Galati 4 - Tedim Bible

¹ Ahih hangin ke’n kong cih-inah, innluahpa in sum khempeuh a ukpa ahih hangin a neu lai takin sila tawh a kilamdang kei hi.

² A pa thuciamna a hun a tun’ matengin amah in a cingte leh a keemte’ khut nuai-ah a om hi.

³ Tua mah bangin eite i neu lai takin leitung thungeek khut nuai-ah sila in, i om hi.

^4-5 A hun a cin’ ciangin eite in tapa’ za i ngah nadingin Thukham khut nuai mite tankhia dingin numei gil sungah hong gai-in, Thukham khut nuaiah a hong suak a Tapa Pasian in a sawl hi.

⁶ Tua bangin note in tate na suak uh ahih ciangin,“Abba, Pa,” cisakin a Tapa’ Kha Siangtho eite lungsim sungah Pasian in hong sawl hi.

⁷ Tua ahih ciangin sila hi nawn loin tapa na hi uh hi. Tapa na hih uh leh, Pasian hangin innluahpa zong na hi uh hi.

Thu-um Mite Ading Paul’ Lunghihmawhna

⁸ Ahih hangin note in tua hun lai takin Pasian na theih loh lai takun a pian’ lim in Pasian ahi lo mite’ sila-in na om uh hi.

⁹ Tu-in ahih leh, note in Pasian na thei khin uh tham loin, Pasian in note hong theih khit ciangin, thahat lo, nopna hong pia thei lo thungeek lamah, a bang hangin kihei kikin sila kaikik nuam na hi uh hiam?

¹⁰ Note in nite, khate, hunte, kumte na tang ta uh hi!

¹¹ Note adingin a mawkna-in ka hahkat hi ci-in note thu hangin lunghimawhin ka om hi.

¹² Ute naute aw, keimah in note bang ka hih maninah keimah bangin na hi un ci-in ka hong thuum hi. Keima tungah note in a neukha beek na khial kei uh hi.

¹³ Ahih hangin keimah in a masa-in pumpi dam lohna hangin note kiangah Lungdamna Thu ka hong hilh na thei uh hi.

¹⁴ Keima sungah a om note thuak ze-etna note in ngaihsun loin, nial loin Pasian’ vantungmi bang ka hi zongin, Khazih Zeisu bang ka hi zongin, na hong sang uh hi.

¹⁵ Tua ahih leh, note lungdamna thupha koi lam tungsak ta na hi uh hiam? Na mittang uh lakhia-in, kei hong pia thei hi le-uh cin nong pia zo ding uh hi ci-in note ading teci ka pang hi.

¹⁶ Tua ahih leh, keimah in thuman thutak note kiangah ka hong gen ciangin note’ gal suak ka hi hiam?

¹⁷ Tua mite in note a kilawmin hahkatin hong zo lo tham loin, note in amaute na zon’ nadingun a pua lamah note hong koih nuam ahi uh hi.

¹⁸ Ahih hangin a hoihna zon’na ngahna in nomau tawh ka omkhawm laitak bek hi loin, a tawntung hoihna ahi hi.

¹⁹ Khazih in note sungah kip-a, a om matengin note ading ta suak gimna ka thuak ka ta neute aw,

²⁰ tu-in note tawh omkhawmin ka kam pauna ka kheel nuam hi. Bang hang hiam na cih uh leh, nomau hangah ka lungmang hi.

Hagar Leh Sarah Thugentehna

²¹ Thukham nuai-ah a om nuamte aw, note in Thukham za lo na hi uh hiam, kei kiangah hong gen un.

²² Lai Siangtho sungah: “Abraham in tapa nih a nei hi. Khat in sila numei tawh a neih tapa ahi hi, khat in sila hi lo numei tawh a neih tapa ahi hi,” ci-in a kigelh hi.

²³ Sila numei’ tapa in ci-le-sa ngeina bangin a suak hi. Sila lo numei’ tapa ahih leh, thuciamna hangin a suak hi.

²⁴ Tua thute-ah genteh nadingin a om hi. Tua numeite in thuciamna nih ahi uh hi. Hagar ahi numei khat in Sinai Mual tung pan hong piang, sila suahsak nading thu ahi hi.

²⁵ Tua Hagar in Arabia gam Sinai Mual hi a, tu-in a om Jerusalem khua tawh kibang hi. Bang hang hiam na cih uh leh, amah in a tate tawh sila-in a om hi.

²⁶ Ahih hangin tung lamah a om Jerusalem khua ahih leh, eite nu ahi, sila numei hi lo numei ahi hi.

²⁷ Lai Siangtho sungah: “Ta suak ngei lo a ciing numei aw, na lungdam in! Nausuak gimna a thuak ngei lo numei aw, kiko in! Bang hang hiam na cih uh leh, pasal a nei numei’ tate sangin, A kipaaikhia numei in ta tamzaw a nei hi,” ci-in a kigelh hi.

²⁸ Ute naute aw, eite in Isaak bangin kiciamna tawh kipawl tate i hi hi.

²⁹ Ahih hangin tua lai taka ci-le-sa ngeina bangin a suak ta in Kha Siangtho vangliatna tawh a suak ta pen a bawlsiat mah bangin tu-in zong ahi hi.

³⁰ Ahih hangin Lai Siangtho in bang ci gen hiam? “Sila-numei a tapa tawh hawlkhia in. Silanu’ tapa in sila lo numei’ tapa tawh innluah khawm thei lo ding hi,” ci-in a gen hi.

³¹ Tua ahih ciangin ute naute aw, eite in sila-numei’ tate i hi kei hi: sila-lo numei’ tate i hi hi.