Isaiah 2 - Tedim Bible

Topa’ Uk Kimna Nuam

¹ Judah gam leh Jerusalem khua tawh kisai Amoz’ tapa Isaiah muhna thu in:

² Nidang ciangin Topa’ inn omna mual pen, mual liante lakah a sang penin kikipsak ding a, mual neute tungah kisangsak ding hi; tua-ah minamte khempeuh pai muamua ding uh a,

³ mi tampite hong pai-in: “Hong pai un, amah in ama zia-le-tongte eite hong hilh theih nading leh ama lampite i zuih theih nadingin Jakob’ Pasian’ inn, Topa’ mual-ah paito ni,” a ci ding uh hi. Bang hang hiam cih leh Topa in Zion panin thu hong gen ding a, Jerusalem khua panin Topa’ thuhilhna hong paikhia ding hi.

⁴ Amah in minamte khat leh khat kikal ah thukhenin, mi tampite’ thu khentat sak ding hi; amaute in a namsaute uh lo khawh na tu, a teipite uh singhiang heuhna temkawi-in seek ding uh hi; Minam khat leh minam khat kido nawn lo ding a, galdo dingin kithawi nawn lo ding uh hi.

A Kiphasakte’ tungah Topa’ Thukhenna

⁵ Jakob’ suan leh khakte aw, hong pai un, Topa’ khuavak sungah gamta ni.

⁶ Amaute pen nisuahna lam gam khongkhaite leh Filistia mite bangin aisante tawh kidim uh a, gamdang mite’ ngeina zui uh ahih manin, Jakob suan leh khakte, na mite nang na nial hi.

⁷ Amau gam in ngun leh kham tawh kidim a, amau sumte in bei hun cih nei lo hi; amau gam in sakolte tawh kidim a, amau leengte in bei hun cih nei lo hi.

⁸ Amau gam in milimte tawh kidim hi; amau’ khut tawh a bawlsate, a khutmete tawh a bawlsate amaute in bia uh hi.

⁹ Tua ahih ciangin mite kiniamkhiat sukin, mite a niamin kikoih suk hi. Amaute’ mawhna maisak kei in:

¹⁰ Topa kihtakna leh a lian ama minthan’na panin suanghawm sungah lut in la, leivui sungah bu in.

¹¹ Mite’ kiliatsakna pen kiniam koih ding a, mihingte’ kiphatsakna pen kiniam khiat ding hi; tua ni ciangin Topa bek a lianin kikoih ding hi.

¹² Bang hang hiam cih leh Vanglianpen Topa in a sehsa ni nei hi, a kiphasak leh a kiliansak khempeuh, a kisangsak leh a sangte khempeuh niamkhiat suk ding hi;

¹³ a sang, a kilamto, Lebanon mual taamtaak singkungte khempeuh; Bashan mual tawsaw kungte khempeuh;

¹⁴ alian mual sangte khempeuh leh a sang mual neute khempeuh;

¹⁵ tausang khempeuh leh a muanhuai kulhte khempeuh;

¹⁶ Tarshish teembaw khempeuh leh teembaw hoih khempeuh, a niam koih ding ni khat a nei hi.

¹⁷ Mite’ kiliatsakna kiniamkhiat ding a, mite’ kiphatsakna a niamin kikoih suk ding hi; tua ni ciangin Topa bek a lianin kikoih ding hi.

¹⁸ Milimte mangthang khin ding hi.

¹⁹ Leitung liingsak gawp dingin Topa a thawh ciangin, amah kihtakna leh alian ama minthan’na panin, suanghawm sung leh leihawm sungah mite bu ding uh hi.

^20-21 Amah pen leitung liingsak gawp dingin a thawh ni hun ciangin, Topa kihtakna leh alian ama minthan’na panin suang hawmpite sung leh keen hawmte sungah a buk theih nadingun, mite in biak ding a, amau bawl ngun milimte leh kham milimte pen buite leh bakte paih ding uh hi.

²² Ama’ nakvang sungah husan’na a om mipa muang kei in; Ama’ husanna pen banga sim tham ding ahi hiam?