Ezra 5 - Tedim Bible

Biakinn Kilamkik

¹ Tu-in kamsangte Haggai leh Iddo’ suan Zekhariah in Judah gam leh Jerusalem a, om Judah mite hanthawnin, Israel Pasian’ min tawh thu genkhol uh hi.

² Tua ciangin Shealtiel’ tapa Zerubbabel leh Jozadak’ tapa Jeshua in Jerusalem a, Pasian’ inn lamkik ding kipan pah uh a, Pasian’ kamsangte in amaute ompihin huh uh hi.

³ Tua lai takin Eufrates Gungal gam sung teng a uk sawn Tattenai, Shetharbozenai, leh amau’ lawmte hong pai pahin amaute kiangah, “Note in hih inn lamkikin a nate na bawl nading uh kua in thu hong pia ahi hiam?” a ci uh hi.

⁴ Hih inn lam nasepna-ah a sem mite’ min zong amaute in dong uh hi.

⁵ Ahi zongin Judah upate in Pasian’ vilna sungah nasem hi uh a, Darias’ kiangah a thu va tungin ama tung panin thu a kingah kik hun dong a nasep zomna uh kikhaktan lo hi.

⁶ Eufrates gungal gam a uk sawn Tattenai, Shetharbozenai, leh Eufrates gungal gam sung thu a vaan ama lawmte in kumpi Darias’ tungah laikhak uh hi.

⁷ Amaute in thuzaksakna lai hih bangin a gelh uh hi: “Kumpi Darias tungah thupha namcin hong tung ta hen.

⁸ Judah gam, alian Pasian’ innah ka va paina uh kong theisak uh hi. Tua inn pen suang lianpite tawh kilamin a kawmte sing tawh kibawl hi; hih inn lim takin kisemin amau’ makaihna tawh a nasep uh telh mahmah uh hi.

⁹ Hih inn a lamkik nading leh a nate a zawh nadingin kua in thupia hiam? cih thu hih upate tungah ka dong uh hi.

¹⁰ Nangmah in a makai teng na theih nadingin amaute’ min zong ka dong uh hi.

¹¹ Amaute in hih bangin hong dawng uh hi: ‘Kote in vantung leh leitung Pasian’ nasemte ka hi uh a, kum tampi lai-a a kilamsa inn a lamkik ka hi uh hi; a lian Israel kumpi khat in lamin a zawhsa ahi hi.

¹² Ahi zongin ka pu ka pate un vantung Pasian hehsak kha uh ahih manin Babilon kumpipa, Khaldea mi Nebukhadnezzar’ khut sungah amaute pia hi; tua kumpipa in hih inn susia a, a mite Babilon ah ciahpih hi.

¹³ Ahi zongin Babilon kumpipa Sairas’ uk a kum khatna kumin hih Pasian’ inn a kilamkikna ding amah in thupia hi.

¹⁴ Tua tham loin Jerusalem a, biakinn sung panin Nebukhadnezzar in la-in Babilon biakinn sunga a koih ahi Pasian’ inn sunga kham leh ngun tawh kibawl um-le-beelte zong kumpipa Sairas in Babilon biakinn panin la khia-in gam uk a, a hong koih Sheshbazzar min neipa tungah ap hi;

¹⁵ kumpipa in ama tungah, “Hih um-le-beelte paipih in la, Jerusalem a, biakinn ah va koihkik in; tua lai-a Pasian’ inn pen a mun ngei mah ah lamkik sak in,” ci hi.

¹⁶ Tua ciangin Sheshbazzar hong pai-in Jerusalem a, Pasian’ inn a bulpi hong phut hi; tua huna kipanin tu dong inn lamkik kisem suak a, ahi zongin kizo nai lo hi,’ a ci uh hi.

¹⁷ Tua ahih ciangin hoih na sak leh, Jerusalem a, hih Pasian’ inn a kilamkik nading thu kumpipa Sairas in thupia taktak hiam, pia taktak lo hiam cih a kitheih nadingin Babilon khua sunga om laibu koihna inn sung zong sak in. Tua khit ciangin kumpipa in na deihna hong zasak in,” a ci uh hi.