Ezekiel 41 - Tedim Bible

¹ Tua ciangin a mipa in a laizanga om inndei-ah hong paipih hi. Tua inndei lutna lampi teh a,

² tong sawm zai a, a pang tuaka om kawmte tong nga tuak sah hi. A laizanga om inndei sung a teh ciangin tong sawmli sau a, tong sawmnih zai hi.

³ Tua ciangin inndei tawngnungah amah pai a, tua sung lutna lampi a teh ciangin tong nih sau-in tong guk zai a, a pang tuaka om kawmte tong sagih tuak sah hi.

⁴ Tua inndei tawngnung a teh ciangin a dung a vai tong sawmnih tuak pha hi. Tua ciangin amah in kei kiangah, “Hih lai in Siangthopen Mun ahi hi,” hong ci hi.

⁵ Tua ciangin amah in biakinn kawm puanung teh a, tong guk tak sah hi. Hih kawm tawh a kimatin biakinn kimkotah inndei neuneu om a, tuate tong li vive zai hi.

⁶ Hih inndei neute dawl thum pha a, dawl khat gual paiphei suak-ah inndei neu sawmthum om hi. Tua inndei neute a dawl san’na tawh kizui-in a biakinn kawm pa to tektek a, tua inndei neute a nang dingin khuam a tuamin kul loin a biakinn kawm kimang toto hi.

⁷ Tua biakinn kawm pang bel-a kibawl inndei neute sungah kahlei om to a, a dawl nuainung panin a tungnung dongin kizom to hi. A inndei neute a dawl a san’na lamah a biakinn kawm a paat tektek mah bangin a sang lama om inndei neute a sung zai semsem hi.

⁸ Biakinn kimkot teng a lei kitawito a, a mun dangte sangin tong gukin sangto zaw hi. Tua mun panin biakinn kawm leh a kimkota inndei neute kipan to pan hi.

⁹ Inndei neute a kawm sahna tong nga pha a,

¹⁰ biakinn kimkotah suangphah bangin a kitawito-a kibawl a zaina in tong sawmnih ahi hi.

¹¹ Biakinn kimkot-a om inndei neute-ah paina ding kongvang, leilu lamah khat omin, leitaw lamah khat om hi. Tua biakinn kimkotah tong nga paisuak a zai cial khat om leuleu hi.

¹² Tua ciangin nitumna lamah biakinn lam a nga inn khat om hi. A inn dung tong sawmkua hi a, a vai tong sawmsagih hi a, a kimkota a kawm tong nga sah hi.

¹³ Tua ciangin mipa in biakinnpi teh a, tong za khat pha hi. A kimkota mun awng, a innsung leh a kawm tawh kigawmin tong za khat ahi hi.

¹⁴ Nisuahna lam pang biakinn mai lam a vai lamin a mun awng tawh kigawmin tong za khat mah ahi hi.

¹⁵ Tua ciangin biakinn nitumna lam pangah a om, a tual lam a nga inn a sauna teh a, a kawm tegel tawh kigawmin tong za mah pha hi. Biakinn sung lut nading inndei, leh a inndeipi, leh Siangthopen Mun sungte pen

¹⁶ a sual panin a kongvangneute ciang dong singpeek tawh kidap hi. A kongvangneute pen a pualam a kihui-a kibawl ahi hi.

¹⁷ Biakinn sung lam kawmte pen kongkhak zang ciang dong lim kibawlte tawh kidim a,

¹⁸ nisuh kungte leh kherub limte vive ahi hi. Amasa-in nisuh kung, tua ciangin kherub, nisuh kung, kherub cih bangin a kimkot khempeuh ah kihelh to dimdiam hi. Tua kherubte in maitang nih ciat nei uh hi.

¹⁹ A mihing maitang in a pang khat lama om nisuh kung lam nga a, a humpinelkai maitang in a pang lang khat lama om nisuh kung lam nga hi. A biakinn sung kimkotah hih bangin kibawl a,

²⁰ sual panin kongkhak zang kikal sung khempeuh ah a dimin om hi.

²¹ Biakinn deipi kongkhak khuamte pen a siik kikim vive ahi hi.

²² Tua ciangin Siangthopen Mun mai-ah sing tawh a kibawl biakna tau tawh a kibang pian khat om hi. Tong thum sang a, a dung a vai tong nih ahi hi. A khete, a kingaknate leh a zawlte sing tawh a kibawl ahi hi. A mipa in kei kiangah, “Hih in Topa’ mai-ah a kikoih sabuai ahi hi,” hong ci hi.

²³ Inndeipi sung lut nading leh Siangthopen Mun lut nading ah kongkhak om hi.

²⁴ Tua kongkhakte pen a laizang-a kituah, kongkhak peek nih nei-a kibawl ahi hi.

²⁵ Biakinn sung kawmte tungah a kibawl mah bangin hih biakinn deipi sung lutna-a kongkhakte tungah nisuh kung leh kherub limte kibawl hi. Kongkhak pualam, innsung lut nading inndei tung san-ah singpeek tawh liimsun khat kibawl hi.

²⁶ Hih inndeipi sung kawmte tungah a pualam a kihui kongvangneute om a, nisuh kungte tawh zepna zong kibawl hi.