Isaiah 17 - Tedim Bible

Damaskas tawh kisai Thu

¹ Damaskas tawh kisai thu:— En in, Damaskas in khuapi hi nawn loin, ninbulomtang suak ding hi.

² Ama khuapite ahi Aroer kinusiacip paisuak ding hi; tuuhonte’ omna ding suak ding a, amaute lum hithiatin bangmah in lausak lo ding hi.

³ Efraim gam panin kulhpi bei-in, Damaskas khua panin kumpi gam mangthang ding hi; Siria mi a suakta laite pen Israel mite vangliatna mah bang ding uh hi, Vanglianpen Topa in ci hi.

Israel tungah Thukhenna

⁴ Tua ni ciangin Jakob’ liatna bei ding a, ama hauhna mangthang ding hi.

⁵ An a la mi in ankung a ding laite kaikhawmin a khut in ante a lak khit ciangin leitang hawm guak ahi a, mi khat in Refaim Kuam sunga ansang a kaihkhop khit ciangin lo lai hawm guak tawh ahi zongin kibang ding hi.

⁶ Oliv kung a kisin’ ciangin a hiang sang pen dawnah pumnih pumthum, singkung hiang dawnah pumli pumnga a om lai tawh kibang ding hi, Israelte’ Topa Pasian in ci hi.

⁷ Tua ni ciangin mite in amaute a Bawlpa pi ngaihsut ding uh a, amaute’ mit in Israelte’ Siangtho Pa en ding uh hi;

⁸ amaute in ama’ khut tawh a bawlsa uh biakna taute don lo ding uh a, amau’ khutme tawh a bawlsa uh Asherah milimte hita leh paknamtui halna biakna taute hita leh suang ding uh hi.

⁹ Tua ni ciangin amau’ khuapi muanhuaite pen, Hiv mite leh Amor mite in Israel mite’ hanga a nusiat uh lingkung pona mun tawh kibang ding a, gamkhing suak ding hi.

¹⁰ Note in, nomau’ kihotkhiatna Pasian mangngilhin,nomau’ belh Suangpi phawk lo na hih manun note in biakna huan bawlin kung hoihte suan a, leenggui kung namdangte tawh peh-in,

¹¹ tuate na suan ni mah-un khang a, na tuh ni uh a zingsang mahin a pak hangin a gah om lo ding, cinatna leh a dam theilo natna hong tun’ ni hi ding hi.

¹² Ah, mi tampite’ kikona, tuipi ging bang! Ah, minamte’ otna, tui lianpi ging bang!

¹³ Tui lianpi a ging bangin minamte awng uh hi, ahih hangin amah in amaute tai ding a, gamlapi-ah amaute taikhia ding uh hi; mual tunga huih mai-ah ansi leeng bang leh huihpi mai-a pingpei bangin amaute lengkhia mang ding uh hi.

¹⁴ En un, nitakin hong lausak vat a, zingsang ma-in amaute bei ta! Hih bang thute pen, eite hong susia-in eite hong luh gawpte’ thuak ding ahi hi.