Jeremiah 45 - Tedim Bible

Baruk’ Tungah Jeremiah’ Thugenna

¹ Josiah’ tapa Jehoiakim, Judah gamah kumpi a suah zawh kum li a cin’ ciangin Neriah’ tapa Baruk in kamsangpa Jeremiah’ gen bangbang laibu khat sungah a gelh hi. Tua ciangin Jeremiah in Baruk kiangah:

² “Baruk aw, Topa, Israel mite’ Pasian in nang hong hopih hi.

³ Nangmah in, ‘Gimna ka thuak hi! Bang hang hiam cih leh Topa in ka dahna leh ka natna hong behlap hi. Ka tautauna-in ka gim khin zo a, ka tawlnga thei kei hi,’ na ci hi.

⁴ Topa in nang’ tungah hih bang a gen dingin hong sawl hi: En in, keimah in ka lam sate ka phel kik a, ka phuh sate ka bot khia kik hi. Keimah in leitung buppi tua bangin ka hih ding hi.

⁵ Tua panin nang a peng thei tuam dingin kingaihsun na hi hiam? Tua bangin kingaihsun kei in; bang hang hiam cih leh, en in, Topa in kong cih-inah, mi khempeuh’ tungah gimna ka tung sak ding hi. Ahih hangin nang pen na paina mun khempeuh ah kong suakta sak liailiai ding hi,” a ci hi.