Jeim 4 - Tedim Bible

Leitung Tawh Kipawlna

¹ Note lakah galdona leh kitotna koi pan hong piang ahi hiam? Note’ pumpi sung uhah a om nate lakah gal a bawl thei na deihgawhnate uh pan piang hilo ahi hiam?

² Note in na deihgawh uh hangin na ngah kei uh hi, na that uh a, na deih uh hangin na ngah kei uh hi, na kitawng uh a, na kido uh hi. Thu ngen lo na hih ciangun na ngah kei uh hi.

³ Thu na nget uh hangin na deihgawh nopsakna hoih lote na ngah nadingun ngen khial na hih ciangun na ngah kei uh hi.

⁴ Apangtatte aw, leitung tawh kipawlna in Pasian tawh kilem lohna ahih lam thei lo na hi uh hiam? Tua ahih leh, leitung tawh a kipawl mi peuhmah in Pasian’ gal a suak hi.

⁵ Lai Siangtho’ thu in: “Eite sunga teeng Kha Siangtho in eite hong aam mahmah hi,” a cihna in a mawkna ahi ci-in na um uh hiam?

⁶ Topa in thupha hehpihna a tamzaw hong pia hi. Tua ahih ciangin Lai Siangtho sungah a gen-inah, “A kisatheite Pasian in kham a, ahih hangin lung kiniamkhiat mite thupha hehpihna a pia hi,” ci-in a gen hi.

⁷ Tua ahih ciangin Pasian’ ukna na mang un. Dawimangpa na kham un; na kham uh leh, note kiang pan a taikhia ding hi.

⁸ Pasian kiangah nai un. Tua bang na hih uh leh, nomau kiangah a hong nai ding hi. Mawhneite aw, na khut uh siangthosak un. Lungka mite aw, na lungsim uh na siangthosak un.

⁹ Lunggimna thuakin, thuumin, kapin, om un. Note’ nuihna pen dahna suahsak un. Note’ lungdamna uh zong dahna suaksak un.

¹⁰ Topa mai-ah na kiniamkhiat un. Tua bang na hih uh leh, amah in note hong pahtawi ding hi.

U-le-nau Thukhenna

¹¹ Ute naute aw, khat leh khat na kikosia kei un. A u a nau a kosia mi ahi zongin, a u a nau thukhen mi ahi zongin Pasian’ Thukham a kosia hi; Thukham tungah thu a khen hi. Pasian’ Thukham tungah thu na khen uh leh, Pasian’ thu zui na hi kei uh hi; Thu a khen na hi uh hi.

¹² Thukham a pia mi leh thukhen mipa khat bek a om hi. Tua pa in gup ding ahi zongin, siatsak ding ahi zongin a hih thei hi. Na lawmte tungah thu a khen nang in kua mi na hi hiam?

A Kisatheite Hilhkholhna

¹³ “Tu-ni ahi zongin, zingciang ahi zongin hih bang khuapi sungah pai-in kum khat tawntung omin sumbawlin, a meet ngah nading ka bawl ding uh hi,” a ci mite aw, ngai un.

¹⁴ Zingciangin bang thu a piang ding na thei kei uh hi. Note’ nuntakna un bang tawh a kibang hiam? Note in tawlkhat a kilat khit ciangin a mangthang thei tuikhu na hi uh hi.

¹⁵ “Pasian in hong awi leh, eite in nungta-in hih bang ahi zongin, tua bang ahi zongin i hih ding hi,” ci-in na gen dingun a kilawm hi.

¹⁶ Tu-in ahih leh, note na kiphatsakna uhah na kisathei uh hi. Tua bang kisaktheihna ahoih kei hi.

¹⁷ Tua ahih ciangin gamtatna hoih thei napi-in a gamta lo mi tungah mawhna a om hi.