kiangah a gen hi.

⁸ A nungzuite in, “Rabbi aw, Judah mite in tu nangawnin nang suang tawh deen’ dingin hong zong uh ahih ciangin, tua lam pai kik ding na hi hiam? a ci uh hi.

⁹ Zeisu in, “Nisuah leh nitum kikal nai sawm leh nai nih pha hilo ahi hiam? Mi khat in sun lai takin a pai leh, leitung khuavak a muh maninah a kipuk thei kei ding hi.

¹⁰ Ahih hangin mi khat in khuamial lai takin a pai leh, ama sungah khuavak om lo ahih ciangin a puk thei hi,” a ci hi.

¹¹ Tua thu amah in gen a, tua nung ciangin Zeisu in, “I lawmpa Lazaras ihmu-in a om hi. A phong dingin ka pai ding hi,” a ci hi.

¹² A nungzuite in, “Topa aw, a ihmut leh, a nuamtuam ding hi,” a ci uh hi.

¹³ Zeisu in Lazaras’ sihna thu a gen hangin a ihmu taktak a cihna bangin a nungzuite in a ngaihsun uh hi.

¹⁴ Tua ahih ciangin Zeisu in, “Lazaras a si zo hi,

¹⁵ note in na up nadingun tuasan takah om lo ka hih ciangin ka lungdam hi. Ahih hangin tu-in ama kiangah va pai ni,” ci-in a tel gen hi.

¹⁶ Didimas kici Thomas in nungzui a lawmte kiangah, “Ei zong Topa tawh sihna thuakkhawm dingin pai ni,” a ci hi.

Zeisu, Thawhkikna Leh Nuntakna

¹⁷ Zeisu a tun’ ciangin Lazaras han sungah ni li a pha zo hi ci-in a thei hi.

¹⁸ Bethani khua in Jerusalem khua tawh tai nih dektak a kigamla hi.

¹⁹ Martha leh Mari’ sanggampa si ahih ciangin, a hehnem dingin Judah mite tampi a hong pai uh hi.

²⁰ Zeisu hong paina thu Martha in a zak ciangin a dawn dingin a pai hi. Mari ahih leh, inn sungah tu-in a om lai hi.

²¹ Martha in, “Topa aw, nang om lecin ka sanggampa a si kei ding hi.

²² Tu nangawnin Pasian kiangah na nget khempeuh Pasian in hong pia ding cih ka thei hi,” a ci hi.

²³ Zeisu in, “Na sanggampa a thokik ding hi,” a cih ciangin

²⁴ Martha in, “Ni tawp Ni-a thawhkikna-ah a thokik ding cih ka thei hi,” a ci hi.

²⁵ Zeisu in, “Keimah in thawhkikna leh nuntakna ka hi hi. Kei hong umte in a sih hangin a nungtakik ding hi.

²⁶ Kei hong um a nungtate in zong cikmah ciangin a si ngei kei ding hi. Hih thu na um hiam?” ci-in a dot ciangin,

²⁷ amah in, “Ka um hi, Topa aw, Leitungah hong pai ding Pasian’ Tapa Khazih na hih ka um hi,” a ci hi.

Zeisu Kap

²⁸ Tua bang a cih khit ciangin Martha ciah a, a sanggamnu kiangah, “Sia hong tung zo a, nang hong sam hi,” ci-in a ko sim hi.

²⁹ Tua thu a zak ciangin Mari thakhatin tho a, Zeisu va dawn hi.

³⁰ Tua lai takin Zeisu khua sungah a lut nai kei hi; Martha’ dawnna munah a om lai hi.

³¹ Tua ciangin dahna hehnem dinga inn sungah Mari tawh a omkhawm Judah mite in, amah tho meengmeenga a paikhiat a muh uh ciangin, amah kap dingin hanah a pai ding hi ci-in a nung a zui uh hi.

³² Tua ahih ciangin, Mari in Zeisu omna munah tung a, Topa a muh ciangin a khe mai-ah bokin, “Topa aw, nang om lecin ka sanggampa a si kei ding hi,” a ci hi.

³³ Mari akipan amah tawh hong paikhawm Judah mite a kap uh Zeisu in a muh ciangin, a sin sungah khuisa-a lungmangin,

³⁴ “Koiah, na vui uh hiam?” ci-in a dot leh, “Topa, hong pai in la, hong en in,” a ci uh hi.

³⁵ Zeisu a kap hi.

