Galati 1 - Tedim Bible

Hopihna

¹ Mite kiang pan hi lo, mite’ thu tawh hi lo, Zeisu Khazih’ thu tawh ahi zongin, tua Zeisu sihna panin a thosak Pa Pasian’ thu tawh ahi zongin sawltak ahi keimah Paul akipan,

² keimah tawh a omkhawm ute naute khempeuh in Galati gamah a om pawlpite kiangah ka hong zasak uh hi.

³ I Pa Pasian leh Topa Khazih kiang pan hehpihna thupha leh nopna in nomau tungah om ta hen.

⁴ Tua Zeisu in Pasian’ deihna tawh kituakin a gilo ahi hih leitung pan eite hong gumkhia dingin ah eite khialhna ading ama pumpi kipia hi.

⁵ Tua Pasian in minthan’na ngah tawntung ta hen! Amen.

Lungdam Thu Adang Om Lo

⁶ Khazih’ hehpihna thupha hangah note hong sampa tawh hih zah taka manlangin kikhenin ‘lungdamna thu’ na sang uh ahih ciangin lamdang ka sa hi!

⁷ Tua Lungdamna Thu in ‘lungdamna thu dang’ ahi kei hi. Note hong bawlsia-in Khazih’ Lungdamna Thu a lumlet nuam mi kimkhat a om uh hi.

⁸ Ahih hangin nomau kiangah ka hong hilh uh Lungdamna Thu longal adang Lungdamna Thu kote ahi zongin, vantung pana hong pai vantungmi khat ahi zongin, hong hilh mi in hamsiatna thuak ta hen.

⁹ Na san’sa uh Lungdamna Thu sim loh lungdamna thu a dang, mi khatpeuh peuh in hong hilh leh, tua mi in hamsiatna thuak ta hen, ci-in ka cihsa bangin tu-in ka ci kik hi.

¹⁰ Tu-in keimah in mi’ deihna zui ka hi hiam? Ahih kei leh, Pasian’ deihna zui ka hi hiam? Mite’ pahtak ding hanciam ka hi hiam? Mite’ pahtak nading hanciam ka hih leh, Khazih’ sila ka hi kei hi.

Paul Sawltak A suahna

¹¹ Ute naute aw, keimah in ka hilh Lungdamna Thu in mite’ thu ahi kei hi,

¹² mite kiang pan ka ngah ahi kei hi, mite kiangah ka sin zong ahi kei hi. Zeisu Khazih’ thupiakna hang bekin ka ngahna thu note kiangah ka hong zasak hi.

¹³ Bang hang hiam na cih uh leh, nidang lai-in Judah ngeina zui-in ka om a, ka gamtat ahi Pasian’ pawlpi a kigen thei loin ka bawlsiat a, ka sukgawp thu ahi zongin,

¹⁴ ka pu ka pate’ khut tung pan ka ngah ngeina siamin ka zuih zawk thu ahi zongin note in na thei uh hi.

¹⁵ Ahih hangin ka nu’ gil sung pan hong teelkhia a, ama hehpihna thupha tawh hong sam Pasian in,

¹⁶ a Tapa’ Lungdamna Thu Gentailte kiangah hilh dingin, ama deihna tawh kituakin ama Tapa kei sungah a kilatsak ciangin, keimah in si-le-sa tawh vaihawm loin,

¹⁷ eimah sawltak a suak mite omna Jerusalem khua-ah zong pai loin Arabia gamah pai-in khatvei Damasakas khua-ah ka ciahkik hi.

¹⁸ Tua nung kumthum khit ciangin Kefas tawh kimeltheih nadingin Jerusalem khua-ah pai-in amah tawh nisawm leh ninga ka omkhawm hi.

¹⁹ Amah leh Topa’ nau Jeim longal adang sawltakte khat beek ka mu kei hi.

²⁰ nomau kiangah hih bangin ka zaksakna-ah thu zuau ka zang kei hi ci-in Pasian mai-ah ka kiciam hi.

²¹ Tua nung ciangin Siria gam leh Kilikia gamah pai-in

²² Judah gama Khazih sungah a om pawlpi mite in ka meel-in hong ciamteh uh hi loin,

²³ “Eite hong bawlsia ngei mi in nidang lai a, a sukgawpsa upna thu, tu-in amahmah in a hilh hi,” ci-in a zakna bek uh tawh

²⁴ keimah hangin Pasian’ min a phat uh hi.