Esther 6 - Tedim Bible

Mordekai Pahtawi dingin Haman Ki-aana-sawl

¹ Tua zan-in kumpipa ihmu thei lo a, nisim thupiang ciamtehna Khang Tangthu Laibu lasak a, ama zakin tua laibu kisim hi.

² Tua banga kisim ciangin, kongcingte’ sung panin innsung mang Bigthana leh Teresh in Kumpipa Ahasu-eras thah a sawmna thu pen Mordekai in a genna thu a kiciamtehna sim kha uh hi.

³ Tua thu a zak ciangin kumpipa in, “Hih thu hangin Mordekai’ tungah pahtawina ahi a, minliatna ahi zongin bang kipia ahi hiam?” a ci hi. Tua lai-a a om kumpipa’ nasemte in Mordekai tungah bangmah a kipiak lohna thu gen uh hi.

⁴ Tua ciangin kumpipa in, “Hih kiim nai-ah kua om hiam?” a ci hi. Tua lai takin Mordekai thah nadingin a phuhsa khuam tungah Mordekai khai lup nading thu kumpipa kiangah a gen dingin kumpi huang sungah Haman hong tum hi.

⁵ Tua ahih ciangin kumpipa’ nasemte in ama kiangah, “Hih lai-ah Haman om hi, inntual ah ding hi,” a ci uh hi. Tua ciangin kumpipa in, “Amah hong tumsak un,” a ci hi.

⁶ Tua ahih ciangin Haman hong tum a, kumpipa in ama kiangah, “Kumpipa in a pahtawi nop mipa tungah bang kihih leh hoih na sa hiam?” a ci hi. Tua ciangin Haman in a lungsimah ngaihsun a, “Kumpipa in kei sangin a pahtawi nop zawk ding kua om zenzen ding hiam?” ci-in ngaihsun hi.

⁷ Tua ahih manin Haman in kumpipa kiangah, “Kumpipa in a pahtawi nop mipa adingin

⁸ kumpipa mahmah in a silh kumpi puante, leh kumpipa a tuan’na sakol a lukhu tawh lasak in.

⁹ Tua ciangin kumpipa’ ulian pen khat tungah tua kumpi puante leh sakol apsak in. Kumpipa in a pahtawi nop mipa pen amah zeemsak in la, tua ciangin khua sung kongzing lampi-ah sakol tungah a tuangsa-in na ulian penpa kaisak in la, ama mai-ah kiko sakin, ‘Kumpipa in a pahtawi nop mipa tungah hih bangin kibawl ding hi,’ cisak in,” a ci hi.

¹⁰ Tua ciangin kumpipa in Haman kiangah, “Na cihsa bangin manlangin kumpi puante leh sakol la pah in la, kongpi-a om Judah mi Mordekai tungah hih thute khempeuh hih in. Na gensate khat beek siit kei in,” a ci hi.

¹¹ Tua ahih ciangin Haman in kumpi puante leh sakol la-in Mordekai zeem a, khuapi sung kongzing lampi-ah amah tuangsakin, “Kumpipa in a pahtawi nop mipa tungah hih bangin kibawl ding hi,” ci-in taangko hi.

¹² Tua ciangin kumpipa’ kongpi-ah Mordekai ciahkik hi. Haman ahih leh kilukhuhsa-in a thuum kawmin a innah ciah pah vingveng hi.

¹³ Tua ciangin Haman in a zi Zeresh leh a lawmte khempeuh tungah ama tunga thu piang teng gen hi. Tua ciangin a zi Zeresh leh a lawmte in ama kiangah, “Tu-a na lelhtaak Mordekai in Judah mi ahih leh amah na zo kei ding a, amah in nang hong zo zaw ding hi,” a ci uh hi.

¹⁴ Tua bangin Haman tawh amaute a kiho lai takin kumpipa’ innsung mangte hong pai a, Esther’ bawlsa nitak an ne dingin amah pai khiatpih pah uh hi.