Isaiah 6 - Tedim Bible

Isaiah’ Mangmuhna leh Amah a Kisapna

¹ Uzziah Kumpipa a sih kumin, a sang mahmah, a lian kumpi tokhom tungah Topa a tu ka mu hi; ama kumpi puanpi pen biakinn sung teng dim hi.

² Ama tungah serafim vanmite ding uh hi; tuate in kha guk ciat nei uh hi; nih tawh ama mai liah-in nih tawh ama khe tuamin, nih tawh leeng uh hi.

³ Amaute khat leh khat kisamin: “Vanglianpen Topa, siangtho, siangtho, siangtho hi; leitung khempeuh ama minthan’na tawh kidim hi,” ci-in awng uh hi.

⁴ Tua kikona aw tawh biakinn kongkhak khuam bulpite kiling a, inn sung teng meikhu tawh kidim hi.

⁵ Tua ciangin keimah in, “Gim ngahpa hi ta ing! Bang hang hiam cih leh a mawknapi ka hi hi; ka kam-a ka thugen khempeuh mawhna vive hi a, a thugen khempeuh uh mawhna leh nitna ahi mite’ lakah ka teeng kha hi. Vanglianpen Topa, Kumpipa ka mu kha khin ta hi,” ka ci hi.

⁶ Tua ciangin serafim vanmite khat, biakna tau panin taiteh tawh a teh mei-am khat a khutah tawi-in, keima kiangah hong leeng hi.

⁷ Amah in ka kam hong bi a, “En in, hih in na muk su-kha zo hi; na mawhna beita a, na khialhna kimaisak zo hi,” hong ci hi.

⁸ Tua ciangin, “Kua sawl ding a, eite’ adingin kua va pai ding ahi hiam?” Topa’ cihna aw ka za hi. Tua ciangin ke’n, “Hi lai-ah kei om ing! Kei hong sawl in,” ka ci hi.

⁹ Tua ciangin amah in, “Pai in la, hih mite tungah hih bangin ci in: ‘Za za napi, tel lo; mu mu napi, thei lo,

¹⁰ amaute in a mit uh tawh a muh loh nading, a bil uh tawh a zak loh nading, a lungsim uh tawh thu a theihtel loh nading, amaute kihei-in damna a ngah lohna dingun hih mite lungsim mawl sak in la, amau bil uh ngong sak in la, a mit uh va si sak in,” hong ci hi.

¹¹ Tua ciangin keimah in “Topa aw, bang tanvei sawt ding ahi hiam?” ka ci hi. Amah in, khuapite-ah a teeng kuamah om loin hawm suakin, innte ah kuamah om loin kinusia a, leitang pen gamkhing suak kiuhkeuhin,

¹² Topa in gamlapi-ah mite khinkhia-in, leitungah a kinusia mun tampi a om dong, tua tan hong sawt ding hi, hong ci hi.

¹³ Mi, seh sawmsuah seh khat bang a om lai hangin, taak kung leh tawsaw kungte a kiphuk khit ciangin a bulsum om laite mei tawh a kihal kik bangin amaute zong kisusia ding hi. A siangtho khaici pen, tua a bulsum ahi hi, ci hi.