Jeremiah 40 - Tedim Bible

Gedaliah Tawh Jeremiah Omkhawm

¹ Jeremiah kol kibulh-in Jerusalem khua leh Judah gam-a saltangte khempeuh tawh Babilon khua-ah a kipuak khit ciangin Ramah khua panin kumpi cing galkapmang Nebuzaradan in a khahkhia kik hi. Tua khit ciangin Topa in Jeremiah a hopih hi.

² Kumpi cing galkap mangpa in Jeremiah samkhia a, hopihin, “Topa na Pasian in hih mun siat nadingin thu gen khin zo hi.

³ Ama’ gen mah bangin Topa in tu-in zong a hih khin zo hi. Note in Topa’ tungah mawhin a thu mang lo na hih manun, note’ tungah hih na hong tung ahi hi.

⁴ Tu-in, en in, na khuta kibulh kolte, tu ni-in kong sutkhiat sak kong khah khia ta hi. Babilon khua-ah kei tawh pai ding hoih na sak leh hong pai in. Keimah in nang lim takin kong kem ding hi. Ahih hangin Babilon khua-ah kei tawh pai ding hoih nasak kei leh hong pai kei in. Gam khempeuh na mai-ah om a, na pai nopna peuhpeuh ah na pai thei hi,” a ci hi.

⁵ Jeremiah a pai loh ciangin Nebuzaradan in, “Babilon kumpipa in Judah gam khuapite uk ding a, a koih, Ahikam’ tapa, Shafan’ tupa Gedaliah, kiangah paikik in. Amah tawh na mipihte lakah teeng in. Na teen’ nop kei leh lah na pai nopna peuhpeuh ah pai in,” a ci hi. Tua ciangin kumpi cing galkap mangpa in amah an leh letsong pia-in a paisak hi.

⁶ Tua ciangin Jeremiah zong Ahikam’ tapa Gedaliah’ omna Mizpah khua-ah pai-in gam sunga a om lai a mipihte tawh a teeng khawm hi.

⁷ Babilon kumpipa in Ahikam’ tapa Gedaliah, gam uk dingin koih a, Babilon khua-a sal dinga a kipaipih lo gam sunga mizawng pente ahi papi, nupi leh naupangte a en dinga a koihna thu gamsung khua neu-a om galkap mangte leh a galkapte un a zak uh ciangin

⁸ Mizpah khua Gedaliah’ kiangah a pai uh hi. Nethaniah’ tapa Ishmael, Kareah’ tapa Johanan, Tanhumeth’ tapa Seraiah, Netofah khua Efai’ tate, Ma-akath mi Jezaniah leh a galkapte a pai uh hi.

⁹ Ahikam’ tapa, Shafan’ tupa Gedaliah in zong amaute kiangah kiciam-in gen a, “Khaldea mite’ khut nuai-a na om ding uh kihta tuan kei un. Hih gam sung mah ah teeng un la, Babilon kumpipa’ na sepsak le uh cin, no tungah thusia bangmah om lo ding hi.

¹⁰ Kei ka hih leh Mizpah khua mah ah ka teeng ding a, eite kianga hong pai ding Khaldea mite’ kiangah no’ taangin ka ding ding hi. No na hih uh leh leenggah zute, khuakhal ante leh sathaute khawm un la, na bel sung uhah koih un. Na laksa uh khua sung ciat mah ah na teeng un,” a ci hi.

¹¹ Tua mah bangin Moab gam, Ammon gam, Edom gam leh gamdang a, teeng Judah mi khempeuh in, Babilon kumpipa in Judah gamah mi pawlkhat om sak lai a, tuate a uk dingin Ahikam’ tapa, Shafan’ tupa Gedaliah koih hi, cih thu a za uh hi.

¹² Tua ciangin Judah mi khempeuh a kitheh thangna mun khempeuh panin Judah gamah hong ciahkik uh a, Mizpah khua Gedaliah’ kiangah hong pai uh hi. Lenggahzu leh khuakhal an tampi a kaikhawm uh hi.

Ishmael in Gedaliah A Suamna

¹³ Tua ciangin Kareah’ tapa Johanan leh gamsung khua neu-a om galkap mangte khempeuh Mizpah khua Gedaliah’ kiangah hong pai uh a,

¹⁴ “Ammon kumpipa Baalis in nang hong suam dingin Nethaniah’ tapa Ishmael a sawl lam na thei hiam?” ci-in a dong uh hi. Ahih hangin Ahikam’ tapa Gedaliah in amau’ gen a um kei hi.

¹⁵ Tua ciangin Kareah’ tapa Johanan in Mizpah khua-a Gedaliah kiangah, “Nethaniah’ tapa Ishmael hong that sak in. Kuamah in hong thei lo ding uh hi. Nang hong kithat leh nang hong beel Judah mite kikhenthang ding a, Judah mi a om lai sun teng in zong bei lawh ding uh ahih manin bang hangin amah in nang hong that laizang ding ahi hiam?” ci-in a hopih sim hi.

¹⁶ Ahih hangin Ahikam’ tapa Gedaliah in Kareah’ tapa Johanan kiangah, “Tua bangin hih kei in; bang hang hiam cih leh Ishmael’ thu na genna man lo hi,” a ci kik hi.