Jeim 5 - Tedim Bible

A Haute Hilhkholhna

¹ Sum haute aw, tu-in hong pai un; note tungah hong tung ding gimna tawlna hangin kiko-in kap un.

² Na sum na paaite uh muat gawpin a om hi. Na puante uh zong nget in a ne khin zo hi.

³ Na kham na ngunte uh zong a keekseu khin hi. Tuate keekseuna in note lang khatah teci hi a, mei bangin note’ sa hong ne ding uh hi. Note in a nunung bel ni hi napi-in sum na khol uh hi.

⁴ Ngai un, note’ lo lai-ah an atte na kheem uh a, a thaman uh pia loin na om uh a hih ciangin tua thaman in kiko-in a om hi. Tua lo-ah a at mite a kikona aw un zong vantungmite’ Topa’ bil sungah a tum zo hi.

⁵ Note in leitungah lungdam nopsakna ngahin na om zo uh hi. Kithah ni adingin na lungsim uh na vaak thau zo uh hi.

⁶ Midik tungah thu na khen uh a, na that zo uh hi. Amah in no hong thuk kei hi.

Lungduaina Leh Thungetna

⁷ Tua ahih ciangin ute naute aw, Topa hong pai matengin thuakin ngak un. Lokho mi in guahzu masa leh guahzu nunung a zuk matengin a manpha leitungah gahte thuum loin ngakin a lamen hi.

⁸ Tua mah bangin note in zong thuakin ngak un. Na lungsim uh na kipsak un. Bang hang hiam na cih uh leh, Topa hong pai ding a nai zo hi.

⁹ Ute naute aw, thukhenna tawh na kipelh nadingun khat leh na kiphunsan kei un. En un, kongkhak kiangah Thukhenpa ding-in a om hi.

¹⁰ Ute naute aw, gimna tawlna-ah Topa’ min tawh thu a hilh kamsangte’ lim na ciamteh un.

¹¹ En un, a thuak zo mite in thupha a ngah mite a hi uh ci-in i gen hi. Job’ thuakna thu na za zo uh hi. Pasian in ama thu a zawh khit ciangin a hehpih theih mahmahna thu zong na thei zo uh hi.

¹² Ka u ka naute aw, thu khempeuh tungah kiciamna pha takin na tang un; vantung tawh na kiciam kei un, leitung tawh na kiciam kei un. Bangmah dang tawh na kiciam kei un. Thukhenna tawh na kipelh theih nadingun ah, “Ahi hi,” na cih uh ahi mah hi ta hen; “Ahi kei hi,” na cih uh a hi lo mah hi ta hen.

¹³ Note lakah mi khat peuhmah gimna thuak a om hiam? Amah in thungen ta hen. Khat peuhmah a lungdam leh, la sa ta hen.

¹⁴ Note lakah cina a om leh, pawlpi upate sam hen. Tuate in Topa’ min suangin mi cina sathau tawh zutin ama tungah thungen ta uh hen.

¹⁵ Tua bang na bawl uh leh, upna thungetna in cinate a noptuamsak ding a, Topa in amah a thosak ding hi. Amah in mawhna ahih khak leh zong, tua mawhna a maisak ding hi.

¹⁶ Tua ahih ciangin khat leh khat na mawhna uh kipulaakin, na cidam nadingun khat leh khat ading thu na kingetsak un. Midik’ thungetna in nakpi vanglianin muibun mahmah hi.

¹⁷ Elijah in eite bangin leitung mi bek a hi napi-in guah zuk loh nading nakpi-in thu a nget ciangin kumthum leh khaguk tawntung leitungah guah a zu kei hi.

¹⁸ Khatvei thu a nget kik ciangin vantung in guah zusakin, leitung in zong a gah a gah hi.

¹⁹ Ka u ka naute aw, note lakah mi khatpeuh mah in thuman thutak lam pan pial a, a khialh ciangin,

²⁰ midang khat in tua mi a kiheisak kik leh, mawhnei mi’ lam pialna pan kihei kiksak a, kha khat sihna pan gumkhia a, mawhna tampi a khuhsak mi ahi ding hi ci-in thei ta hen.