Joel 3 - Tedim Bible

Minamte’ tungah Topa ’ Thukhenna

¹ “Tua hun ciangin Judah leh Jerusalem, a nidang hun uh ka bangsak kik ding hi.

² Minam khempeuhte kaikhawmin, Jehoshafat Kuam-ah ka paipih ding hi. Ka mihingte tungah a bawlnasa hangun, tua munah amaute thu ka khen ding hi. Amaute in Israel mite, gamdangah thehthang uh a, ka gamsung teng phelhawm uh hi.

³ A gal matte uh kua in ngah ding, ci-in ai saan uh a, zu leh numei lei nadingin, numeino leh naupangnote, sila-in zuak uh hi.

⁴ “Tai-ar khua, Sidon khua, leh Filistia gam khempeuh aw, kei bang hong cih nuam-a kinei na hi uh hiam? Bang khat peuh hangin hong thukkik nuam-a kinei na hi uh hiam? Kei a hong thukkik na hih leh, kei zong manlang takin kong thukkik pah ding hi.

⁵ Ka ngun, ka kham, leh ka na manpha tampite la-in, na biakinn sung uhah na puak uh hi.

⁶ Judah leh Jerusalem mite, amau’ gam panin gamlapi-ah paipihin, Grik mite tungah na zuak uh hi.

⁷ Tu-in amaute na zuakna uh mun, panin a la khia kik ding ka hi a, amaute tungah na bawl bangun note tungah kong bawl ding hi.

⁸ Na tanute uh leh na tapate uh, Judah mite tungah ka kizuaksak ding a, a gamlapi-a om Seba minamte tungah kizuak ding uh hi. Bang hang hiam cih leh Topa in gen khin zo hi,” a ci hi.

⁹ Minamte tungah hih bangin thuzaksakna bawl in: Gal hang mite sam un la, gal do dingin kithawi un la, galkap khempeuh khawmin hong kuan un!

¹⁰ Lo khawhna tuute namsau-in seek un la, singhiang heuhna temkawite teipi-in seek un. A thanemte in “Ka tha a hat hi” ci ta uh hen.

¹¹ Kiimkot-a om minamte khempeuh aw, manlangin hong kuan un la, tua kuam-ah hong kikaikhawm un. Topa aw, na galhangte hong paipih suk in.

¹² Minamte hong kithawi hen la, Jehoshafat Kuam-ah hong kuansuk uh hen. Kiimkot-a om minam khempeuhte’ thu khen dingin, Topa ahi keimah, tua munah ka tu ding hi.

¹³ Amaute gilo mahmah uh ahih manin, anlak huna buh at bangin at gawp un la, leenggahtui dawhna dim letin a luang leenggah cilna kuang sunga om leenggah bangin, tuancil gawp un.

¹⁴ Thukhenna Kuam-ah, a tul a thenin om uh hi. Bang hang hiam cih leh, tua lai munah Topa’ ni hong tung baih ding hi.

¹⁵ Ni leh kha mial a, aksite zong taang nawn lo hi.

Judah A Kihotkhiatna

¹⁶ Zion Mual panin Topa hong hawk suk a, Jerusalem panin hong awngkeek a, vanpi leh leipi liing damdam hi. Ahi zongin Topa in, ama mite’ belhpa hi a, Israel mite’ munmuanhuai ahi hi.

¹⁷ Tua ciangin Israelte aw, ka mual siangtho Zion tungah a teeng keimah in, Topa, note’ Pasian ka hihna na thei ding uh hi. Jerusalem in a siangtho biakna khuapi hi ding a, gamdang mite in zo kik ngei nawn lo ding uh hi.

¹⁸ Tua hun ciangin mual tung gam khempeuh leenggui lo hi ding a, mual neute khempeuh tungah bawng nawi luang ding a, Judah gam sung khempeuhah tui tampi om ding hi. Topa’ biakinn panin lui tui khat hong luang khia ding a, Shittim kuam khempeuh kawtsak ding hi.

¹⁹ Amaute in Judah gam simin, mawhnei lo mite that uh ahih manin, Izipt gam in sehnel gam suakin, Edom gam in gamsia suak ding hi.

^20-21 A kithat mite’ phu ka la ding a, a mawhte ka khahkhong kei ding hi. Judah gamah mi teeng tawntung ta ding a, Jerusalem ah a khang khangin mi om tawntung ding a, Zion Mual-ah Topa teeng ding hi.