Hebru 5 - Tedim Bible

¹ Mi lakah a kiteelkhia siampi ukpa in mawhna taang ding biaknate leh piaknate mite ading a pia dingin Pasian tawh kipawl nate-ah a kikoih hi.

² Amah in thanem ahih ciangin a pil lo mite, a mawh mite a thuakpih dingin a siam hi.

³ Tua ahih ciangin mite mawhna leh ama mawhna taang dingin biakna a pia hi.

⁴ Pasian in Aaron a sap bangin a sap mite longal, kuamah in tua za a lian a la thei kei ding hi.

⁵ Tua mah bangin Khazih in zong siampi ukpa za a ngah nadingin ama pumpi a pahtawi kei hi. “Nang in ka Tapa na hi hi; Tuni-in nang kong piangsak hi,” ci-in a thu a piapa in Khazih a pahtawi hi.

⁶ Tua mah bangin Lai Siangtho mun khatah a gen-inah: “Nang in Melkhizedek’ pawl a tawntung Siampipa na hi hi,” a ci hi.

⁷ Tua Khazih in mi pumpi bangin a om lai takin, sihna pan a honkhia zopa kiangah kikona, khitui luan’na tawh thungenin thuum a, Pasian kihtakna lungsim hangin thungaihna ngahin,

⁸ Ta taktak ahi napi-in gimna tawlna a thuakna tawh thuman’na a sin hi.

⁹ Tua bangin a kicin’na a tun’ khit ciangin a thumang khempeuhte ading gup tawntungna a bawl mi suak a,

¹⁰ Melkhizedek’ pawl siampi lian hi ci-in Pasian in a min a phuak hi.

Upna Nusiat Loh Ding Hilhkholhna

¹¹ Tua Melkhizedek thu kote gen ding tampi a om hi. Ahih hangin note bil pil lo na hih uh ciangin a gen nading a haksa hi.

¹² Note in a sawt vei zo-in thuhilhte a suak khin ding na kilawm napi-un, Pasian thupiakna lakah a kisim masa, a bulpi thute, midangte kiangah khatvei na sin kik nading uh om ahih ciangin zan hak an sam loin, nawizu nete bek na hi uh hi!

¹³ Nawi bek a ne mi in naupang bang ahih ciangin dikna tawh kipawl thu a siam kei hi.

¹⁴ Ahih hangin an tak in a sia a pha khen theihna pilna a nei, zakna muhnate zangin zongsang a, amau leh amau a kiseksa, a picing mite’ ading ahi hi.