Isaiah 15 - Tedim Bible

Moab tawh kisai Thu

¹ Moab gam tawh kisai thu: Zan khat thu-in Ar khua kisiasak ahih manin Moab gam bei hi; zan khat thu-in Kir khua kisiasak ahih manin Moab gam bei hi.

² A sangna munte ah a kap dingin Dibon khuamite pai to uh hi; Nebo leh Medeba khuate’ hangin Moab mite nakpi takin kap uh hi. Dahna limin lu khempeuh kimettol a, khamul khempeuh kimetmai hi;

³ kongzing lakah amaute in puanhampi teng uh hi; innkhumzang leh kongzing lampi kituahnate ah mi khempeuh nakpi-in kapin khitui tawh kawt uh hi.

⁴ Heshbon khua leh Elealeh khua kiko a, amau’ kahna awging Jahaz khua ciang dongah kiza hi; tua ahih ciangin Moab gammi galhiam tawite lau-in nakpi takin kiko uh hi; amaute liing uh hi.

⁵ Moab gam adingin ka lungsim kiko hi; a galtai ama mite Zoar khua, Eglath-shelishiah khuate ah tai uh hi. Bang hang hiam cih leh Luhith lampi-ah amaute kapsa-in paito uh hi; Horonaim khua zuatna lampi ah amaute in siatna a thuakna uh hangin nakpi-in kiko uh hi;

⁶ Nimrim lui tuite kang hi; lopa keu-in, ankungte beita a, lopa hing om nawn lo hi.

⁷ Tua ahih ciangin amaute in a ngahsa uh leh a kholsa uh na tampite pua-in Gialheek Lui-ah paipih uh hi.

⁸ Bang hang hiam cih leh Moab gam kim khempeuh ah kahna aw ging hi; kahna in Eglaim khua ban a, kahna in Be-er-elim khua ban hi.

⁹ Bang hang hiam cih leh Dimon lui tuite pen sisan tawh kidim hi; ahi zongin Dimon khua in a thuak ding a nasia zaw om lai a, Moab gam panin a suakta mi leh gam sunga a om lai mite khempeuh humpi khat in negawp ding hi.