Jeremiah 32 - Tedim Bible

Jeremiah in Anathoth-ah Lo Khat Lei

¹ Nebukhadnezzar kumpipa a maan’ zawh kum sawm leh kum giat a phak kumin, Judah gamah Zedekiah kumpi a suah zawh kum sawm pha ta a, tua kumin Topa in Jeremiah a hopih hi.

² Tua hun laitakin Babilon kumpipa’ galkapte in Jerusalem khua a sim laitak hun hi a, kamsangpa Jeremiah zong Judah kumpipa’ inn huang sunga thong sungah a kikalhcip laitak ahi hi.

³ Bang hang hiam cih leh Judah kumpipa Zedekiah in ama’ kiangah, “Bang hangin nangmah in thu genkhol a, ‘Topa in a cih-inah: En un, hih khuapi Babilon kumpipa’ khut sungah ka pia ding a, amah in a la ding hi.

⁴ Judah kumpipa Zedekiah zong Khaldea mite’ khut sung pan a suakta kei ding a, Babilon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi.

⁵ Amah in Babilon khua-ah Zedekiah a la ding a, ama tungah na ka sep mateng tua lai-ah a om ding hi. Khaldea mite na do uh hangin na zo kei ding uh hi, Topa in hong ci hi,’ ci-in bang hangin thu hilh na hi hiam?” ci-in thong sungah a khum ahi hi.

⁶ Jeremiah in zong, “Topa in kei hong hopih a,

⁷ En in, na pano Shallum’ tapa Hanamel nang’ kiangah hong pai ding a, ‘Anathoth khua-a ka lo hong lei in. Bang hang hiam cih leh a lei thei ding lak panin ka kinaipihpen nangmah na om hi,’ ci-in hong gen ding hi, hong ci hi.

⁸ Tua ciangin Topa’ hong cihna mah bangin thong sungah ka inn lak sanggampa hong pai takpi-a hong hopihin, ‘Benjamin gam Anathoth khua-a ka lo hong lei in. Bang hang hiam cih leh, i ngeina bangin a nei ding leh a tankhia ding nangmah na hi hi. Nang’ adingin lei in,’ hong ci hi. Tua ciangin keimah in Topa’ hong hopihna taktak hi, ci-in ka thei hi.

⁹ “Keimah in zong ka innlak sanggampa Hanamel’ kiang panin Anathoth khua-a lo ka lei a, ama adingin ngun shekel sawm leh sagih ka tehkhia hi.

¹⁰ Thukimna lai bawlin, min gelhin, gip khenin, a hong theihpih ding mite zong ka lak khit ciangin tawi khaina-ah sum ka teh hi.

¹¹ Tua ciangin ka kithukimna teng uh a kigelhna, gip a kikhen lai pen leh gip a kikhen lo lai pen ka la a,

¹² Nariah’ tapa ahi, Mahseiah’ tupa Baruk kiangah ka pia hi. Tua laite, ka innlak sanggampa Hanamel tawh, tua kileina laite tunga a min uh a gelh a hong theipih mite tawh, thong huang sunga a tu Judah mite tawh a om kim laitak-un ka pia hi.

¹³ Amaute’ om laitakin Baruk kiangah,

¹⁴ ‘A vanglian Topa, Israel mite’ Pasian in a hong gen-inah: Hih gip a kikhen lai leh gip a kikhen lo lai tegel la in la, sia lo-a sau veipi a kikep thei nadingin leibel khat sungah koih in.

¹⁵ Bang hang hiam cih leh a vanglian Topa, Israel mite’ Pasian in a hong gen-inah: Hih gamah innte, lote leh leenggah lote mite in a lei kik ta ding hi, hong ci hi,” ci-in ka gen hi.

¹⁶ “Neriah’ tapa Baruk kiangah kileina lai ka piak khit ciangin Topa’ kiangah thu ka ngen a,

¹⁷ ‘Topa Pasian aw! Nangma’ vangpi leh na khut kizankhia tawh vantung teng leh leitung na bawl khin zo hi! Nang adingin a haksa lua khat beek om lo hi.

¹⁸ Nangmah in mi tul tampite’ tungah a kikhel ngeilo itna na lak a, ahih hangin pate’ mawhnate tate’ tungah na thuk hi. A vanglian Topa a kici a lian mahmah a hat mahmah Pasian aw,

¹⁹ na ngimnate lian mahmah a, na sepnate thupi mahmah hi. Mite’ nuntakzia khempeuh na mu a, amau’ nuntakdan leh a nasepna gahte tung tawnin mi khempeuh’ tungah thaman na pia kim hi.

²⁰ Izipt gamah lim leh nalamdangte na lak a, tu-in zong Israel gam leh minam dang khempeuhte’ tungah lakin, tu-in mun khempeuh ah na min lian mahmah hi.

²¹ Na mi Israel mite Izipt gam panin lim leh nalamdang tawh ahi zongin, a khauh mahmah a kizan khia na khut tawh ahi zongin lauhuaina lianpi tawh ahi zongin na lakhia-a,

²² a pute a pate uh’ tunga piak ding a, na ciamsa, bawngnawi leh khuaizu a luan’na hih gam na pia hi.

