Jeremiah 5 - Tedim Bible

Jerusalem leh Judah’ Mawhnate

¹ Jerusalem khua sungah kileh kawikawi un. Khuadak un la, en dih un! A thuman gamtat leh thuman a zong mi khat beek na mu uh hiam, zong dih un. Na muh uh leh tua khua a mawhna ka maisak ding hi.

² “Topa a nuntak bangin,” ci-in a kiciam uh hangin a zuaupi uh ahi hi.

³ Topa aw, nangmah in thuman en gige hilo na hi hiam? Nangmah in amaute na sat hangin a awlmawh tuan kei uh hi; na sukgawp hangin na thu hilhna a ngai tuan kei uh hi. Amaute’ maitang suangtum sangin sakzaw a, a kisik nuam kei uh hi.

⁴ Tua ciangin keimah in, “Hih mite mihai hi a, a hehpih huai uh hi: Topa’ lampi thei lo uh a, amau’ Pasian’ deihna a thei kei uh hi.

⁵ Mi liante’a kiangah pai-in, ka va kiho ding uh hi; amaute in Topa’ lampi a thei uh a, amau’ Pasian’ deihna a thei uh hi,” ci-in ka ngaihsun hi. Ahih hangin a vekpi-in ka ukna hong nial khin uh a, ka hakkol kuaitan-in ka henna khaute a sutat khin zo uh hi.

⁶ Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

⁷ “Na mawhna uh hong koici maisak ding ka hi hiam? Na tate un kei hong nusia zo uh a, pasian ahi lopi peuh tawh kiciam zo uh hi. Amaute a gilvah dong uh an ka vak khit ciangin, ang kawmin numei paktatte’ innah a hon om uh hi.

⁸ Sakol gilvah a lante bangin a innvengte’ zite uh neh-in a tau huthut uh hi.

⁹ Hih thute hangin amaute daantat lo ding ka hi hiam? Topa in ka gen-inah, hi ci bang minam’ tungah thukkik lo ding ka hi hiam?

¹⁰ “A gual-a a kisuan a leenggah huan sungah pai in la, suksiat sak in; ahi zongin suk maimangsak sam kei in. A hiangte heuh khiatsak in, bang hang hiam cih leh tuate Topa’ aa hi lo hi.

¹¹ Israel minamte leh Judah minamte, Topa in ka cih-inah, kei tungah hong thuman nawn het lo uh hi.

¹² Amaute in Topa hong nial uh a, ‘Amah in bangmah hih lo ding hi; i tungah siatna hong tung lo ding a, gal ahi zongin kial ahi zongin i thuak kei ding hi.

¹³ Kamsangte lah huih bang hi lel uh a, a sung uhah thu teeng lo hi. Amau’ gen bangun amau mah in a thuak ding uh hi,” a ci uh hi.

¹⁴ Tua ahih manin Topa, a vanglian Pasian in hong gen-inah: “Amaute in tu-a bangin gen uh ahih manin na kam sunga mei banga ka kuan’sak ka thute in sing tawh kibang hih minamte kangtum zaw ding hi.

¹⁵ En un, Israel minamte aw, Topa in kong cih-inah, gamlapi panin note hong sim dingin gam khat kong kuansak ding hi. Tua gam in tanglai peka a om sa, a hat mahmah, amaute’ pau na theih loh uh gam khat ahi hi.

¹⁶ Thal tawh a kap uh ciangin sisak lianlian uh a, a vekpi-in gal hang kim uh hi.

¹⁷ Amaute in lo-a na ante leh na an huante uh hong gaihsak ding uh a, na tapate leh na tanute uh hong thahsak ding uh hi. Na tuu honte leh na bawng honte uh hong gaihsak ding uh a, na lenggahte leh na thei gahte uh hong nek mangsak ding uh hi. Na muan’ mahmah kulhpi tawh a ki-uum na khuapite uh, namsau tawh hong suksiat sak ding uh hi.”

¹⁸ “Ahih hangin tua bang hun ciang nangawnin, Topa in kong cih-inah, note kong su maimang khin sam kei ding hi.

¹⁹ Na mipihte un, ‘Bang hangin Topa i Pasian in hih bangin ei’ tungah hong bawl hiam? a cih uh ciangin nangmah in, ‘Topa nusia-in na gam sung uhah gamdang pasiante’ na na sep uh bangin, note’ gam ahi lo gam dangah, gamdang mite’ na na sem ding uh hi,’ na ci ding hi,” hong ci hi.

²⁰ Jakob’ suante tungah gen in. Judah mite tungah hih bangin ci in:

²¹ “Ngai un, ngaihsutna nei lo mihaite aw, mit nei napi-a mu lote, bil nei napi-a za lote aw.

²² Kei hong kihta lo na hi uh hiam? Topa in kong ci hi. Ka mai-ah liing lo na hi uh hiam? Tuipi mongah sehnel keima’ koih hi-a, tui ka dal sak tawntung hi. Tuihualte in a lawhlawh hangin zozo lo uh a, a gin’ zuazua uh hangin kantan zo tuan lo uh hi.

²³ Ahih hangin hih mite lungsim khauhin hong langpan’ zen uh hi; hong kihei san uh a, hong paisan uh hi.

²⁴ A lungsim sung uhah, ‘A hun-a guah hong zusak a, tukguah khalguah hong pia a, anlak hun ding a hong sehsak den, Topa i Pasian zaktak ni,’ a ci kei uh hi.

²⁵ Na khialhnate un hih na hoihte khaktan a, na mawhnate hangun tuate na taan lawh uh hi.

²⁶ Ka mite lakah mi gilote kihel uh a, vasa thang siah bangin mite thang siah-in man uh hi.

²⁷ Bawm sung dimtak a, vasa kikhum bangin khemna tawh a ngah uh vante tawh a inn uh dim hi. Tua ahih manin amaute lianin hau uh a,

²⁸ thau-in a mai uh zol hi. Gitlohna lamah a hun bek a theithei kei uh hi. Tagahte’ phattuam nading khual loin thu a man lo pi-in khen uh a, mizawngte tungah thuman lo uh hi.

²⁹ Hih thute hangin amaute daantat lo ding ka hi hiam? Topa in ka ci hi. Hih bang minam’ tungah thukkik lo ding ka hi hiam?”

³⁰ A dipkuat huai, a patauh huai thu khat gam sungah a piang khin zo hi.

³¹ Kamsangte in thuman gen lo uh a, siampite in amau’ ut bangun a uk uh hi; ka mite in phamawh a sa kei sawnsawn uh hi, a tawpna hun hong tun’ ciangin bang na cih ding uh hiam?