Gamlak-vakna 7 - Tedim Bible

Biakna tau Apna dinga Piakte

¹ Moses in biakbuk ding sakin, tua biakbuk leh a nazatte khempeuh sathau nuhin ap a, biakna tau leh a nazatte khempeuh sathau nuhin a ap a man ni-in,

² Israel makaite, a beh ukpite, minam makaite ahi a kisim mite a ukte in,

³ buk a nei leeng guk leh bawngtal sawm-le-nih Topa’ mai-ah paipih uh hi; leeng khatah makai nih, mi khatah bawngtal khat ciatin seh-in a biakna uh pia uh hi; amaute in biakbuk mai-ah tuate pia uh hi.

⁴ Tua ciangin Topa in Moses kiangah,

⁵ ”Kikhopna buk nasepna ah zat dingin amah tung panin tuate sang in la, a nasep ciat uh tawh kizui-in Levi mite pia in,” a ci hi.

⁶ Tua ahih ciangin Moses in leengte leh bawngtalte sangin Levi mite pia hi.

⁷ Amau’ nasep tawh kizui-in Gershon mite tungah leeng nih leh bawngtal li pia hi;

⁸ siampi Aaron’ tapa Ithamar’ ukna nuai-ah na a sem Merari mite tungah amau’ nasepna tawh kizui-in leeng li leh bawngtal giat pia hi.

⁹ Ahih hangin Kohath mite tungah bangmah pia lo hi, bang hang hiam cih leh liangko ah puak ding a siangtho nate kep ding amaute tavuan kipia hi.

¹⁰ Biakna tau sathau a kinuh ni-in a ap nadingin makaite in biakna pia uh hi; makaite in a biakna uh biakna tau mai-ah pia uh hi.

¹¹ Topa in Moses kiangah, “Biakna tau ap nadingin makai khat in ni khat tek a biakna uh pia ding uh hi,” a ci hi.

¹² A ni masa ni-a biakna a piapa in Judah minam, Amminadab’ tapa Nahshon ahi hi;

¹³ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

¹⁴ shekel sawm a gik kham pakan khat paknamtui a dim tawh;

¹⁵ meihal biak nadingin bawngtalno khat, tuutal khat, kum khat a pha tuuno a pa khat;

¹⁶ khialhna hanga biak nadingin keel a pa khat;

¹⁷ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Amminadab’ tapa Nahshon’ piak ahi hi.

¹⁸ A ni nih ni-in Issakhar mite a makai, Zuar’ tapa Nethanel in biakna pia hi;

¹⁹ a biak nadingin amah in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

²⁰ shekel sawm a gik kham pakan khat, paknamtui a dim tawh;

²¹ meihal biak nadingin bawngtalno khat, tuutal khat, kum khat a pha tuuno a pa khat;

²² khialhna hanga biak nadingin keel a pa khat;

²³ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Zuar’ tapa Nethanel’ piak ahi hi.

²⁴ A ni thum ni-in Zebulun mite a makai, Helon’ tapa Eliab ahi hi:

²⁵ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

²⁶ shekel sawm a gik kham pakan khat, paknamtui a dim tawh;

²⁷ meihal biak nadingin bawngtalno khat, tuutal khat, kum khat a pha tuuno a pa khat;

²⁸ khialhna hanga biak nadingin keel a pa khat;

²⁹ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Helon’ tapa Eliab piak ahi hi.

³⁰ A ni li ni-in Reuben mite a makai, Shedeur’ tapa Elizur ahi hi:

³¹ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak;

³² shekel sawm a gik kham pakan khat, paknamtui a dim tawh;

³³ meihal biak nadingin bawngtalno khat, tuutal khat, kum khat a pha tuuno a pa khat;

³⁴ khialhna hanga biak nadingin keel a pa khat;

³⁵ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Shedeur’ tapa Elizur’ piak ahi hi.

³⁶ A ni nga ni-in Simeon mite a makai, Zurishaddai’ tapa Shelumiel ahi hi:

³⁷ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

³⁸ shekel sawm a gik kham pakan khat, paknamtui a dim tawh;

³⁹ meihal biak nadingin bawngtal no khat, tuutal khat, kum khat a pha tuuno a pa khat;

⁴⁰ khialhna hanga biak nadingin keel a pa khat;

⁴¹ leh thunuam-a biak piakna dingin bawngtal nih, tuutal nga, keel a pa nga, leh kumkhat a pha tuuno a pa nga ahi hi. Hih in Zurishaddai’ tapa Shelumiel’ piak ahi hi.

⁴² A ni guk ni-in Gad mite a makai, De-uel’ tapa Eliasaf ahi hi:

⁴³ ama piakte in biakinn shekel tawh kizui-in shekel za leh, sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak;

⁴⁴ shekel sawm a gik kham pakan khat, paknamtui a dim tawh;

⁴⁵ meihal biak nadingin bawngtalno khat, tuutal khat, kum khat a pha tuuno a pa khat;

⁴⁶ khialhna hanga biakna dingin keel a pa khat;

⁴⁷ leh thunuam-a biakpiak nadingin bawngtal nih, tuutal nga, keel a pa nga,leh kum khat a pha tuuno a pa nga ahi hi. Hih in De-uel’ tapa Eliasaf piak ahi hi.

