Isaiah 20 - Tedim Bible

Assiria in Izipt leh Ethiopia Zo ding

¹ Assiria kumpipa Sargon in a sawl galkap mang lian penpa in Filistia khuapi Ashdod-ah pai-in, tua khua va do hi.

² Tua hun ma kum thum lai takin Topa in Amoz’ tapa Isaiah tung tawnin thu genin, “Na puanhampi suah in la, na khe panin na khedapte suah in,” a ci hi. Amah zong tua mah bangin gamta-in, tangguak leh kheguak tawh lam pai hi.

³ Ashdod khua a kilak khit ciangin Topa in, “Izipt leh Ethiopia’ lang khatah lim leh siahil dingin ka nasempa Isaiah tangguak leh kheguak tawh kum thum sung lam a pai mah bangin,

⁴ Assiria kumpipa in, Izipt gam mite’ maizumna ahi, a moi a hamin, tangguak kheguakin, tawbo dawksa-in, Izipt mite gal-in manin, Ethiopia mite sal-in manin paikhiatpih ding hi.

⁵ Tua ciangin amau’ muan Ethiopia leh amau’ kisialhpih Izipt’ hangin amaute lungkia-in a maizum ding uh thei lo ding uh hi.

⁶ Tua ni ciangin hih tuipi gei-a teeng mite in, “En un, eite’ muan Assiria kumpipa’ kiang pan a, eite huhin honkhia dingin i belh mite’ tungah hih bang piang khin ta hi. Eite bangci suahtak ding i hi hiam?’ ci ding uh hi,” a ci hi.