Jeremiah 48 - Tedim Bible

Moab Gam Tawh Kisai Genkholhna

¹ Moab gam tawh kisai-in a vanglian Topa, Israel mite’ Pasian in a gen-inah: “Nebo mite in gimna a thuak ding uh hi, bang hang hiam cih leh a gam uh a kisia ding hi. Kiriathaim khua kila khin zo a, a kulhpite uh cim khin hi. A mite in maizumna thuak uh a,

² Moab gam minthan’na bei ta hi. Heshbon khua-ah a galte un a sim nading uh a vaihawm uh a, ‘Hong pai un, Moab gam i beimang sak ding hi,’ a ci uh hi. Madmen khua aw, nang zong na gamdai ta ding hi. Namsau in nang hong nungdelh ding hi.

³ “Ngai dih un! Horonain khua-ah mi kiko veh! ‘Ngongtatna leh siatna lianpi!’ ci uh hi.

⁴ Moab gam kisusia khin ta a, a kahna aw uh Zoar khua dongin kiza hi.

⁵ Luhith mual kahtohna lampi-ah, a pai kawm-un a kap uh hi. Horonain khua-ah a tuahsuk laitakun khuapi sia-a a kikona aw uh a za uh hi.

⁶ ‘Tai un! Na suahtak nadingun tai un! Sehnel gam a, gamlak laate bangin taimang un!’ a ci uh hi.

⁷ Na hatnate uh leh na neihsate uh na suan’ manun note zong hong kipai khiatpih ding hi. Na pasian uh Khemosh zong a siampi teng leh a ulian teng tawh, kipai khiatpih ding hi.

⁸ Khua khempeuh kisia khin ding a, khat beek a suakta kei ding hi. Topa in ka gen sa bangin, mualkuam leh zangleite a kisia ding uh hi.

⁹ Moab mite a leen’ khiat theih nadingun vasa’ kha pia un. A khuapite uh gamlak suak ding a, kuamah a teeng kei ding hi.

¹⁰ “Topa’ na citak-a sem lopa in haamsiatna thuak ta hen. Thah nading a, a namsau a dok lopa in haamsiatna thuak ta hen.

¹¹ “Moab gam in a neu lai-a kipanin nuam takin a om den hi. Gam dangah kipaikhiatpih ngei lo a, thawl khat pan thawl khat-a tei kawikawi lenggahzu tawh kibang lo hi. A limna kilamdang ngei loin a gimnam zong kikhel ngei lo hi.

¹² “Tua ahih manin, en un, Topa in kong cih-inah, Moab mite leenggahzu buak banga a bua khia ding mi kong paisak hun hong tung ding hi. Amaute in a thawl a hawm dong bung khia-in tua khit ciangin thawl a sukham zan ding uh hi.

¹³ Tua ciangin Israel mite, a muan’ uh Bethel pasian in a maizum sak mah bangin, Moab mite, a biak uh Khemoshpasian in a maizum sak ding hi.

¹⁴ “Note in bang hangin, ‘Galhangte ka hi uh a, galsim hatte ka hi uh hi,’ ci thei na hi uh hiam?

¹⁵ Moab gam leh a khuapite susia dingpa hong paito ta hi. A tangval hoihpente uh thahlup dingin a kipaipih khin zo hi, ci-in a vanglian Topa a kici keimah Kumpipa in kong gen hi.

¹⁶ Moab gam kisiat ding sawt nawn lo hi; a gim nading hong nai ta hi.

¹⁷ A kim-a teengte leh a min a thei mite aw, Moab gam kah un. ‘A minthan’na bei khin ta a, a vangliatna kumpi ciangkhut kitan ta hi,’ ci un.

¹⁸ “Dibon khua-a teeng mite aw, na minthan’na mun sang panin hong kumsuk un la, leivui lakah hong tu un! Bang hang hiam cih leh Moab gam hong sim dingte hong pai-a na kulhte uh hong suksiatsak zo uh hi.

¹⁹ Aroer khua-a teeng mite aw, lam geiah dingin na en un! A hong galtai numei leh pasalte kiangah, ‘Bang thu piang ahi hiam?’ ci-in dong un.

²⁰ Moab gam kisia khin zo hi, zumhuaina thuak khin zo hi. Thuum un la, kah un! Arnon gun dungah, Moab gam kisiatna thu va gen un.

²¹ “Pasian’ thukhenna mualtung gam teng leh Holon khua, Jahzah khua, Mefa-ath khua,

²² Dibon khua, Nobo khua, Bethdiblathaim khua,

²³ Kiriathaim, Bethgamul khua, Bethmeon khua,

²⁴ Kerioth khua leh Bozrah khua-a kipan Moab gam sung a gamla, a nai-a om khuapi khempeuh ah hong tung zo hi.

²⁵ Topa in kong cih-inah, Moab gam’ hatna teng bei khin ta hi. A ki ki-at tansak a, a ban kikuaihtansak hi.