³⁶ Tua ahih ciangin Judah mite in, “En un, amah in bangzah takin Lazaras a it hiam!” a ci uh hi.

³⁷ Amaute lakah mi kimkhatte in, “Mittawpa khua a musak thei hih pa in hih mi zong a sih loh nadingin bawl thei lo ahi hiam?” a ci uh hi.

Lazaras A Nungta-in Kipaikhiasak

³⁸ Tua ciangin Zeisu in a sungah khuisa kawmin hanah a pai hi. Tua han in leihawm hi a, suang tawh a kisin hi.

³⁹ Zeisu in, “Suang lemkhia un,” a ci hi. Misipa’ sanggamnu Martha in, “Topa aw, tu-in ahih leh, a uih zo ding hi. Bang hang hiam na cih leh, ni li pha zo hi,” a cih leh,

⁴⁰ Zeisu in, “Nang na up leh, Pasian’ minthan’na na mu ding hi, hong ci zo hilo ka hi hiam?” a ci hi.

⁴¹ Tua ahih ciangin amau in suang a lemkhia uh hi. Zeisu dakto a, “Pa aw, nang in keima thu hong ngai na hih ciangin na hehpihna ka phat hi.

⁴² Nang in keima thu nong ngai niloh cih ke’n ka thei hi. Ahih hangin kei na hong sawl ka hih hong um mihonpite in a up nadingun, amau ading tua thu ka gen hi,” a ci hi.

⁴³ Tua bang a cih khit ciangin, “Lazaras aw, hong paikhia in,” ci-in nakpi-in a kiko hi.

⁴⁴ A sipa in a khut a khe han puan tawh kitun a, a maitang dial tawh kitunin a paikhia hi. Zeisu in, “Amah phel un la, na khahkhia un,” a ci hi.

Zeisu A Kisawmna

⁴⁵ Tua ahih ciangin Mari kiangah hong pai Judah mi tampite in Zeisu’ bawlna a muh uh ciangin a um uh hi.

⁴⁶ Ahih hangin kimkhat ahih leh, Farisaite kiangah a pai uh a, Zeisu bawlna thu khempeuh a zasak uh hi.

⁴⁷ Tua ahih ciangin siampi liante leh Farisaite in upa vaihawmte kikhawmsak uh a, “Eite in bangci hih ding i hi hiam? Hih mi in nalamdang tampi a lak hi.

⁴⁸ Hih mi i koihkhong leh, mite khempeuh in amah a um ding uh a, Rom mite hong pai-in eite omna gam ahi zongin, eite pawl ahi zongin hong susia ding uh hi,” a ci uh hi.

⁴⁹ Amau lakah mi khat, tua kum siampi ukpa ahi Kai-afas in, “Note in bangmah na thei kei uh hi.

⁵⁰ Mi tampi tangding mi khat hong sih leh, Judah mite a kisiat sangin a pha zaw ci-in ngaihsun lo na hi uh hiam?” a ci hi.

⁵¹ Tua bang a cihna in ama ut thu gen ahi kei hi. Tua kumin amah siampi ukpa ahih ciangin, Zeisu in mite tangding a si ding tham loin,

⁵² mun khempeuh ah a kikhenthang Pasian’ tate a kikhawm kiksak dingin a si ding hi,” ci-in kamsangpa bangin a gen hi.

⁵³ Tua ahih ciangin tua ni-a kipan Zeisu a thah nadingun amaute kikumin a vaihawm uh hi.

⁵⁴ Tua ahih ciangin Judah mite lakah a kilangin Zeisu a pai nawn kei hi. Tua mun panin paikhia-in, gammang tawh kinai Efraim kici khua-ah pai a, a nungzuite tawh a omkhawm hi.

⁵⁵ Judah mite’ Paisan pawikham ding nai a, mi tampi in a kisian’thosak nadingun Paisan pawi ma-in gam khempeuh panin Jerusalem khua-ah a paito uh hi.

⁵⁶ Tua ahih ciangin, tuate in Zeisu zong uh a, “Bangci na ngaihsun uh hiam? Amah pawikhamna sungah hong pai lo ding hi ci-in na um uh hiam?” ci-in biakna innpi sungah ding-in a kidong uh hi.

⁵⁷ Siampi liante leh Farisaite in Zeisu’ omna mun a thei a om leh, amaute in a mat theih nadingun hong hilh ta hen, ci-in tua lai takin lai a hawm uh hi.