Gamlak-vakna 4 - Tedim Bible

Levi mite a Ki-ap Nasepte

¹ Topa in Moses leh Aaron kiangah,

² “Levi mite lak panin Kohath mite amau’ innkuankuan leh a beh beh-in,

³ kikhopna buk sungah na sem dingin na a sem thei ding kum sawmthum pan kum sawmnga a pha tapa khempeuh sim in.

⁴ Kikhopna buk sungah Kohath mite nasep ding in a siangtho pen nate ahi hi.

⁵ Giahphual a kisuan ding ciangin, Aaron leh a tapate tumin kidalna puan khia ding uh a, tua puan tawh teci pan’na singkuang tun ding uh hi;

⁶ tua ciangin amaute in savun tawh tuam ding uh a, tua tungah puan a dum tawh khuhin, a zawlte bulh ding uh hi.

⁷ Ompihna Anlum sabuai tungah amaute in puan a dum phah ding uh a, tua tungah a kuangdaite, paknamtui pakante, kuang-ukte, tuibuahna thawl gongbakte koih ding uh hi; a kikoih tawntung anlum zong a tungah om ding hi;

⁸ tua ciangin amaute in a ausan puan tawh tuate khuh ding uh a, savun tawh khuh thuahin, a zawlte bulh ding uh hi.

⁹ Mei vakna meivak khuam pen, a meivakte, a taitehte, a kuangte, leh sathau piakna nazatte khempeuh tawh puan a dum khat-in tun ding uh hi:

¹⁰ amaute in a nazat khempeuh tawh savun-in tunin a puak nading tal tungah koih ding uh hi.

¹¹ Puan a dum khat tawh kham biakna tau khuh ding uh a, savun tawh tua mah tuam thuahin, a zawlte bulh ding uh hi;

¹² amaute in biakinn sungah a kizang nazat khempeuh la-in puan a dum khat tawh tunin, savun tawh tuate tun thuah ding uh a, a puak nading tal tungah koih ding uh hi.

¹³ Amaute in a sumngo biakna tau panin a vutte luak khia ding uh a, a tungah puan a dupsan khat phah ding uh hi;

¹⁴ tua lai-ah nasep nadinga a kizang, biakna tau nazat khempeuh, a vut luahna peek, a tu-ka, a kawbia, leh a kuang, biakna tau nazat khempeuh, a tungah koih ding uh hi; tua tungah savun tawh tuam ding uh a, a zawlte bulh ding uh hi.

¹⁵ Aaron leh a tapate in biakinn leh biakinn nazat khempeuh a tun khit uh giahphual a kisuan ding ciangin, tuate a pua dingin Kohath mite pai ding uh a, ahih hangin amaute in a siangtho nate lawng kha lo ding uh hi; lawng leh si ding uh hi. Hihte in Kohath’ mite puak ding kikhopna buk nate ahi hi.

¹⁶ “Siampi Aaron’ tapa Eleazar in meivak tui, a namtui paknamtui, a kikoih tawntung an tawh biakna, nilh sathau, leh biakbuk leh a sunga om khempeuh, biakinn leh a nazatte khempeuh uk ding hi,” a ci hi.

¹⁷ Topa in Moses leh Aaron’ kiangah,

¹⁸ “Levi mite lakah Kohath minamte a siat loh nadingin hih in;

¹⁹ a siangtho pen nate nai-ah amaute a pai ciangin si loin a hin’ na dingun hih un: Aaron leh a tapate pai-in a nasep ding uh leh a van puak ding ciat uhah amaute seh ding uh hi,

²⁰ ahih hangin a siangtho nate tom khano sung bek nangawn a en dingin amaute tum lo ding uh hi, tum leh si ding uh hi,” a ci hi.

²¹ Topa in Moses kiangah,

²² “Gershon mite zong, amau’ innkuankuan leh a beh beh-in sim in,

²³ kikhopna buk sungah nasem dingin na a sem thei ding kum sawmthum pan kum sawmnga a pha tapa khempeuh na sim ding hi.

