Ezra 3 - Tedim Bible

Pasian Biakna a Ki-omsak Kikna

¹ A kha sagihna hong cin’ ciangin Israel mite amau’ khuapi ciatah teeng khin uh ahih manin, khe khat khai bangin Jerusalem ah amaute hong kituah diam uh hi.

² Tua ciangin Jozadak’ tapa Jeshua leh a siampi pihte, leh Shealtiel’ tapa Zerubbabel leh a behte hong kipan uh a, Pasian’ mi Moses’ thukham sungah a kigelh bangin meihal biaknate piak nadingin Israel Pasian’ biakna tau bawl uh hi.

³ Amaute in tua gama midang teengte kihta uh ahih manin a mun lui mah-ah biakna tau phut pahin zing leh nitak simin Topa tungah meihal biakna pia uh hi.

⁴ Tua ciangin amaute in a kikipsaksa bangin buk pawi bawl uh a, ni simin zat dingin a kisehsa zah bangin meihal biakna ni simin pia uh hi;

⁵ tua ciangin hihte banah a tawntunga meihal biakna, khadet sim-a biakna leh Topa’ pawi a kisehsa hun khempeuh leh Topa’ tungah amau’ ut thu tawh a pia mite khempeuh’ piaknate zong pia uh hi.

⁶ Topa’ biakinn a bulpi a kiphuh nai loh hangin a kha sagihna a ni masa ni-a kipanin amaute in Topa tungah meihal biaknate piak ding kipan uh hi.

⁷ Tua hi a, amaute in suangseekte leh khutsiamte tungah sum pia uh a, Persia kumpipa Sairas’ tung panin a thu ngahna bangun Lebanon mualtung gam panin tuipi gei Joppa khua ah taamtaak singte a hong puaksuk ding Sidon khuamite leh Tai-ar khuamite tungah zong annek tuidawn leh sathau a pia uh hi.

Biakinn Lamkik Kipan

⁸ Amaute, Jerusalem a, Pasian’ innah hong ciahkik uh a kum nihna, tua kum a kha nihna sungin Shealtiel’ tapa Zerubbabel leh Jozadak’ tapa Jeshua in nasep kipan uh a, ama Israel mipihte, siampite leh Levi mite leh salsuahna panin Jerusalem ah a hong ciahkik mite khempeuh in huh uh hi. Amaute in Levi mite kum sawmnih panin a tungsiah peuhmah Topa’ inn sungah biakna nasepte a vaan dingin seh uh hi.

⁹ Jeshua a tapate leh a behte tawh, Kadmiel, Binnui, leh Hodaviahte in Henadad’ tapate leh Levi mi a tapate uh leh a behte uh tawh Pasian’ innah nasemte tungah ukna tavuan la khawm uh hi.

¹⁰ Innlamte in Topa’ biakinn a bul a phuh uh ciangin, Israel kumpipa David in a geel kholhsa bangin Topa a phat dingin siampite in a puan uh silhin peengkul tawh, Asaf tapa Levi mite in daltuah tawh a panmun ding uhah hong pang uh hi;

¹¹ tua ciangin amaute in Topa phatna leh lungdam kohna a kidawngin sa uh a, “Topa tungah lungdam koh ding hoih hi, bang hang hiam cih leh Israelte hong itna kip tawntung hi,” a ci uh hi. Topa’ inn bulpi kiphut khin ahih manin mi khempeuh in nakpi takin Topa phat uh hi.

¹² Mi dang tampi in a aw neih zah-un lungdamin a kiko uh hangin a inn masa a mu ngeisa siampite leh Levi mite leh innkuan lutang, midang tampite in hih inn bulpi a kiphuh a muh uh ciangin kap-in thuum uh hi.

¹³ Mite nakpi takin kiko ahih manin lungdamna awging leh kahna leh thuumna awgingte mite in khen thei lo uh hi; gamlapi pek panin tua awging kiza hi.