Isaiah 31 - Tedim Bible

Izipt mite Mihing Hi, Pasian Hilo Hi

¹ Izipt gamah huhna ngen dingin paisuk a, sakolte suan’ in a nei, leengte a tam manin muang a, sakol tuangte a hat mahmah manin a suang, ahih hangin Israelte’ Siangtho Pa a suang lo, Topa thu a dong lote in gimna ngah ta hen!

² Ahih hangin amah pil-in gimna tungsak a, a thu gensate dokkik loin, siatna bawl mite leh mawhna nasep a seppihte daan a pia hi.

³ Izipt mite mihing hi a, Pasian hilo hi; amau’ sakolte in sa hi a, kha hilo hi. Topa in a khut a zan ciangin a huhpa puk-in, huhna a ngahpa tuk ding a, amaute khempeuh siakhawm ding uh hi.

⁴ Bang hang hiam cih leh Topa in keima tungah hih bangin hong ci a, humpinelkai ahi a, humpinelkai khanglai in ahi zongin a sa nek ding a ngik ciangin, amah do dingin tuucingte honpi khat kisamkhia-in, amaute’ otna hangin lau tuan loin , amaute’ gamlumna hangin a sin a dawilok tuan loh mah bangin, Vanglianpen Topa zong Zion Mual tungah galdo dingin hong kuansuk ding hi.

⁵ A kot lamlam vasate bangin Vanglianpen Topa in Jerusalem dal ding hi; amah in dalin khahkhia ding a, amah in khengsuakin, suakta sak ding hi.

⁶ Israel mite aw, nakpi tak-a na dopa uh’ lamah kihei kik un.

⁷ Bang hang hiam cih leh a kuamah peuh in no adingin na bawlsa uh, mawhna ahi na ngun milimte uh leh na kham milimte uh na paihkhiat hun uh hong tung ding hi.

⁸ “Assiria pen mihing’ namsau ahi lo, namsau khat tawh puk ding a, mihing namsau ahi lo, namsau khat in susia ding hi; namsau panin tai ding uh a, a tangvalte uh zawhthawh thu tawh nasem dingin kikoih ding hi.

⁹ Amau’ belh a mun muanhuai uh, launa hangin tai ding a, buaina hangin a uliante in a lim uh taisan ding hi,” ama meikuang Zion ah a om, ama meikhuk Jerusalem khua ah a om Topa in ci hi.