²⁴ Nasep leh van puak ciangin Gershonte beh nasep ding;

²⁵ amaute in biakbuk dalna puante, kikhopna buk a tuamna tawh, a tung zang a, om a khuhna tuuvun, kikhopna buk kongkhak-a puankhai,

²⁶ buktual-a a kikhaite, biakbuk leh biakna tau kimkotah a om buktual kongpi puankhaite, a khaute, leh amau’ nasepna dinga nazat khempeuh pua ding uh hi; amaute in tuate tawh a kizom nasep kisam khempeuh sem ding uh hi.

²⁷ Gershon beh pasalte nasep ding, a puak ding leh a hih dingte khempeuh uh Aaron leh a tapate’ thupiakna bang hi ding hi; a puak ding khempeuh uh amaute na ap ding hi.

²⁸ Hih in kikhopna buk sungah, Gershon beh pasalte nasep hi a, amau’ nasep in siampi Aaron’ tapa Ithamar’ ukna nuai hi ding hi.

²⁹ “Merari mite zong amau’ innkuankuan leh a beh beh-in na sim ding hi;

³⁰ kikhopna buk sungah na a sem thei ding kum sawmthum pan kum sawmnga a pha tapa khempeuh na sim ding hi.

³¹ Kikhopna buk sungah amau’ nasep dingte khempeuh biakbuk khuampeekte, a zawlte, a khuampite, khuam bullente tawh,

³² a kimkot-a om buktual-a khuampite a bullente tawh, khetphimte, a khaute, a nazatte khempeuh leh a nengnengte ahi hi; amaute’ puak dinga a kiseh nate a minin na lo ding hi.

³³ Hih in siampi Aaron’ tapa Ithamar’ khut nuai-ah Merari mite in kikhopna buk sungah a sep ding teng uh ahi hi,” a ci hi.

³⁴ Moses leh Aaron leh mi honte’ makaite in Kohath mi tapate a innkuankuan leh a beh beh-in,

³⁵ kikhopna buk sungah na sem dingin na sem thei ding kum sawmthum pan kum sawmnga a pha mi khempeuh a sim uh hi;

³⁶ a beh tangun tulnih leh za sagih leh sawmnga pha hi.

³⁷ Topa in Moses a thupiakna bangin Moses leh Aaron in a sim, kikhopna buk sungah na a sem, Kohathte beh in hih zah ahi hi.

³⁸ Gershon mite a innkuankuan leh a beh beh-in,

³⁹ kikhopna buk sungah na sem dingin na a sem thei ding kum sawmthum pan kum sawmnga a pha tapa khempeuh—

⁴⁰ a innkuankuan leh a beh beh-in tulnih leh zaguk leh sawmthum pha hi.

⁴¹ Topa’ thupiakna bangin Moses leh Aaron in a sim, kikhopna buk sungah na sem Gershonte beh in hih zah ahi hi.

⁴² Merari mite a innkuankuan leh a beh beh-in,

⁴³ kikhopna buk sungah na sem dingin na a sem thei kum sawmthum pan kum sawmnga a pha tapa khempeuh—

⁴⁴ a beh tangun tul thum leh zanih ahi hi.

⁴⁵ Topa in Moses a thupiakna bangin Moses leh Aaron in a sim, Merari beh in hih zah ahi uh hi.

⁴⁶ Moses leh Aaron leh Israel makaite in a sim, Levi mi a kisim peuhmah, a innkuankuan leh a beh beh-in,

⁴⁷ kikhopna buk sungah van puak nasep leh nasep a sem thei ding kum sawmthum pan kum sawmnga a pha,

⁴⁸ a kisim tapa khempeuh tulgiat leh zanga leh sawmgiat pha hi.

⁴⁹ Moses tung tawnin Topa’ thupiakna bangin a sep ding a puak ding ciat uh kiseh hi; Moses in Topa’ thupiak bangin amaute sim hi.