Ezekiel 10 - Tedim Bible

Pasian’ Minthan’na in Biakinn Nusia

¹ Tua ciangin kherubte’ lu tung sanah a om a kuum ka et leh, sapfeiros suangmanpha tawh a kibawl kumpi tokhom bang pian khat, tua a kuum tungah om hi.

² Tua ciangin Pasian in saihadial puan a silhpa kiangah, “Na khut dimin mei-am tawi in la, kherubte nuai-a om leengpeite kikal-ah va om in. Tua ciangin khuapi tungah a mei-amte theh in,” ci-in sawl hi. Kei zong ama pai ka en gige hi.

³ Tua mipa a pai lai takin kherubte pen biakinn leitaw lamah na ding uh a, biakinntual sungnung teng dimin meiipi kai hi.

⁴ Kherubte’ tung panin Topa’ minthan’na hong pai khia-in biakinn kongah va om hi. Tua ciangin biakinn sungah meiipi hong kai a, biakinntual ah Topa’ minthan’na taang zeizai hi.

⁵ Kherubte’ khazap ging pen biakinntual puanung ciang dongah kiza a, Vanglian Pasian a pau ciangin a awging tawh kibang hi.

⁶ Kherubte’ nuai-a om leengpeite kikal panin mei a la dingin Topa in saihadial puan silhpa a sawl ciangin tua mipa zong va pai-in leengpei khat gei-ah va ding hi.

⁷ Tua ciangin kherub khat in a khut zanin amaute’ kikal-a om meikhuk sawkin mei-am pawlkhat la a, saihadial puan a silhpa’ khut sungah koih hi. Saihadial puan a silhpa in zong tua mei-amte tawi-in paikhia hi.

⁸ Tua kherubte in a kha nuai ciat uhah mihing khut tawh a kibang nei ciat uh hi.

⁹ Tua kherubte gei-ah leengpei khat ciat omin, tua leengpeite suangmanpha bangin tee hi.

¹⁰ Tua leengpeite a pianzia kibang kim a, leengpei khat in a kikantanin peei dang khat ciat nei thuah uh hi.

¹¹ Tua kherubte a pai ciangin kihei kul loin a utna lam peuhpeuh ah pai thei uh hi. A pai nading lam a nga a pei’ paipaina-ah adangte in zui-in kihei tuan lo uh hi.

¹² A leengpei kualte, a pei kan’na khaute leh a pei buppi dimin mittang om hi.

¹³ Hih leengpeite pen maang ka muhmasakna sungate mah tawh kibang hi.

¹⁴ Tua kherubte in maitang li ciat nei uh hi. A maitang khatna bawngtal maitang, a nihna mihing maitang, a thumna humpinelkai maitang, a lina muvanlai maitang tawh kibang hi.

¹⁵ Hih Kherubte pen Khebar Gun gei-a ka muh ganhingte mah ahi hi. Tua ciangin hih kherubte leeng to uh a,

¹⁶ amau a kin uh ciangin a leengpeite in zong zui uh hi. A leeng dingin a kha a zal uh ciangin zong leengpeite in zui lai uh hi.

¹⁷ Kherubte a khawl ciangin leengpeite khawl a, kherubte a leen’ ciangin leengpeite in zong zui uh hi. Bang hang hiam cih leh tua leengpeite pen kherubte’ khut nuai-a om ahi uh hi.

¹⁸ Tua ciangin biakinn kong panin Topa’ minthan’na paikhia-in kherubte’ tung sanah va om hi.

¹⁹ Tua banga ka et lai takin kherubte in zong a kha uh zalin lei lak panin leeng to uh a, leengpeite in zong zui uh hi. Biakinn nisuahna lam kongpi-ah khawl uh a, amaute tung sanah Israel Pasian’ minthan’na zong hong khawl hi.

²⁰ Hih kherubte pen, Israel Pasian a kumpitokhom tawh a pua, Khebar Gun gei-a ka muh ganhingte mah hi, ci-in ka thei hi.

²¹ Amaute in maitang li, kha li, leh a kha nuai ciat uhah mihing khut tawh a kibang khut nei ciat uh hi.

²² Amaute’ maitang pen Khebar Gun gei-a ka muhsa maitangte mah tawh kibang teekteek a, a pai uh ciangin a mailam ciat mah-ah tang takin pai thei uh hi.