²⁶ “Moab, zukham sak un, bang hang hiam cih leh amah in Topa langpanin kiliansak hi. Tua ahih manin amah in ama’ luak lakah a bual ding a, mi khempeuh in awi-in a nuihsan ding uh hi.

²⁷ Moab aw, nang zong Israel mite nuihsan hilo na hi hiam? Ama’ thu na gen simin na lu na sin’sin’, amah guta sa na hi hiam?

²⁸ “Moab gam a, teeng mite aw, khuapite nusia un la, kawl lakah teeng un! Ken pang-a vakhu bu bawl bangin va om un.

²⁹ Moab kiphatsakna ka za khin zo uh hi—kiphasak pha mahmah hi. Kilian sak-in kisathei a, kuamah thu sim loin mite neu-et hi.

³⁰ Ama’ hehna ka thei a, a kisialhna teng zuaupi hi-in, a sepna teng zong zuaupi ahi hi, Topa in kong ci hi.

³¹ Tua ahih manin Moab adingin ka tau hi; Moab gam mi khempeuh adingin ka kap a, Kirheres khua adingin zong ka thuum hi.

³² Sibmah khua aw, Jazer khua ading sangin nang’ adingin ka nak kah zaw hi. Nang in leenggah gui zam bangin na hiangte in tuipi kantan a, Jezer khua dongah na zamsuak hi. Na khuakhal ante na leenggah gahte hong kisuksiat sak ta hi.

³³ Lei hoih mahmah Moab gam panin lungdamna leh kipahna kila khia ta hi. Leenggah cilna panin leenggahtui ka luang khiasak nawn kei a, lenggah cil-in kuamah lungdamin a kiko nawn kei hi; a kikona uh lungdam kikona hi lo hi.

³⁴ “Heshbon khua panin Elealeh khua leh Jahaz khua dongah; Zoar khua panin Horonaim khua leh Eglath-sheli-shiah khua dongah mite’ kahna aw kiza hi. Bang hang hiam cih leh Nimrim tui nangawn keu ta a, kisusia ta hi.

³⁵ Moab gam mual sang tunga kithoihna bawl-a, milim pasiante’ tunga paknamtui a hal mite, Topa in kong cih-inah, tua bang ka hih sak nawn kei ding hi.

³⁶ Tua ahih manin Moab adingin ka kap a, Kirheres khua mite adingin misi vuina tamngai kitum bangin ka kapkhia hi: bang hang hiam cih leh a neih a lam khempeuh uh kisia mang khin ta hi.

³⁷ “Mi khempeuh in a lu uh met tol uh a, a khamul uh kiatsiang uh hi. A khutte uh kui kek uh a, a kawng uhah ippi puan a teeng uh hi.

³⁸ Moab gam innkhum khempeuh leh lam lianpi khempeuh ah kahna bekbek a om hi. Bang hang hiam cih leh Topa in kong cih-inah, leibeel suktap bangin Moab gam ka sutam a, kuamah in phamawh a sa kei hi.

³⁹ Moab gam kitam ta hi! A mite kap uh hi! Maizum-in hong nungngat ta uh hi! Tua ahih manin Moab in a kim-a om mite’ nuihsat ding leh lipkhap ding a suak zo hi.

⁴⁰ “Topa in kong cih-inah: En in, muvanlai leeng bangin manlang takin gam khat hong leeng ding a, Moab gam sim dingin a kha hong zal ding hi.

⁴¹ Khuapite kila-in kulhpite zong kila ding hi. Tua ni ciangin Moab galkapte in nupi nausuak dingte bangin a lau ding uh hi.

⁴² Moab kisusia ding a, a minam-in a om nawn kei ding hi. Bang hang hiam cih leh Topa dem-in kiliansak uh hi.

⁴³ Moab gama teeng mite aw, Topa in kong cih-inah, launa, dum leh thangte in no hong pang hi!

⁴⁴ Lauhuaina pana a taisim mite dum sungah a kia ding hi. Dum sung pan a, a hong kah khia mite, thang ah a awk veve ding hi. Bang hang hiam cih leh Moab ka daantah ni-in hih nate ka tung sak ding hi, Topa in kong ci hi.

⁴⁵ A bah gawp galtaite in Heshbon khua hong beel uh hi. A hih hangin Sihon kumpipa a maan’na ngei Heshbon khua panin meikuang hong kipan khia veve hi. Galsim nuam mite’ teen’na Moab gam gammong dongin mualsangte zong a kangtum hi.

⁴⁶ Moab aw, gimna na thuak ding hi! Khemosh pasian a bia mite si khin ta uh hi. Na tapate uh sal dingin kipaipih khin a, na tanute uh zong thongkia dingin kipaipih hi.

⁴⁷ Ahih hangin Topa in kong cih-inah, nidang ciangin Moab gam a ngei bang sakin ka hausak kik ding hi,” a ci hi. Moab gam thukhenna tu-a zah ahi hi.