Isaiah 32 - Tedim Bible

Thuman Kumpipa

¹ En un, ni khat ni ciangin thumanna tawh kumpi khat hong maang ding a, thutan’na tawh uliante in hong uk ding uh hi.

² Amaute pen, huihpi panin belhna, guahpi panin bukna bang ding uh a, sehnel gam sunga tui luang bangin, nisa gam sunga om suangpi liim bang ding uh hi.

³ Tua ciangin amau’ mit si loin, mi cimawhte’ kisapna mu ding a, amau’ bil in mi cimawhte’ thugen ngai ding uh hi.

⁴ Amaute lungtomin hi phangphang nawn lo ding uh a, deihsakna lungsim tawh tel takin thugen hiathiat ding uh hi.

⁵ Mi haite pen mi thupi kici nawn lo ding a, mi ginalote pen mi zahtakhuai kici nawn lo ding hi.

⁶ Bang hang hiam cih leh mi hai in haina thu gen a, a lungsim ah gitlohna om a, a hoihin gamtat loh ding, Topa’ thu a hilopi-in gen ding, a gilkialte’ an duhna a phat lohna ding leh dangtakte in tui dawn ding a neih theih loh nadingin, ama lungsim in mawhna bawl ding sawm hi.

⁷ Mi gina lote’ ginat lohna in sia hi; zuauna kam tawh mizawngte siasak leh mi cimawhte’ thu a thuman ciang nangawnin a siasak dingin amah in gitloh nasepna bawl hi.

⁸ Ahih hangin mipi lungsim a nei mi in na hoihte geel a, thu hoih nate ah a pang hi.

Jerusalem Numeite, Thu Kizasak Khol

⁹ Nuam tak-a a om hithiat numeite aw, tho un la, ka aw za un; nomau tum tak-a a lungmuang tanute aw, ka thugenna na ngai un.

¹⁰ Nomau thu tum tak-a a lungkim numeite aw, kumkhat val zek khit ciangin na liinglawng ding uh hi; bang hang hiam cih leh leenggah kum hong sia ding a, singgah lawhna hun hong tung lo ding hi.

¹¹ Nuam tak-a om hithiat numeite aw, liing un, nomau tum tak-a a lungmuangte aw, liinglawng un; na puan uh hawkkhia-in na tangguakun om un la, na kawng uhah puanhampi teeng un.

^12-13 A hoih mahmah lote leh tampi a gah leengguite a siatna, keima mite’ leitangah ling leh lingkungte a pona, leh lungdamna khuapi sunga lungdamna a omna innte a siatna hangin dahin na awm uh beng un.

¹⁴ Munmuanhuaite kinusia-in, mi tampi a omna kumpi khuapi kilawi ding hi. Mual leh tausangte zong kisia gawp ding a, late leh tuuhonte in gamtatna munin nei ding uh hi.

¹⁵ Ahi zongin Pasian in a Kha Siangtho hong puakkik ding hi. Leitang siate lo hoih hong suakkik ding a, lo-a ante hoih mahmah-in tulak bang ding hi.

¹⁶ Tua ciangin gamsung mun khempeuh ah thutang om ding a, thu a manin kisem ding hi.

¹⁷ Tua ciangin thumanna hangin nopna om ding a, thumanna hangin daihna leh lungmuan’ tawntungna om ding hi.

¹⁸ Ka mihingte pen kilem tak-a teen’na lungmuang tak-a omna inn, daii tak-a tawlngakna munah om ding uh hi.

¹⁹ (Tua ciangin gial in tulak kolh siangsak ding a, a khuapi pen cimzan ding hi.)

²⁰ Tui tampi a omna-ah khai tuh a, bawngtal leh late a ut utna-ah a ta sak note in mi lungdam na hi uh hi.