Isaiah 9 - Tedim Bible

Nopsakna Kumpipa’ Suahna leh Maan’na

¹ Zebulun minamte leh Naftali minamte’ teen’na gamte in lungkham thuak ding uh a, mai lamah pahtawina ngah kik ding uh hi. Mediterranean tuipi akipanin nisuahna lam Jordan gun gal, minam dangte’ teenna Galile gamsung pen minthang kik ding hi.

² Khuamial sunga a pai mite in khuavak lianpi mu khin ta hi; sihna lim thukna gam sunga a teeng mite tungah khuavak taang khin zo hi.

³ Nangmah in amaute na pung sak a, a lungdamna uh na khang sak hi; anlak hun ciang-a lungdamna leh mite in vankisutte a hawm ciangun a lungdam bangun, nangma mai-ah amaute lungdam uh hi.

⁴ Bang hang hiam cih leh Midian mite a kizawh ni-a bangin nangmah in gik a sak uh a hakkol uh, amau liangko tunga singzawl leh amaute a nengniamte in a satna ciangkhut na kuaihtan sak a, nangma mi a bawlsia minamte na zo gawp hi.

⁵ Gal kikapna sunga gal hangte’ khedap khempeuh leh si a baang puan khempeuh mei-in kicih ding hi.

⁶ Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om ding a, ama min pen, “Lamdang, Thulakpa, Vanglian Pasian, Tawntung Pa, Nopsakna Kumpi,” kici ding hi.

⁷ Tua huna kipanin a tawntungin David kumpi tokhom tungah maangin ama gam sungah thutan’na leh thumanna phutin a kipsak nadingin, alian semsem ama ukna leh nopsakna in mong nei lo ding hi. Vanglianpen Topa’ deih luatna in hih thu hong tungsak ding hi.

Israel tungah Topa’ Hehna

⁸ Topa in Jakob tungah thu khat khah a, Israel tungah hong tung ding hi;

^9-10 “Leisekte kicim khin hi; ahih hangin suangseek tawh i lam ding hi; theithek singte kisia khin hi, ahih hangin taamtaak sing tawh i khek ding hi,” ci-a kiphasakin lungsim kihisak Efraim mite leh Samaria gam sunga teeng, mi khempeuh in thei ding uh hi.

¹¹ Tua ahih ciangin Topa in, Rezen do dingin a langpang ding bawl a, amau’ galte hanthawn hi.

¹² A mai-a om Siria mite leh a nunga om Filistia mite in kamka-in Israel netum uh hi. Hih thute khempeuh hangin ama hehna dam zo nai lo a, ama khut kilamto lai hi.

¹³ Amaute a satpa’ lamah mite kihei lo a, Vanglianpen Topa zong lo uh hi.

¹⁴ Tua ahih ciangin Topa in Israel sung panin a makaite leh a mihonte, a lu panin a mei dongin, nisuh hiang leh pumpengte anihin ni khat thu-in vat mai hi.

¹⁵ Upate leh a zahtak huai mite pen a lutang hi a, zuauthu a hilh kamsangte pen a mei ahi hi;

¹⁶ bang hang hiam cih leh hih minam a makaihte in lam khialsak a, amaute’ makaite in lampialsak uh hi.

¹⁷ Tua ahih ciangin amau’ tangvalte tungah Topa lungdam lo a, pa nei lote leh a meigong numeite uh tungah hehpihna nei lo hi; bang hang hiam cih leh mi khempeuh in Pasian’ thu khual loin siatna a bawl vive hi a, kam khempeuh in haina thu gen uh hi. Hih thute khempeuh hangin ama hehna dam zo nai lo a, ama khut kilamto lai hi.

¹⁸ Bang hang hiam cih leh gitlohna pen mei bangin kuang a, lingkungte leh lingte kangtum sak hi; gamlak lopa phate kuang sak a, meikhu lomtangin van lamah kizialto uh hi.

¹⁹ Vanglianpen Topa’ hehna hangin meikuang bangin gamsung kang a, mite pen mei-a kicih sing tawh kibang uh hi; kuamah in a sanggampa zahtuan lo hi.

²⁰ Amaute in taklam-a omte ne uh a, ahih hangin gilkial lai uh hi, amaute in veilam-a omte ne uh a, ahih hangin kham nai lo uh hi; mite in amau’ vengte’ sa ne ciat uh hi,

²¹ Manasseh in Efraim, Efraim in Manasseh ne-in tua tegel in Judah langpang khawm uh hi. Hih thute khempeuh hangin ama hehna dam zo nai lo a, ama khut kilamto lai hi.