Amos 3 - Tedim Bible

Kamsangpa’ Nasep

¹ Israel mite aw, note lang khata Topa’ thugen, hih thu lim takin ngai un: Izipt gam panin na minam bup-un note kong paikhiatpih hi.

² Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin, note daan ka hong pia ding hi.

³ Mi nih thukimna om masa lopi-in, lampi-ah tonkhawm ahi hiam?

⁴ A samat ding mu lopi-in, gamlakah humpinelkai mawk hawk ahi hiam? Samat nei lopi-in, a kua sungah humpinelkai khanglai mawk hawk ahi hiam?

⁵ Thang antah om lopi-in lei laka thangah, vasa mawk awk ahi hiam? A su khat om lopi-in, thang kimawksai ahi hiam?

⁶ Khuapi sungah pataukohna gal peengkul a kitum ciangin, mite lau loin om mawk thei ahi hiam? Topa’ tun’ sak lohpi-in khuapi sungah, lauhuaina mawk tun’ ahi hiam?

⁷ Topa Pasian in ama nasem kamsangte tungah, ama geelna theisak lopi-in bangmah hih het lo hi.

⁸ Humpinelkai a hawk ciangin, kua lau loin om thei ahi hiam? Topa Pasian in thu a gen ciangin, kua in ama thu gen loin om thei ding ahi hiam?

Samaria A Siatna

⁹ Assiria gam mun muanhuaina sunga om mite, leh Izipt gam mun muanhuainna sunga om mite tungah thu zasak un la, “Samaria-ah hong kikhawm un la, tua lai-a buaina lianpite, kinen’niamnate hong mu in,” ci un.

¹⁰ Topa in hih bangin ci hi: Hih mite in a manin gamtat ding thei lo uh a, giloin mi’ na a suh uh vante tawh, a inn lianpipite uh kidimsak uh hi.

¹¹ Tua ahih ciangin galte in a gam uh umcihin, a panmun teng uh susia ding a, a inn lianpipite uh luh gawp ding uh hi. Topa in ci hi.

¹² Topa in hih bangin ci hi: Tuucingpa in humpinelkai’ nek baang tuu khebom nih ahi a, a bil them khat beek ahi zongin a ngah teei mah bangin, tutphah nip kiu khat leh lupna them khat tawh a kibang, Samaria sunga om Israel mi tawmno khat suakta tei ding hi.

¹³ Tu-in ngai un la, Jakob’ suan leh khakte hilhkhol un, mihonpite’ Pasian ahi, Topa Pasian in ci hi.

¹⁴ Amau’ khialhna hangin Israelte daan ka piak ni ciangin, Beth-el a, biakna taute zong ka susia ding a, biakna tau kite kitanin lei-ah kia ding hi.

¹⁵ Keimah in phalbi leh khuakhal innte ka susia ding a, saiha tawh a kibawl innte kisia-in, inn lian khempeuh beimang ding hi, Topa in ci hi.