Ezekiel 4 - Tedim Bible

Jerusalem A Kiumcih Nading Zia Lak

¹ Tua khit ciangin, “Ezekiel aw, leisek khat la-in na mai-ah koih in la, Jerusalem khuapi lahna-in tua leitsek tung git in.

² Tua ciangin tua khuapi a kiumcihna na lah nadingin a kiim-ah dumte, phungte, galpan’na phualte leh kulh sukkhap nading molhtumte bawl in.

³ Tua ciangin sikpeek khat la in la, nang leh tua khuapi kikal-ah kulh lim dingin koih in. Tua ciangin khuapi lam en in. Tua khuapi a kiumcih hi-in, nang pen a umcihte’ lim ding na hi hi. Hih in Israel mite’ adingin lim hi ding hi.

⁴ “Tua ciangin na veilam pang delhphahin lum in. Israel minamte’mawhna daan nangma tungah kong nga ding hi. Tua lai munah lumin amaute’ mawhna

⁵ ni zathum leh ni sawmkua sung na thuak ding hi. Bang hang hiam cih leh amau’ daan thuak ding kum khat sung tang dingin ni khat, amau’ thuak ding kum zah nangmah in a ni-in na thuak ding hi.

⁶ Hih bangin na gamtat khit ciangin na taklam delhphahin na kihei leuleu ding a, Judah mite’ mawhna daan ni sawmli sung na thuak leuleu ding hi. Nangma thuak ni khat pen amau’ thuak ding kum khat tang ahi hi.

⁷ Tua ciangin Jerusalem khuapi a kiumcihna sal gega in. Na puan-ak ban zialto in la, tua khuapi siat nading thu genkhol in.

⁸ Nang pen khauhual tawh kong hencip ding a, tua khuapi umcihna a kiman mateng na kihei thei kei ding hi.

⁹ “Tu-in, mangbuh, mangbuhham, belawi, beli, taang, leh mangbuhman pawlkhat la in la, tuate helkhawmin anlum-in bawl in. Na veilam delhphahin na lup hun ni zathum leh ni sawmkua sung tua na bawl anlum na ne ding hi.

¹⁰ Nek khat-in anlum shekel sawmnih gik bek na ne ding a, ni khat-in khat vei bek na ne ding hi.

¹¹ Tui zong duh zahzah hi loin, ni khat-in thawl khat bek na dawn ding hi.

¹² Na nek ding anlum pen mite’ muh-in mihing’ ek keu khawmin tuate mei-in na cih khit ciangin tua sungah na em ding hi,” hong ci hi.

¹³ Tua ciangin Topa in, “Israel mite, gamdangah ka thehthang hun ciangin thukham in nek dingin a kham an ninte tu-a mah bangin ne ding uh hi,” hong ci hi.

¹⁴ Ahi zongin kei zong ka dawng kik a, “Topa Pasian aw, cik mah-in kei ka kininsak ngei kei hi. Ka neu tunga kipan tu dongin ama thu-in a si tawm ganhing sa ahi a, gamsate’ nekbaang ahi zongin ka ne ngei kei hi. A nin-a a kiseh an khat peuhpeuh ka ne ngei nai kei hi,” ka ci hi.

¹⁵ Tua ciangin amah in, “Tua ahih leh pha hi. Mihing’ ek tangin bawng’ ek na zang ding a, tua bawng-ek am sungah na anlum na em ding hi,” hong ci hi.

¹⁶ Tua ciangin amah in thu hong gen thuah lai a, “Ezekiel aw, Jerusalem khuapi sungah an ka beisak ding a, mite in lunghihmawhna tawh a annek a tuidawnte uh ciangtan ding uh hi.

¹⁷ An leh tui loin amaute om ding uh a, amaute lunggimin, a tawpna-ah a mawhna hangun beimang ding uh hi,” hong ci hi.