Isaiah 46 - Tedim Bible

¹ Bel pasian puksukin, Nebo pasian kunsuk a, tua milimte pen ganhing leh bawngte tungah kipua hi; note’ puak hih nate pen, a gim mahmah ganhingte tungah vangik om bangin note’ tungah hong gik hi.

² Amaute kunin, amaute puksuk khawm uh a, amaute in vangik pengsak thei lo uh a, amaute mahmah zong galte’ matna sungah tung uh hi.

³ “Na suah-a kipan kong tawi, gilsung pan-a kong puak, Jakob innkuan, Israel innkuan a suakta laite khempeuh aw, keima thu hong ngai un;

⁴ na tek dongun keimah in Amah ka hi a, na sam uh a kan hun dongin note kong kem ding hi. Ka bawl khin a, ka don ding hi; keimah in hong tawi-in kong honkhia ding hi.

⁵ “Note in kei, kua tawh hong kibang sakin hong kikim sak ding a, ka kibatpih dingin kua tawh hong enteh ding na hi uh hiam?

⁶ Sumbawm panin khamte uang zatin tawi-tehna tawh ngunte a tehkhiate in kham seekpa cial a, amah in tua nate pen pasian-in seeksak hi; tua ciangin amaute kunin tua milim bia uh hi.

⁷ Amaute in tua pasian pen a liangko tung uhah ngato-in pua uh a, ama om nading munah amaute in koih a, tua lai-ah om niloh hi; ama omna panin amah kinkhia thei lo hi. Mi khatpeuh in amah sam leh amah in dawng thei lo a, ama lungkhamna panin zong honkhia thei lo hi.

⁸ “Thu a palsat mite aw, hih thu phawkin ngaihsun un la, lungngai pha un.

⁹ Hun lui nate phawk un; bang hang hiam cih leh keimah in Pasian ka hi a, a dang om lo hi; keimah in Pasian ka hi a, kei tawh a kibang a dang om lo hi.

¹⁰ A kipat cilin a tawp nading thu ka pulak a, tanglai pek panin a piang nai lo nate genin, ‘Ka ngimna kip ding a, ka sepnop khempeuh ka sem ding hi,’ ka ci hi.

¹¹ Nisuahna gam panin sasialne vasa khat samin, keima thu a sem khia dingin gamlapi panin mi khat ka sam hi. Thu ka gen khin a, ka tungsak ding hi; ka geel khin a, ka sem ding hi.

¹² “Dikna tawh a kigamlate, a lungsim khauh mite aw, ka thu hong ngai un:

¹³ Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.”