Isaiah 50 - Tedim Bible

¹ Topa in: “Amah ka ciahsakna, na nu a kimakna lai koi-ah om ahi hiam? Tua ahih kei leh, nang kong zuakna ka lei batnate koi pen ahi hiam? En un, nomau’ mawhna hangin note hong kizuak a, nomau’ khialhna hangin na nu uh kipaikhiasak hi.

² Bang hangin, kong pai ciangin mi khat zong om lo ahi hiam? Kong sap ciangin hong dawng ding khat zong om lo ahi hiam? Hong hon zo lo zah dingin ka khut tom lua ahi hiam? Tua ahih kei leh note khahkhiatna ding thahatna nei lo ka hi hiam? En un, keima taiina tawh tuipi ka keusak a, gunte pen sehnel gam ka suaksak hi; tui om loh manin a ngasate uih a, dangtakin si uh hi.

³ Vantungte khuamial ka silhsak a, amau’ kituam nadingin puanhampi ka bawl hi,” a ci hi.

Pasian’ nasempa’ Thuman’na

⁴ Thugenna tawh a lunggim mite tha a pia thei kammal ka theih nadingin, Topa Pasian in ka gen ding thu hong hilh khin hi. Ama hong hilhnate a ngai dingin zingsang simin hong phong hi.

⁵ Topa Pasian in ka bil hong honsak a, amah ka lehdo kei a, ka nungngat kei hi.

⁶ Hong satte tungah ka nung ka dawh a, ka khamul hong kai mite tungah ka paang ka dawh hi; maizumna leh cilphihna panin ka maitang ka hei kei hi.

⁷ Bang hang hiam cih leh Topa Pasian in kei hong huh hi; tua ahih ciangin cih nading thei loin ka om kei hi; tua ahih ciangin ka mai pen a sak suang ka bangsak a, kei hong maizum sak lo ding hi, ci-in ka thei hi;

⁸ ka thumanna a langsakpa Pasian a nai-ah hong om hi; kei langah kua’n hong mawhsak ding ahi hiam? Thukhen zumah kimaisak nung, Thukhen zumah kua’n hong khia nuam ahi hiam? Hong langpang dingin hong kuan ta hen.

⁹ En un, Topa Pasian in kei hong huh hi; kua in kei mawh hi ci-in gen thei ding ahi hiam? En un, amaute khempeuh puan bangin paatkhia ding uh hi; nget in amaute netum ding hi.

¹⁰ Topa kihta a, a nasempa’ thu a mangte khempeuh in, khuamial sungah khuavak nei loin na pai hangun, Topa muang un la, Pasian suan’ in nei un.

¹¹ Ahih hangin mei vaksak a, meilah kuang a kiguan note khempeuh aw, tu-in na meivakna leh na meilah kuang pana khuavak sungah pai-in, kalsuan un; hih in ka khut pana na ngah ding uh ahi hi. Lungkhamin na lumsuk ding uh hi.