Ezekiel 3 - Tedim Bible

¹ Tua ciangin amah in kei kiangah, “Ezekiel aw, nang tungah ka hong piak hih laizial ne in. Tua ciangin va pai in la, Israel mite kiangah thu va gen in,” hong ci hi.

² Tua ahih manin kei zong ka kam ka ka a, ka nek dingin a laizial hong pia hi.

³ Amah in, “Ezekiel aw, ka hong piak laizial ne in la, na gilpi dim takin ne in,” hong ci hi. Kei zong tua laizial ka ne a, khuaizu tawh kibangin khum ka sa mahmah hi.

⁴ Tua ciangin amah in, “Ezekiel aw, Israel mite kiangah pai in la, nang tungah kong gen khempeuh, amaute tungah va gen in.

⁵ Pau na theih loh minam dangte kiangah a hong sawl ka hi kei hi; na mipih Israel mite kiangah a hong sawl ka hi hi.

⁶ A pau na theih loh, pau haksa a zang minam liante kiangah nang hong sawl hi leng, amaute in na thugen hong mang ding uh hi.

⁷ Ahi zongin Israel mite khat beek in na thu hong ngai lo ding hi; keima kam teekteek nangawn ngai lo ding uh hi. Amaute a lungsim uh khauh a, dem nopna lungsim nei uh hi.

⁸ Tu-in amaute mah bangin a khauh mahmah, a duai mahmahin nang kong bawl ding hi.

⁹ Suang khempeuh sangin a sakzaw, diamond suang zahin a sakin na lungsim kong bawl ding hi. Tua ahih manin hih a lehdo thei mite kihta kei in,” hong ci hi.

¹⁰ Tua khit ciangin amah in thu hong gen thuah lai a, “Ezekiel aw, nang tungah kong thugen khempeuh lim takin ngai in la, ciamteh in.

¹¹ Tua ciangin amaute in na thu hong ngai a, hong ngai kei zongin, sal-a a om na mipihte kiangah va pai in la, nang tungah kong thugen khempeuh amaute tungah va gen in,” hong ci hi.

¹² Tua ciangin Pasian’ Kha in hong paipih to a, ziin’ liing zahin a gin’ ngaih awging khat ka nungah ka za a, “Vantungah a om Topa, ama minthan’na hangin phat un,” ci-in a kiko hi.

¹³ Ganhingte in huih lakah a kha zapna leh leengpei gingte ka za a, ziin’ liing zahin gin’ ngaih mahmah hi.

¹⁴ Pasian’ Kha in hong pai khiatpih lai takin ka lungkim het loin ka heh suak mahmah hi. Ahi zongin Topa’ vangliatna in kei hong zo zaw hi.

¹⁵ Tua ahih manin ka mipih salte’ omna, Khebar Gun gei-a om Telabib munah ka va tung a, ka muhsa thute ngaihsunsunin tua lai a, amaute lakah ni sagih sung ka om hi.

Israel Mite’ Galvilpa

¹⁶ Ni sagih a cin’ khit ciangin Topa in kei hong hopih a,

¹⁷ “Ezekiel aw, Israel minamte’ galvilpa dingin nang kong koih hi. Nangma tungah ka hong gen hilhkholhnate khempeuh amaute tungah na gen sawn ding hi.

¹⁸ Mi gilopa khat pen, ‘Na si taktak ding hi,’ ci-in ka gen ciangin, amah kikhelin a nuntak theihna dingin thu na hilhkholh kei leh, tua mipa pen mawhnei mahin si ding a, ahi zongin ama sihna sisan thu ahih leh nang kong ngawh ding hi.

¹⁹ Mi gilo khat hilhkhol napi-in a mawh bawlna a tawp nop kei leh, mawhnei mah in si ding a, ahi zongin nangma nuntakna suakta ding hi.

²⁰ “Mi hoih mahmah khat in gamtat siat ding hong kipan leh a lauhuaina munah amah ka koih ding hi. Amah hilhkhol kei lecin, si ding hi. Ama mawhna hangin si ding a, ama gamtat hoihsate phawkin ka nei kei ding hi. Ama sihna sisan thu nang kong ngawh ding hi.

²¹ Ahi zongin a khialh loh nadingin mi hoih khat na hilh a, na thu hong mangin mawhna a bawl kei leh amah nungta ding hi. Nang zong na suakta ding hi,” hong ci hi.

Kamsangpa Pau Theilo

²² Ka sungah Topa’ vangliatna hong om lamtak ka phawk a, amah in kei kiangah, “Ding in la, kuam sungah va pai in. Tua lai mun panin nang kiangah thu kong gen ding hi,” hong cihna ka za hi.

²³ Tua ahih manin kei zong kuam sungah ka va pai a, Khebar Gun gei-a ka muh bang teek mahin tua lai-ah Topa’ minthan’na ka mu hi. Kei zong lei-ah ka bok suk a,

²⁴ ahi zongin ka sungah Pasian’ Kha hong lutin ka khe-in hong dingsak hi. Tua ciangin amahin, “Inn-ah ciah in la, inn kikhaknelh in.

²⁵ Ezekiel aw, khauhual tawh nang hong kikhih ding a, mite kiangah na paikhia thei kei ding hi.

²⁶ Na leii ka zawsak ding a, hih a lehdo thei mite na thuhilh thei kei ding hi.

²⁷ Ahi zongin nang kong hopih kik ciangin kong pausak thei kik ding a, amaute kiangah, “Topa Pasian in hih bangin ci hi,’ na ci ding hi. Tua ciangin mi pawlkhat in na thu hong ngai ding a, ahi zongin amaute pen a lehdo thei minam ahih manin pawlkhat in na thu hong ngai lo ding uh hi,” hong ci hi.