Jeremiah 19 - Tedim Bible

Beel Kitam tawh Thuhilhna

¹ Topa in hong hopih a, “Beel sekpa’ kiangah pai in la, leibeel khat va lei in. Mite’ lakah upa pawlkhat leh siampi upa pawlkhat tonpih in la,

² ni suahna lam kongpi gei, Ben-Hinnom Mualkuamah pai-in, tua lai-ah kong gen thute tangko in.

³ Nangmah in, ‘Topa’ kammal ngai un, Judah kumpite leh Jerusalem khua mite aw, a vanglian Topa, Israel mite’ Pasian in hong cih-inah: En un, hih munah kong tun’sak ding siatna lian lua ahih manin a za mi khempeuhte’ bil sungah ging den ding hi.

⁴ Bang hang hiam cih leh hih mite in kei hong taisan khin zo uh a, amaute-a kipanin a pu a pate uh leh Judah kumpite’ theih ngei loh pasian dangte’ kiangah paknamtui a hal uh a, hih mun a ninsak uh hi. Hih mun mawhna nei lo mite thahna sisan tawh a dimsak uh a,

⁵ ka thupiak, ka sawl lah a hi lo, ka ngaihsut khak beek zong a hi lo, a tate uh meihal biakna tawh Baal biak nadingin Baal biakna tausangte a lam khin zo uh hi.

⁶ Tua ahih manin, en un, Topa in kong cih-inah, hih mun pen Tofeth ahi zongin Ben-Hinnom Mualkuam ahi zongin a kicih nawn loh hun hong tung ding hi. Kithahna Mualkuam a kici zaw ding hi.

⁷ Hih munah Judah mite leh Jerusalem mite’ ngimna ka tangtung sak kei ding a, a galte’ namsau leh a that nuamte’ khutlum-in amaute ka sisak ding hi. Amau’ si luangte huih laka leng vasate leh lei lak a ganhingte’ an dingin ka pia ding hi.

⁸ Hih khuapi a mulkimhuai leh a simmawh huai ka suak sak ding a, a kantan mi khempeuh in khuapi kisiatna hangin lamdang sa-in zahpih-in a phitsan ding uh hi.

⁹ A galte uh leh a that nuam mite in hong sim uh a, nek ding om lo lua ahih manin a tapate leh a tanute-uh’ sa ka nesak ding a, mi khempeuh in a innvengte’ sa a ne ding uh hi,’ va ci in.

¹⁰ “Tua ciangin na tonpihte’ muhin na beel sukham in la,

¹¹ amaute kiangah, a vanglian Topa in a cih-inah, hih beelsekpa’ beel kisukham a, a kibawl phatkik theih nawn loh mah bangin hih mite leh hih khuapi ka sukham ding hi. Mun dangah si vui nading mun om nawn lo ding ahih manin Tofeth nangawn-ah a kivui ding uh hi.

¹² Topa in kong cih-inah, hih mun leh hih mun-a teeng mite tungah tu-a bangin ka hih ding a, hih khuapi Tofeth ka bang sak ding hi.

¹³ Jerusalem khua-a innte leh Judah kumpite’ innte—inn khum tung pan vantunga aksite khempeuh tungah paknamtui hal biakna kipiakna innte leh pasian dangte tunga dawn ding biakna a kibuakna innte khempeuh a vek-in Tofeth mun bangin a nin a suak ding hi, a ci hi,’ va ci in,” hong ci hi.

¹⁴ Tua ciangin Topa in thu gen ding a, hong sawlna Tofeth panin ka ciahkik a, Topa’ biakinn sungah ding-in mi khempeuh’ kiangah,

¹⁵ “A vanglian Topa, Israel mite’ Pasian in a cih-inah, En un, hih khuapi leh a kim-a khuaneute’ tungah ka gensa siatna khempeuh ka tung sak ding hi. Bang hang hiam cih leh amaute in a lung uh a khauhsak uh a, ka thute a ngai nuam kei uh hi, a ci hi,” ka ci hi.