Isaiah 35 - Tedim Bible

Pasian’ Mite A Ngei Tun’kik

¹ Gamlak leh lei keuna gam lungdam ding a, sehnel gam lungdamin palhkhia ding hi; unok pak bangin

² tampi takin palhkhia ding a, lung nopna leh lasakna tawh lungdam ding hi. Lebanon mual a minthan’na, Karmel mual leh Sharon mual, a min liatna ama tungah kipia ding hi. Amaute in Topa’ minthan’na, i Pasian’ liatna mu ding uh hi.

³ A zaw khutte khauhsak un la, a no khukte kipsak un.

⁴ Lungsim lauthawng mite kiangah, “Thakhauh un, lau kei un! En un, na galte uh tungah phu hong laksak dingin Pasian hong pai ding a, amah in note hong honkhia ding hi,” ci un.

⁵ Tua ciangin mittawte’ mit kihong ding a, bilngongte’ bil kihong ding hi;

⁶ tua ciangin khebai mipa pen sakhi bangin diangin lam ding a, a pau thei lo mipa in lungdamin la sa ding hi. Bang hang hiam cih leh gamlakah tui hong phulkhia ding a, sehnel gam sungah lui tui hong luang ding hi;

⁷ a sa mahmah sehnelte bualtui hong suak ding a, a keugaw leitang pen ciktui tawh hong kidim ding hi; ngiate’ omna ngei leitang pen nawngpi suakin, lopa, pumpeng leh mau po ding hi.

⁸ Tua lai-ah lam lianpi khat om ding a, Lampi Siangtho kici ding hi; a siang lo mite in tua tung tawn ngei lo ding a, mi haite in tua lam a zui mite khialsak nawn lo ding hi.

⁹ Tua lai-ah humpinelkai om lo ding a, sasialne ganhing khat peuhpeuh hong pai lo ding hi; tua lai-ah ganhing lauhuaite kimu lo ding hi. Topa’ tatkhiatsa mite in tua lampi tawnin hong ciah ding uh hi.

¹⁰ Topa’ tatkhiatsa mite hong ciah kikin, lungdam tawntungna mai pua-in lasa kawmin Jerusalem hong tung ding uh hi; amaute in lungdamna leh kipahna ngah ding uh a, dahna leh khuisatna om nawn lo ding hi.