Ezra 1 - Tedim Bible

Sairas’ Taangkona

¹ Persia kumpipa Sairas’ kum khatna kumin, Jeremiah’ tung tawnin Topa’ thugen a tun’ theih nadingin, ama gam sung khempeuh ah tangkona khat bawlin lai-in zong a gelh nadingin Persia kumpipa Sairas’ lungsim ah Topa in suak sak hi. Amah in hih bangin hih hi:

² “Persia kumpipa Sairas in hih bangin ci hi: Vantung Pasian, Topa in leitung kumpi gam khempeuh keima tungah hong piakhin a, Judah gam sung Jerusalem khua ah ama adingin inn khat ka lamsak ding hong sawl hi.

³ Note’ lakah ama mi peuhmah a Pasian in ompih hen la, Judah gam sung Jerusalem khua-ah paito hen la, Israel Pasian, Topa’ inn lam kik hen— amah in Jerusalem ah a om Pasian ahi hi;

⁴ tua ciangin koi lai koi lai muna om hi taleh Judah mi a om lai khempeuh, a omna mun mite in Jerusalem-a om Pasian’ inn adingin ut thu-a piakna a piakte uh banah, ngun leh kham, nate leh ganhingte tawh zong huh uh hen,” a ci hi.

Jerusalem ah Salte a Ciahkikna

⁵ Tua ciangin Judah leh Benjamin sunga innkuan lutangte, leh siampite leh Levi mite, Jerusalem khua-a a om Topa’ inn lamkik dingin a lungsim sung uhah Pasian in a suahsak mite khempeuh kithawi uh hi;

⁶ tua ciangin a veng a pamte un thatang tawh a huh uh banah ngun tawh kibawl um-le-beel, kham, van tuamtuamte, ganhingte leh letsong manphate tawh huh thuah uh hi.

⁷ Tua tham loin, Nebukhadnezzar in Jerusalem panin puakhia-in ama pasiante’ inn sungah a koihsa ahi Topa’ inn-a om ngei um-le-beelte zong kumpipa Sairas in pusuah hi.

⁸ Persia kumpipa Sairas in hihte pusuahin sumkempa Mithredath’ khut sungah ap hi; tuapa in Judah ukpa Sheshbazzar’ adingin a mal zah simin sazian bawlsak hi.

⁹ Tua nate a phazah in: kham kuang-uk sawmthum, ngun kuang tulkhat, tem nam tuamtuam sawmnih-le-kua,

¹⁰ kham kuang sawmthum, ngun kuang-uk anam tuamtuam zali sawmkhat leh um-le-beel adang tulkhat ahi hi.

¹¹ Kham leh ngun kibawl um-le-beelte khempeuh a vekpi-in tulnga leh zali pha hi; tua hi a, Babilon panin salte a kiciahpih kik ciangin Sheshbazzar in tua nate khempeuh Jerusalem ah ciahpih hi.