Jeim 3 - Tedim Bible

Leii

¹ Ka u ka naute aw, Sia a sem kote in a khauhzaw thukhenna thuak ding ka hih manun note a tampi Sia suah ding na sawm kei un. Bang hang hiam na cih uh leh eite in thudotna i thuak zaw ding hi ci-in na thei ta un.

² Eite khempeuh in na tampi-ah i khial thei hi. Mi khat in kampau a khialh kei leh, tua mi in a kicing mi hi a, ama pumpi khempeuh a keem thei mi zong ahi hi.

³ Sakol uk nading kamkaih bulh leeng, a pumpi khempeuh i kiheisak thei hi.

⁴ Ngai un, teembawte a lian mahmah uh a, huihpi in nakpi-in a mut hangin heina lenpa in a deih bangin, a neu mahmah heina tawh a hei thei hi.

⁵ Tua mah bangin leii in na neu ahih hangin alianpi nate a kisaktheihpih thei hi. Bang zah alian sing tampi a neu mahmah mei tawh a kikangsak thei hi cih no na en un.

⁶ Leii in mei a hi hi. A gilo na, leitung na ahi eite’ pumpi sungah om a, pumpi khempeuh ninsak a, pumpi hih theihna khempeuh zong hal a, amahmah in hel khua ah halna a thuak hi.

⁷ Ganhing apawlpawl khempeuh, vasa apawl apawl khempeuh leh tuipi sungah a om apawl apawl khempeuh mite in a zualsak zo uh hi.

⁸ Leii ahih leh, kuamah in a zozo kei hi. Leii in a ommawk thei lo, a gilo ahi, sih theihna a piangsak gu khal tawh a dim hi.

⁹ Tua leii tawh eite in i Topa leh i Pa i phat thei hi, Pasian’ lim banga kibawl mite, leii tawh i samsia thei hi.

¹⁰ Kam khat bek panin phatna leh samsiatna a paikhia thei mawkmawk hi. Ka u ka naute aw, tua banga hih ding kilawm lo hi.

¹¹ Ciktui in a vang khat bek sung pan tuilim leh tuikha phul khia khawm thei ahi hiam?

¹² Ka u ka naute aw, theikung in oliv gah a gah thei hiam? Leengkung in theigah a gah thei hiam? Tua mah bangin tui al in tui lim a piangsak thei kei hi.

Vantung Pan Hong Pai Pilna

¹³ Note lakah kua in pilna leh theihna a nei hiam? Tua mi in gamtatna hoihte hihin, pilna, lungnemna tawh ama gamtatnate lak ta hen.

¹⁴ Ahih hangin note lungsim sung uhah hazatna leh kidemna siatna a om leh, thuman thutak tawh kilem loin kisathei kei un.

¹⁵ Tua bang pilna in vantung pan hong tung pilna ahi kei hi; leitung pilna, pumpi pilna, dawi gilo pilna ahi hi.

¹⁶ Bang hang hiam na cih uh leh, hazatna leh kidem nopna a om leh, gamlumna leh a kihhuai gilo bawlna apawl apawl a piangsak uh hi.

¹⁷ Vantung pan hong tung pilna in a masa belin a siangtho hi. A nung ciangin kilemna ahi hi, lungnemna ahi hi, zol baihna ahi hi, hehpihna leh gah pha tawh a dim hi, maitang zahtakna leh simtatna a om kei hi.

¹⁸ Kilemna a piangsak thei mite ading dikna thu khaici kilemna tawh kivawhin a om hi.