²³ Amau zong hong lut-in a luah pah uh hi. Ahih hangin amaute in na thu hong mang loin, thukham hong zui lo uh a, hih ding a, na thupiakte khat beek a hih kei uh hi. Tua ahih manin amau’ tungah hih siatna khempeuh na tungsak hi.

²⁴ En in, khuapi lak nadingin kan a to khin zo uh hi. Namsau tawh kithahna hang, kialpi hang leh pulnatna hangin a sim Khaldea mite’ khut sungah khuapi a kipia ding hi. Na gensa bangin hong tun’ loh phamawh ahih manin en in, nangmah in na mu ta hi.

²⁵ Ahih hangin Topa Pasian aw, hih khuapi Khaldea mite’ khut sung tung ding hi napi, nangmah in, “A hong theihpih ding mi sam in la,tua lo lei in,” ci-in nong sawl teitei hi,’ ci-in thu ka ngen hi,” a ci hi.

²⁶ Topa in Jeremiah hopih a,

²⁷ “En in, Keimah in Topa ka hi a, mi khempeuhte’ Pasian ka hi hi. Kei adingin a haksa lua bang om ahi hiam?

²⁸ Tua ahih manin, Topa in kong cih-inah: En in, hih khuapi Khaldea mite’ khut sung leh Babilon kumpipa Nebukhadnezzar’ khut sungah ka pia ding a, amah in a la ding hi.

²⁹ Hih khuapi a sim Khaldea mite hong pai-in khuapi mei tawh a hal ding uh a, ka heh nading-a inn khum tunga Baal milimte paknamtui halna tawh a biakna innte uh leh pasian dangte’ kianga tuidawn biakna a piakna uh innte zong a haltum ding uh hi.

³⁰ Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi.

³¹ Hih khuapi in, a kisat cil-a kipan tu ni ciang dong hong hehsakin hong thangpaisak ahih manin ka muhna panin ka hemkhia ding hi.

³² Bang hang hiam cih leh Israel mite leh Judah mite, a kumpite uh leh a kumpi uliante uh, a siampite uh leh a kamsangte uh akipan Judah mite leh Jeursalem khua mite khempeuh in kei hong heh sak nadingin siatna a bawl uh hi.

³³ Amaute in kei hong nung ngat-in hong thudon lo uh a, ka hilh tawntung hangin ka hilhna a hong mang kei uh hi.

³⁴ Amaute in ka min tawh a kilo biakinn sung nangawn ah a kihhuai milimte a koih uh a, a ninsak uh hi.

³⁵ En-Hinnom Mualkuam-ah a tapate leh a tanute uh meihal biakna tawh Molek pasian a biak nadingun Baal biakna tau sangte a bawl uh hi. Hih a kihhuai na semin, Judah mite mawhna a bawl sak nadingun amaute ka sawl kei a, zong ka ngaihsun kha ngei beek kei hi.

³⁶ “Jeremiah aw, nangmah in hih khuapi, namsau tawh thahna, kial leh pulnatna tawh Babilon kumpipa’ khut sungah kipia ding hi, na ci hi. Tu-in tua bang na cihna hih khuapi tawh kisai-in Topa, Israel mite’ Pasian in kong gen-inah:

³⁷ En in, Ka hehna, ka thangpaihna leh ka lungkimlohna lianpi tawh ka hawlkhiatna gam khempeuh panin amaute ka kaikhawm ding a, hih munah tun’pih kikin, lungmuang takin ka teengsak ding hi.

³⁸ Amaute ka mi ahi ding uh a, keimah in amaute’ Pasian ka hi ding hi.

³⁹ Amaute’ hoih nading leh amaute’ nung-a a tu a tate uh’ hoih nadingin a tawntungin kei hong zahtak nadingun lungsim kikhat leh nuntakdan kikhat ka pia ding hi.

⁴⁰ Amaute’ tungah a tawntungin hoihna ka bawl det nadingin amaute tawh tawntung thuciamna khat ka bawl ding hi. Kei’ kiang panin a kiheikhiat loh nadingun amaute’ sungah kei hong zahtakna lungsim ka koih ding hi.

⁴¹ Amaute’ tungah hoihna ka bawl manin ka lungdam ding a, ka lungsim khempeuh leh ka kha khempeuh tawh thuman takin hih gamah amaute ka phut ding hi.

⁴² “Bang hang hiam cih leh Topa in kong cih-inah, hih siatna khempeuh hih mite tungah ka tun’sak mah bangin, amaute tunga ka khapsa hoihna khempeuh zong ka tungsak pelmawh ding hi.

⁴³ Nangmah in hih gam in mihing leh ganhing’ teen’ lohna gam simtham hi a, Khaldea mite’ khut sungah kipia ding hi, ci-a na gen hangin hih gamah lo kilei kik ding hi.

⁴⁴ Benjamin gam, Jerusalem khua kimkot leh, Judah gam khuapite-a kipan mual tunga khuapite, Shefelah zanglei-a khuapite leh leitaw lam Negeb gama khuapite-ah sum tawh lo kilei ding a, a theihpih mite tawh thukimna min gelhin gip tawh a kikhen ding hi; bang hang hiam cih leh keimah in amaute a gam mah uhah ka om sak kik ding hi, Topa in kong ci hi,” a ci hi.