⁴⁸ A ni sagih ni-in Efraim mite a makai, Ammihud’ tapa Elishama ahi hi:

⁴⁹ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

⁵⁰ shekel sawm a gik kham pakan khat, paknamtui a dim tawh;

⁵¹ meihal biak nadingin bawngtal no khat, tuutal khat, kum khat a pha tuuno a pa khat;

⁵² khialhna hanga biak nadingin keel a pa khat;

⁵³ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Ammihud’ tapa Elishama’ piak ahi hi.

⁵⁴ A ni giat ni-in Manasseh mite a makai, Pedahzur’ tapa Gamaliel ahi hi;

⁵⁵ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

⁵⁶ shekel sawm a gik kham pakan khat, paknamtui a dim tawh;

⁵⁷ meihal biakna dingin bawngtalno khat, tuutal khat, kum khat a pha tuuno a pa khat;

⁵⁸ khialhna hanga biak nadingin keel a pa khat;

⁵⁹ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Pedahzur’ tapa Gamaliel’ piak ahi hi.

⁶⁰ A ni kua ni-in Benjamin mite a makai, Gideoni’ tapa Abidan ahi hi:

⁶¹ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak;

⁶² shekel sawm a gik kham pakan khat, paknamtui a dim tawh;

⁶³ meihal biak nadingin bawngtalno khat, tuutal khat, kum khat a pha tuuno a pa khat;

⁶⁴ khialhna hanga biak nadingin keel a pa khat;

⁶⁵ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Gideoni’ tapa Abidan’ piak ahi hi.

⁶⁶ A ni sawm ni-in Dan mite a makai, Ammishaddai’ tapa Ahiezer ahi hi;

⁶⁷ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak;

⁶⁸ shekel sawm a gik kham pakan khat, paknamtui a dim tawh;

⁶⁹ meihal biak nadingin bawngtalno khat, tuutal khat, kum khat a pha tuuno a pa khat;

⁷⁰ khialhna hanga biakna dingin keel a pa khat;

⁷¹ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Ammishaddai’ tapa Ahiezer’ piak ahi hi.

⁷² A ni sawm-le-khat ni-in Asher mite a makai, Okran’ tapa Pagiel ahi hi;

⁷³ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biak nadingin sathau tawh a kibawl annel a dim tuak;

⁷⁴ shekel sawm a gik kham pakan khat, paknamtui a dim tawh,

⁷⁵ meihal biak nadingin bawngtalno khat, tuutal pa khat, kum khat a pha tuuno a pa khat;

⁷⁶ khialhna hanga biak nadingin keel a pa khat;

⁷⁷ leh thunuam-a biak piak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Okran’ tapa Pagiel piak ahi hi.

⁷⁸ A ni sawm-le-nih ni-in Naftali mite a makai, Enan’ tapa Ahira ahi hi:

⁷⁹ ama piakte in biakinn shekel tawh kizui-in shekel za leh sawmthum a gik ngun kuangdai khat, shekel sawmsagih a gik ngun kuang khat, an tawh biakna dingin sathau tawh a kibawl annel a dim tuak;

⁸⁰ shekel sawm a gik kham pakan khat, paknamtui a dim tawh;

⁸¹ meihal biak nadingin bawngtalno khat, tuutal khat, kum khat a pha tuuno a pa khat;

⁸² khialhna hanga biak nadingin keel a pa khat;

⁸³ leh thunuam-a biakpiak nadingin bawngtal nih, tuutal nga, keel a pa nga, leh kum khat a pha tuuno a pa nga ahi hi. Hih in Enan’ tapa Ahira’ piak ahi hi.

⁸⁴ Hih in biakna tau sathau a kinuh ni-in Israel makaite apna biakna ahi hi: ngun kuangdai sawm-le-nih, ngun kuang sawm-le-nih, kham pakan sawm-le-nih,

⁸⁵ ngun kuangdai khat ciangin shekel za leh sawmthum gikin ngun kuang khat ciangin shekel sawmsagih gik a, ngun kuangte khempeuh in biakinn shekel tawh kizui-in shekel tulnih leh zali gik hi,

⁸⁶ paknamtui tawh a kidim kham pakan sawm-le-nihte in biakinn shekel tawh kizui-in khat ciangin shekel sawm gik a, kham khempeuh in shekel za leh sawmnih gik hi;

⁸⁷ meihal biak nadingin ganhing khempeuh in bawngtal sawm-le-nih, tuutal sawm-le-nih, kum khat a pha tuuno a pa sawm-le-nih, an-a a biaknate tawh; khialhna hanga biakna-in keel a pa sawm-le-nih,

⁸⁸ leh thunuam-a biak piakna-in ganhing khempeuh in bawngtal sawmnih leh li, tuutal sawmguk, keel a pa sawmguk kum khat a pha tuuno a pa sawmguk ahi hi. Hih in biakinn tau sathau a kinuh khit ciangin apna biakna ahi hi.

⁸⁹ Topa tawh kiho dingin kikhopna buk sungah Moses a pai ciangin, kherub nihte’ kikal, teci pan’na singkuang tungah a om hehpihna tokhom tung san teng panin amah a hopih awging khat a za hi; tua awging in amah hopih hi.