Isaiah 5 - Tedim Bible

Leenggui Lo Thugentehna

¹ Ka lawm itpa’ tangin, a leenggui lo a itna la hong sa ning: Ka lawm itpa in, lei hoih mahmahna mual tung khatah leenggui lo khat a nei hi.

² Amah in lei to-in suangte paikhia a, leenggui hoihte a suan hi; amah in a laizangah tausang khat lam a, tua sungah leenggah sukna khuk khat a to hi; amah in leenggah hoih hong gah ding lamen a, ahih hangin gam leenggah hong gah mawk hi.

³ Tu-in, Jerusalem khua-a teengte leh Judah mite aw, kei leh ka leenggui lo kikal-ah thu nong khen nading uh kong thuum hi.

⁴ Ka leenggui lo’ adingin ka hih nai loh ka hih ding a kilawm bang om lai ahi hiam? Leenggah hoih gah ding ka lamet lai takin bang hangin gam leenggah hong gah mawk ahi hiam?

⁵ Tu-in, ka leenggui lo tungah ka hih ding note tungah kong gen ding hi. A daai ka lakhia ding a, kinemang ding hi; a gawl ka susia ding a, kituancil ding hi.

⁶ Lo khul-in ka bawl ding hi; kipuah loin, kikho lo ding a, lingkung leh lingte khang ding hi; ama tungah meiite in zong guah a zuksak loh nadingin thu ka pia ding hi.

⁷ Bang hang hiam cih leh Vanglianpen Topa’ leenggui lo pen Israel mite hi a, Judah mite pen lungdamna tawh a suan kungte ahi hi; amah in thutan’na lamen a, ahih hangin sisan luan’na om hi; thumanna lamen a, ahih hangin kahna om hi:

Mi gilote tunga Kizasak Gimnate

⁸ Leitang tungah amau guak a teeng zah dongin midang’ adingin mun khempeuh a bei matengin inn khat leh khat, lo khat leh khat, gawmin a la thuah tawntung mite in gimna ngah ta hen.

⁹ Vanglianpen Topa in ka zakna-ah hih bangin kiciam hi: “Aman takin, inn tampi tak hawmsuak ding a, a lian a hoih innte ah a teeng om lo ding hi.

¹⁰ Bang hang hiam cih leh leenggah lo eeka sawm in phelpi khat dim bek gah ding a, khaici beem khat in an seu khat bek piangsak ding hi.”

¹¹ Zingsang tungin tho-in, kham theih zu delhin, leenggah zu in amaute a satsak pialpual matengin nitakin a tut kho mite in gimna ngah ta hen!

¹² Amaute in a pawi sung uhah laiza la sakna leh harp la sakna, khuang, tamngai leh leenggahzu tampi nei uh hi; ahih hangin amaute in Topa’ sepnate don lo uh a, a khut tawh a bawlte zong mu lo uh hi.

¹³ Tua ahih ciangin thu theihlohna hangin ka mite sal suak uh hi; amau’ mi liante gilkialin si dek uh a, a mihonte uh dangtakin keu uh hi.

¹⁴ Tua ahih ciangin Leinuai in a duhna khangsakin, bangmah tawh kiteh theih lo zahin a kam ka beba a, Jerusalem’ hoihna leh a mipite, a mihonte leh ama sunga lungdam mite a nawmvalh hi.

¹⁵ Mite a niamin kikoih suak a, mite kiniamkhiat suk hi, a kiphasakte kiniamkhiat suk hi.

¹⁶ Ahih hangin thutang sepna tawh Vanglianpen Topa in a liatna hong kilangsak a, a Siangtho Pasian in a mite a thukhenna tawh ama siangthona hong kilangsak hi.

¹⁷ Tua ciangin tuunote in amau’ tatna gamlak mun bangin lopa ne ding uh a, a thau ganhingte leh keelnote in a siasa khuapi sungah gamta ding uh hi.

^18-19 Amaute in, “I muh theih nadingin amah manlang sakin, ama nasep kinawh sak ni; Israelte’ Siangtho Pa’ deihna i theihtheih nadingin nai sakin, tung sak ni!” ci-in ganhing kaih bangin khauzen tawh mawhna kai-in, khauhualpi tawh khialhna kai uh ahih manin gimna ngah ta uh hen.

²⁰ A phate sia ci-in, a siate pha ci a, khuavak dingin khuamial koihin, khuamial dingin khuavak koih a, a khum dingin a kha koihin, a kha dingin a khum a koihte in gimna ngah ta hen!

²¹ Amau’ mit-ah pil kisa a, amau’ muhna-ah siam a kisate in gimna ngah ta hen!

²² Leenggahzu tampi a dawnte, kham theih zu nek a hatte,

²³ mimawhte sumgolh tawh khah a, midikte a mawhsakte in gimna ngah ta hen!

²⁴ Tua ahih ciangin, mei in buhkung keute kangtum a, meikuang sungah lopa keute a kattum bangin, amaute’ zung pen muatna hi ding a, amaute’ pak palhte pen leivui bangin van-ah leengto ding hi; bang hang hiam cih leh Vanglianpen Topa’ thu nialin, Israelte’ Siangtho Pa’ thu simmawh uh hi.

²⁵ Tua ahih ciangin, Topa’ hehna ama mite’ tungah hong khangin, a khut zanin amaute vat gawp a, mualte liing hi; amaute’ luang hawmte pen kongzing lampite ah nin bangin om hi. Hih bang teng hangin zong a hehna dam nai lo a, ama khut kizan lai hi.

²⁶ Amah in, gamlapi-a om minam khat a sapna-in lim khat lak a, lei mong panin hong pai nadingin a sam hi; manlang takin hong paipah hi.

²⁷ Tua a hong pai mite kuamah gim lo uh hi, kuamah tuk lo uh hi, kuamah lusu lo, ihmu lo uh hi, dialkaih khat zong kol lo hi, khedap khau khat zong tat lo hi;

²⁸ amau’ thaltangte hiam a, a thal khempeuh uh a kikeeksa ahi hi, amau sakolte’ khecinte pen meisuang bangin sak a, a leengpeite uh pingpei bangin manlang hi.

²⁹ Amaute’ kikona pen humpinelkai hawk tawh kibang a, humpinelkai khanglaite bangin amaute hawk uh hi; amaute humhamin a sa nek ding uh man uh a, amaute in puakhia-in kuamah in honkhia zo lo hi.

³⁰ Tua ni ciangin amaute in tuipi ging bangin Israel tungah ngik ding uh hi. Mi khatpeuh in leitang en leh, khuamialna leh lungzin’na bek om hi; meiite in khua mialsak hi.