Isaiah 42 - Tedim Bible

Topa’ Nasem

¹ Keimah in ka huh, keima teel, ama sungah ka lungkimna ka nasempa en un; ka Kha tawh amah ka kidimsak a, amah in minam khempeuh tungah thuman tungsak ding hi.

² Amah kiko loin, awng khia lo a, kongzing lakah zong thu gen zakzak lo ding hi;

³ amah in a kisunimsa pumpeng sukham lo ding a, a khu suak mei khau sumit lo ding hi. Amah in thumanna tawh mi khempeuh tungah thutang thu sem khia ding hi.

⁴ Amah in leitungah thutang thu a phuh khit matengin lungsi lo, lungkia lo ding hi; tuikulh gamte in ama thukham sungah lametna nei ding uh hi.

⁵ Vantungte piangsakin a zal, leitung phah-in a tung pan-a hong paikhia nate a piangsak, leitung a, om mite tungah husan’na pia-in, leitung a, a paite khempeuh husan’na a guan Topa Pasian in hih bangin ci hi;

^6-7 “Keimah in Topa ka hi a, thumanna tawh nangmah hong samin, ka khut tawh nang hong lenin kong kem hi; mittawte a vaksak ding, leinuai thong sung panin thongkiate a lakhia ding, thong sung a mialna mun a, a tu mite a lakhia dingin, mite tungah thuciamna ahi ding, Gentailte tungah khuavak ahi dingin nang kong koih khin hi.

⁸ Keimah in Topa ka hi a, Topa pen keima min ahi hi; Pasian dang’ tungah keima minthan’na ka ngahsak kei a, a kisui milimte tungah zong keimah hong kiphatnate bang ka ngah sak kei hi.

⁹ En un, hun beisa-a nate in hong kheng a, tu-in a thak nate kong gen hi; tuate a hong pian’ khiat ma-in note tungah a thute kong gen khol hi.”

Topa’ Hotkhiatna Lianpi Phatna

¹⁰ Topa’ tungah la thak sa un la, leimong panin amah phatna sa un! Tuipi leh a sunga omte, tuikulh gamte leh a tunga teeng mite aw, lasa un.

¹¹ Sehnel gam leh a khuapite, Kedar mite’ teen’na khua neute a aw uh sangkhai sak un; Sela gam-a teeng mite lungdamna tawh lasa sak un la, mual dawn panin amaute awng sak un.

¹² Topa a minthan’na ama tungah gen un la, tuikulh gamte ah amah phatna gen sak un.

¹³ Mi thahatpa bangin Topa kuankhia a, gal a do mipa bangin ama hanciamna so sak hi; amah kiko-in nakpi takin awng khia a, ama hatna a galte tungah a lak hi.

¹⁴ Pasian in hih bangin ci hi: Sau veipi sung ka dai om a, keimah leh keimah kikhamcip-in ka hi hit-hiat hi; tu-in numei nau suak ding bangin ka kiko khia ding a, ka kam ka-in ka tung-nak ding hi.

¹⁵ Mual liante leh mual neute ka susia ding a, a po kungte khempeuh ka keusak ding hi; gunte pen tuikulh ka suaksak ding a, bualtuite ka kangsak ding hi.

¹⁶ Amau’ theih loh lampi ah mittawte ka paipih ding a, amau’ theih ngei loh sul zuihpih-in ka kha ding hi. Amau’ mai-ah khuamial pen khuavak suaksakin, a phokna munte a tam-in ka bawl ding hi. Hihte pen keima hih ding nate hi a, tuate sem loin ka nusia kei ding hi.

¹⁷ A kisui milimte muangin, a kisung milimte kiangah, “Note in komau’ pasiante na hi uh hi,” a ci mite kinolh ding a, maizum mahmahin ki-om sak ding hi.

Israelte in Khalna tawh Phattuamna Ngah Lo

¹⁸ Bilngongte aw, za un; mittawte aw, na muh theih nadingun en un!

¹⁹ Ka nasempa bangin kua a mit taw a, keima sawl ka kamtaipa bangin kua a bil ngong ahi hiam? Keima thuciampihpa bangin kua a mit taw a, Topa’ nasempa bangin kua a mit taw ahi hiam?

²⁰ Israel in na tampi mu a, ahih hangin tuate encian lo hi; ama bilte kihong a, ahih hangin amah in khua za lo hi.

²¹ Ama dikna a khual manin Topa in a thukham liansakin vanglian sak nuam hi.

²² Ahih hangin ama mite pen a kiluh, a kisut mite hi a, leihawm sungah amaute khempeuh kikiasak a, thonginn sungah kiseel hi; amaute pen, a hon ding om lo, nek ding-a kiman ganhing suak khin uh a, kuamah in “Hong pia kik in,” a cih loh vankisutte suak khin ta uh hi.

²³ Note’ lakah khat peuhpeuh in hih thu na ngai ding uh hiam? Tu-a kipanin lim takin na ngai ding uh hiam?

²⁴ Kua in a sut gawppa tungah Jakob pia a, a luh gawpte’ tungah Israel pia ahi hiam? Topa mahmah in a piak hilo ahi hiam? Ama tungah eite i khial hi. Ama’ hong deih bangin i zui kei a, ama hong thuhilhnate i mang kei hi.

²⁵ Tua ahih ciangin amah in, ama hehna-so leh gal kidonate eite tungah hong tungsak hi. Israel mi khempeuh lakah mei bangin ama hehna hong kuang a, ahih hangin eite in bangmah i thei kei hi. Tua i thuakna hangin bangmah i phawk khia thei tuan kei hi.